«باۋىرىنا سالۋ» كارتيناسى يتالياداعى فەستيۆالدە ۇزدىك اتاندى

2003 جىلى نەگىزى قالانعان Ischia Film Festival – ەۋروپاداعى ەڭ كوركەم جانە ەرەكشە فەستيۆالدەردىڭ ءبىرى. ول ورتاعاسىرلىق اراگون سارايىنىڭ اۋماعىندا وتەدى.

فەستيۆالدىڭ باستى ەرەكشەلىگى – كينونىڭ كورنەكى ورتاسىنا جانە ءتۇسىرىلىم ورىندارىنىڭ كوركەمدىك رولىنە نازار اۋدارۋ. سونىڭ ارقاسىندا ءاربىر فيلم مادەني جانە تابيعي كەڭىستىك كونتەكستىندە قاراستىرىلادى. «باۋىرىنا سالۋ» ءفيلمى «ۇزدىك تولىقمەتراجدى فيلم» نوميناتسياسى بويىنشا جەڭىمپاز اتاندى. فيلم قازاقستان رەسپۋبليكاسى مادەنيەت جانە اقپارات مينيسترلىگىنىڭ جانە ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن بولاتىن.

بۇعان دەيىن كارتينا Asia Pacific Screen Awards-تاعى ەڭ ۇزدىك جاستار ءفيلمى اتاندى, ازەربايجانداعى Baku International Film Festival دوداسىندا دا باس جۇلدەگە يە بولعان. فرانتسياداعى Cinema Heritage Festival بايقاۋىندا ارنايى ماراپاتقا يەلەندى. وپەراتور جاناربەك ەلەۋبەك Asia World Film Festival-دا «ۇزدىك وپەراتور» نوميناتسياسى بويىنشا توپ جاردى. سونىمەن قاتار فيلم رەسمي تۇردە قازاقستاننان «شەت تىلىندەگى ۇزدىك فيلم» نوميناتسياسى بويىنشا «وسكار-2025» سىيلىعىنا ۇسىنىلعان.

ءفيلمنىڭ سيۋجەتى ەجەلگى قازاق ءداستۇرى بويىنشا اجەسىنىڭ تاربيەسىندە بولعان بالانىڭ وقيعاسىن باياندايدى. اجەسى ومىردەن وتكەن سوڭ بالا اتا-اناسىنا ورالىپ, جاڭا ورتادا بەيتانىس ادامدارمەن قارىم-قاتىناسى قيىنداۋى توڭىرەگىندە وربەيدى.