بۇگىندە كول جاعالاۋى بىرنەشە تۋريستىك ايماقتان تۇرادى: اباي جانە جەتىسۋ وبلىستارىنداعى جاعاجايلار – ارقايسىسى ءوز ەرەكشەلىگى, ينفراقۇرىلىمدىق جۇكتەمەسى جانە دامۋ باعىتى بار جەكە لوكاتسيالار. اباي وبلىسىنداعى كول جاعالاۋىندا ۆيتسە-پرەمەر دەمالۋشىلارمەن, كاسىپكەرلەرمەن جانە مەديتسينا قىزمەتكەرلەرىمەن كەزدەسىپ, اباتتاندىرۋ نىساندارى مەن مەديتسينالىق پۋنكتتى قاراپ شىقتى. سانيتارلىق جاعداي, رۇقساتسىز ساۋدا, اباتتاندىرۋ مەن قاۋىپسىزدىك ماسەلەلەرىنە ەرەكشە نازار اۋدارىلدى. ازاماتتار مەن تۋريستەردىڭ ءوتىنىشى بويىنشا بىرقاتار تاپسىرما بەرىلدى. اتاپ ايتقاندا, تاماق ونىمدەرىنىڭ رۇقساتسىز ساۋداسىنا قاتىستى سانيتارلىق-ەپيدەميالىق قىزمەتتىڭ تەكسەرىسىن ۇيىمداستىرۋ, جاعالاۋدىڭ تازالىعىنا باقىلاۋدى كۇشەيتۋ جانە قوقىستى جۇيەلى تۇردە شىعارۋ, دەمالۋشىلار كوپ جينالاتىن جەرلەرگە قوسىمشا قوقىس جاشىكتەرى مەن كونتەينەرلەر ورناتۋ, تۋريستىك ايماقتى تۇراقتى بايلانىسپەن قامتاماسىز ەتۋ ماسەلەسىن قاراستىرۋ مىندەتتەلدى.
سونىمەن قاتار ە.كوشەرباەۆ جاعالاۋ بويىنداعى جەر پايدالانۋ كارتاسىمەن تانىسىپ, قولدانىستاعى باس جوسپارعا تالداۋ جۇرگىزۋدى تاپسىردى. كاسىپكەرلەردىڭ سۋ ايدىنىنا كىرۋگە شەكتەۋ قويىلۋى جەكە ماسەلە رەتىندە قارالدى. جەرگىلىكتى اتقارۋشى ورگاندارعا بۇزۋشىلىقتاردى تەز ارادا انىقتاپ, ازاماتتاردىڭ سۋعا ەركىن ءوتۋىن قامتاماسىز ەتۋ تاپسىرىلدى.
بيىل الاكول كولىنىڭ جاعالاۋىندا اۋقىمدى رەكونسترۋكتسيالاۋ جانە اباتتاندىرۋ جۇمىستارى باستالدى. وبلىستىق بيۋدجەتتەن 658 ملن تەڭگە ءبولىندى, ونىڭ ىشىندە, 108,9 ملن تەڭگە – اربات الاڭىن جوندەۋگە, 171,6 ملن تەڭگە – جاڭا قوعامدىق كەڭىستىك قۇرۋعا, 107,5 ملن تەڭگە جاعالاۋدى اباتتاندىرۋعا باعىتتالادى.
جاعاجايدا 25 كيىم اۋىستىرۋ كابيناسى, 50 قوقىس كونتەينەرى, 2 بيواجەتحانا, 10 سانيتارلىق توراپ (ماۋسىم سوڭىنا دەيىن 18-گە جەتكىزىلەدى) ورناتىلدى. 7 ءپيرستىڭ ۇشەۋى سالىندى, جارىقتاندىرۋ جۇرگىزىلىپ, قۇتقارۋ مۇنارالارى ورنالاستىرىلدى. قوسىمشا 300 ملن تەڭگە ءبولىندى, اتاپ ايتقاندا, 141,6 ملن تەڭگە – كابانباي اۋىلىندا ءورت ءسوندىرۋ دەپوسىنىڭ قۇرىلىسىنا, 57,7 ملن تەڭگە – كول جاعالاۋىندا قۇتقارۋ ستانساسى قۇرىلىسىنا, 100 ملن تەڭگە تۋريستىك اۋماقتى دامىتۋدىڭ باس جوسپارىن ازىرلەۋگە جۇمسالادى.
ە.كوشەرباەۆ تۋريستىك ايماقتاردى جاقسارتۋ جۇمىسى ەلدىڭ بارلىق ءوڭىرىن قامتيتىن مەملەكەتتىك ستراتەگيا اياسىندا جۇزەگە اسىرىلۋى قاجەتتىگىن اتاپ ءوتتى.
«باستى مىندەت – ۋاقىتشا شەشىمدەر قابىلداماي, تازا جاعاجايلار, قاۋىپسىز دەمالىس, تۇراقتى بايلانىس جانە ويلاستىرىلعان ينفراقۇرىلىمدى قامتيتىن ورنىقتى جۇيە قالىپتاستىرۋ. تۋريزم – ازاماتتار ءۇشىن جايلى, ال وڭىرلەر ءۇشىن وركەنيەتتى ەكونوميكالىق اسەر اكەلۋگە ءتيىس», دەدى ۆيتسە-پرەمەر.
بارلىق وڭىردە انىقتالعان ماسەلە ورتاق: قوقىس جاشىكتەرىنىڭ جەتىسپەۋى, بەيبەرەكەت ساۋدا, بايلانىستىڭ ناشارلىعى, زاڭسىز قۇرىلىستار. وسىعان بايلانىستى وڭىرلەرگە جاساعان ساپار قورىتىندىسى بويىنشا تۋريستىك ايماقتاردى جوسپارلاۋدىڭ ستاندارتتارىن وزگەرتۋ جانە اكىمدىكتەر مەن قاداعالاۋ ورگاندارىمەن ءوزارا ءىس-قيمىلدى كۇشەيتۋ سىندى جۇيەلى شارالار قابىلدانادى. باقىلاۋ ۇكىمەت دەڭگەيىندە جۇزەگە اسىرىلادى.
