بۇعان دەيىن بانك First Heartland Jusan Bank دەگەن اتاۋمەن تانىمال بولعان. 2024 جىلدىڭ ماۋسىم ايىندا رەبرەندينگ جاساپ, جاڭا اتاۋعا كوشكەن بولاتىن. ال 4 شىلدە كۇنى Alatau City Bank اتاۋىمەن قايتادان رەسمي ليتسەنزيا الدى.
بانكتىڭ جاڭا يەسى ۆياچەسلاۆ كيم بۇل ساتىپ الۋدى ستراتەگيالىق شەشىم دەپ باعالاپ وتىر:
«Alatau City Bank-ءتى ساتىپ الۋ مەن ءۇشىن اسا ماڭىزدى. مەن ونىڭ نەگىزىندە قازاقستان نارىعى ءۇشىن جاڭا قارجى ينستيتۋتىن قۇرۋدى جوسپارلايمىن. كەيىنگى ەكى جىلدا اتقارىلعان جۇمىس ءۇشىن بانك مەنەدجمەنتىنە العىسىمدى بىلدىرەمىن. ەگەر ۇزدىك ناتيجەلەردى ساقتاپ, تەحنولوگيالىق دامۋعا ەرەكشە كوڭىل بولسەك, تابىسقا جەتەمىز», دەدى كاسىپكەر.
بۇعان دەيىن Alatau City Bank-ءتىڭ يەسى بولعان كاسىپكەر عالىمجان ەسەنوۆ بانك جۇمىسىنا 2023 جىلدىڭ ورتاسىندا باقىلاۋ ورناتقان. ول وسى ۋاقىت ىشىندە كوماندامەن بىرگە ماڭىزدى وزگەرىستەر ەنگىزىپ ۇلگەرگەنىن ايتتى:
«كوماندامىز بانك قىزمەتىنىڭ تيىمدىلىگىن ارتتىرىپ, بيزنەس-ۇدەرىستەردى وڭتايلاندىرۋعا, ونىمدەردى جاڭارتۋعا جانە اكتيۆتەردىڭ ساپاسىن جاقسارتۋعا كۇش سالدى. بۇل وزگەرىستەر ەندى كيم مىرزانىڭ باسشىلىعىمەن ودان ءارى دامي تۇسەتىنىنە سەنەمىن», دەدى ەسەنوۆ.
قازىر Alatau City Bank اكتيۆ كولەمى بويىنشا قازاقستانداعى الدىڭعى التى بانكتىڭ قاتارىنا كىرەدى, ال مەنشىكتى كاپيتال كولەمى بويىنشا ءتىپتى ءۇشىنشى ورىندا تۇر.
