ولار وزدەرىنىڭ الاياقتىق تاسىلدەرىن پايدالانىپ زەرگەرلىك بۇيىم ساۋداسىنان 5 اي بويى اي سايىن 40-60 پايىزدان تابىس تۇسىرەمىز دەپ ادامداردى الداپ كەلگەن. سونىمەن بىرگە قارجى پيراميداسىن ۇيىمداستىرۋشىلار سالىمشىلاردى وزدەرىنىڭ سالىمدارىنىڭ سەنىمدى قولدا ەكەنىن ايتىپ بارىنشا سەندىرگەن. ولار اقشالارىنىڭ ەشقايدا جوعالىپ كەتپەيتىنىنە ۋادە بەرىپ, كەز كەلگەن جاعدايدا باستاپقى قۇيعان قاراجاتتارىن قايتارىپ بەرەتىندەرىن ايتىپ ابدەن سەنىمدەرىنە كىرگەن. الايدا «وتىرىكتىڭ ارتى ءبىر تۇتام» دەمەكشى, الاياقتاردىڭ ادەمى سوزدەرىنىڭ سىرتىندا كادىمگى حالىقتى الداۋ جولىمەن اقشاسىن جىمقىرۋ ارەكەتى جاتتى. جەمە-جەمگە كەلگەندە زەرگەرلىك بۇيىمداردىڭ ساۋداسىنان سالىمشىلارعا ەشقاندايدا دا پايدا تۇسكەن جوق, بارلىق تولەمدەر پيراميداعا جاڭادان كىرگەن قۇربانداردىڭ ەسەبىنەن تولەنىپ وتىردى. دەي تۇرعانمەن الاياقتاردىڭ قالتاسىنا تۇسەتىن تابىس ازايعان ساتتە الگى قارجى پيراميداسىنىڭ دا ىرگەتاسى شەتىنەن كۇيرەي باستادى.
بۇگىنگى تاڭدا ەكى جۇزدەي ادام الاياقتاردىڭ قۇربانىنا اينالىپ وتىر. ولار «Ansar Gold» قارجى ۇيىمىنا 400 ملن تەڭگە قاراجاتتارىن ءوز قولدارىمەن سەنىپ تاپسىرعان. قيساپسىز اعىلعان قارجىنى قالاي جاسىرۋدىڭ, بانكوماتتان بىلدىرمەي شەشىپ الۋدىڭ جولىن ويلاستىرعان الاياقتار جاقىن تۋىستارىنىڭ جاردەمىنە يەك ارتقان.
قازاقستاننىڭ قارجى مونيتورينگى اگەنتتىگىنىڭ رەسمي وكىلى ەرنار تايجاننىڭ مالىمدەۋىنشە كۇدىكتىلەر وزدەرىنىڭ تۋىستارىن دروپ رەتىندە پايدالانعان. ياعني بانكوماتتاعى قاراجاتتى قولدارىنا ءتۇسىرۋ ءۇشىن تۋىستارىنىڭ بانكتىك كارتالارىن ۋاقىتشا الا تۇرعان. وسى اتالعان قارجى پيراميداسىن ۇيىمداستىرعان ازامات قۇرىقتالىپ, قازىر ۋاقىتشا ۇستاۋ يزولياتورىندا قاماۋدا جاتىر. ال ونىڭ جەكە مۇلكى بولىپ تابىلاتىن ءۇيى مەن اۆتوكولىگى بولسا تاركىلەندى.
شىمكەنت
