فوتو: kz.qaj.kz
پرەمەر-مينيستر ەلىمىزدە جول ماسەلەسى ءالى دە وزەكتى ەكەنىن اتاپ ءوتتى.
«بيىلدىڭ وزىندە ءبىز رەسپۋبليكا بويىنشا 13 مىڭ شاقىرىم جولدى جوندەۋدەن جانە رەكونسترۋكتسيادان وتكىزەمىز. ول وتە اۋقىمدى جۇمىس. جاڭا جولدار دا سالىنىپ جاتىر, مىسالى, «اقتوبە-ۇلعايسىن», «جەزقازعان-قاراعاندى», «جەزقازعان-پەتروپاۆل» جانە تاعى باسقالار. جاقىندا وزدەرىڭىز بىلەتىندەي, مەملەكەت باسشىسى ورتالىقتان باتىسقا قاراي ۇلكەن اۆتوجول ءدالىزىن سالۋ تۋرالى تاپسىرما بەردى. ءبىز وسىدان تۋرا ءبىر اي بۇرىن جۇمىستاردى, ياعني استانا قالاسىنان ىرعىزعا قاراي جولدى سالۋدى باستادىق. بۇل جول تورعاي ءوڭىرىنىڭ, اسىرەسە ارقالىق قالاسىنىڭ دامۋىنا وتە ۇلكەن سەرپىن بەرەتىن جوبا. ويتكەنى, وسى جول دا, جەزقازعاننان پەتروپاۆلعا باراتىن جول دا ارقالىق قالاسى ارقىلى وتەدى. بۇل بيزنەستىڭ دامۋىنا, وسى وڭىرلەردەگى تۇرعىنداردىڭ ءومىر ساپاسىنىڭ ارتۋىنا ۇلكەن مۇمكىندىك بەرەدى. سوندىقتان ءبىز ارينە بۇل جۇمىستاردى جالعاستىرا بەرەمىز», دەدى پرەمەر-مينيستر.
سونداي-اق ولجاس اباي ۇلى قازاقستان جولدارى ەۋروپا ەلدەرىمەن سالىستىرعاندا نەلىكتەن كەمشىن ءتۇسىپ وتىرعانىن ايتتى.
«قازاقستاننىڭ جەرى كەڭ بايتاق بولعاندىقتان جولدىڭ ءوزىن سالۋ ءۇشىن قوماقتى قارجى, مىقتى ينۆەستيتسيا كەرەك. مىسالى ەۋروپالىق ەلدەردى الساق, ولاردىڭ جەر اۋماقتارى سونشالىقتى ۇلكەن ەمەس, سوندىقتان دا وندا ينفراقۇرىلىمدارعا دا كوپ قوماقتى قارجى جۇمسالمايدى. ال بىزگە بۇل جاعدايدا ءىرى ينۆەستيتسيالار قاجەت. سوندا دا بولسا, ءبىز بۇل جۇمىستاردى توقتاتپاي, كەزەك-كەزەڭىمەن ىسكە اسىراتىن بولامىز», دەدى ول.
