ساحناعا توپتىڭ باستاپقى قۇرامىنداعى بەس مۇشەسى تولىق ونەر كورسەتەدى. اتاپ ايتقاندا, نيك كارتەر, ەي دجەي ماكلين, حاۋي دورو, كەۆين ريچاردسون, برايان ليترەلل. كونتسەرتتە بۇكىل الەمدىك حيت بولعان اندەر ورىندالادى. ولاردىڭ ىشىندە «I Want It That Way, Everybody» (Backstreet’s Back), «As Long As You Love Me», «Show Me The Meaning of Being Lonely», «Shape of My Heart» جانە جاڭا البومداردان كومپوزيتسيالار بار.
2025 جىلى «Backstreet Boys» لاس-ۆەگاستاعى ەڭ زاماناۋي كونتسەرت زالى Sphere ساحناسىندا «Into The Millennium» اتتى اۋقىمدى شوۋ باستادى. قىركۇيەكتىڭ 21-ىندە وتەتىن كونتسەرتكە ارنالعان بيلەتتەر ءبىر تاۋلىكتەن از ۋاقىتتا ساتىلىپ كەتكەن. بۇل تۋر پوپ-مۋزىكا تاريحىنداعى ەڭ تەز ساتىلعان تۋرلاردىڭ ءبىرى بولدى. شوۋدىڭ ەرەكشە تالابى – اق ءتۇستى كيىم, سوندىقتان ۇيىمداستىرۋشىلار وتاندىق كورەرمەندى الەمدىك ترەندكە قوسىلىپ, اق ءتۇستى كيىم كيىپ, 2000 جىلداردىڭ اتموسفەراسىنا ەنۋگە شاقىرادى.
استاناداعى كونتسەرتتىڭ ۇيىمداستىرۋشىسى – Astana Concert كومپانياسى. كونتسەرت 2025 جىلعى 21 قىركۇيەكتە «استانا ارەنا» ستاديونىندا وتەدى. كومپانيا بۇعان دەيىن دە حالىقارالىق جوبالاردى ءساتتى جۇزەگە اسىرىپ كەلەدى, سونىڭ ىشىندە 2025 جىلعى 1 جانە 10 تامىزدا وتەتىن دجەننيفەر لوپەستىڭ كونتسەرتتەرى دە بار.
بيلەتتەر 14 شىلدە كۇنى ساعات 12:00-دەن ساتىلىمعا شىعادى. Freedom Bank قوسىمشاسىندا عانا 24 ساعات بۇرىن الدىن الا ساتىلىم جاريالانادى. كەشبەك – 22%-عا دەيىن!
15 شىلدە كۇنى ساعات 12:00-دەن باستاپ بيلەتتەر Ticketon.kz سايتىندا قولجەتىمدى بولادى. تولەمنىڭ 10 ءتۇرلى ءتاسىلى قاراستىرىلعان, سونىڭ ىشىندە ءبولىپ تولەۋ مۇمكىندىگى بار.
مادەنيەت جانە اقپارات مينيسترلىگىنە قاراستى مادەنيەت كوميتەتى توراعاسىنىڭ ورىنباسارى ازامات بەلقايىروۆتىڭ ايتۋىنشا وقيعالىق ءتۋريزمدى دامىتۋ – ەل برەندىن جانە ۇلتتىق مادەني-تاريحي مۇرانى تانىمال ەتۋدىڭ ءتيىمدى قۇرالى. ءاربىر وسىنداي ءىرى وقيعا – مەيلى ول حوسە كاررەراستىڭ گاسترولى بولسىن, نە بولماسا دجەننيفەر لوپەستىڭ كونتسەرتى بولسىن – ەلىمىزدىڭ قازىرگى زامانعى گۋمانيتارلىق قۇندىلىقتاردى ۇستاناتىن مەملەكەت رەتىندەگى بەدەلىن نىعايتاتىن سينەرگيالىق اسەر بەرەدى.
«مادەنيەتتە شەكارا جوق! مۇنداي اۋقىمدى ءىس-شارالاردى ۇيىمداستىرۋ مەن وتكىزۋگە ءتۇرلى ەلدەردەن كەلگەن جاستار – مادەنيەت وكىلدەرى, كاسىپكەرلەر, ۆولونتەرلەر مەن جانكۇيەرلەر بەلسەندى تۇردە اتسالىسادى. بۇل ەلدىڭ «مادەني كاپيتال» ساپاسىن ارتتىرىپ, حالىقارالىق دەڭگەيدەگى ءيميدجىن قالىپتاستىرادى.
الدىڭعى جىلدارى وسىنداي اۋقىمدى ءىس-شارالاردى ءساتتى وتكىزگەننىڭ ناتيجەسىندە قازاقستان زاماناۋي مادەني ترەندتەرگە ىلەسكەن, سونىمەن قاتار ۇلتتىق ءداستۇردى ساقتاپ وتىرعان مەملەكەت رەتىندە تانىلىپ كەلەدى.
21 قىركۇيەكتە استانادا وتەتىن كونتسەرتىڭ ماڭىزى زور, سەبەبى ءدال وسى كۇنى بۇكىل الەمدە حالىقارالىق بەيبىتشىلىك كۇنى اتالىپ وتەدى. الەم حالىقتارى اراسىندا ديالوگ, بەيبىتشىلىك پەن ىنتىماقتاستىقتى جاقتايتىن قازاقستان ءۇشىن بۇل وقيعا ەلدىڭ باستى گۋمانيتارلىق قۇندىلىقتارىنىڭ كورىنىسى بولماق», دەدى ازامات بەلقايىروۆ
«Kazakh Tourism» ۇلتتىق كومپانياسى» اق جوبالاردى سۇيەمەلدەۋ دەپارتامەنتىنىڭ ديرەكتورى الىشەر تۇرسىننىڭ ايتۋىنشا «Backstreet Boys» كونتسەرتىنە دايىندىق اياسىندا Astana Concert پەن «Kazakh Tourism» ۇلتتىق كومپانياسى» اق تۋريستەردى اۋقىمدى ءىس-شارالار ارقىلى تارتۋ بويىنشا ىنتىماقتاستىق تۋرالى مەموراندۋمعا قول قويدى. «Kazakh Tourism» جانىنان جەتەكشى تۋروپەراتورلار قاتىساتىن شتاب قۇرىلدى. نەگىزگى ماقسات – كونتسەرت بيلەتى قوسىلعان ارنايى تۋريستىك پاكەتتەر دايىنداپ, شەتەلدىك قوناقتارعا ۇسىنۋ.
«Backstreet Boys كونتسەرتىنە 40-تان استام ەلدەن تۋريستەر كەلەدى دەپ بولجانعان. بۇل – تۋريستەر تارتۋ ءۇشىن ءتيىمدى ادىستەردىڭ ءبىرى. ماسەلەن, دجەننيفەر لوپەستىڭ استانادا وتەتىن كونتسەرتىنە 10 مىڭ, ال الماتىداعى كونتسەرتىنە 8 مىڭ تۋريست كەلەدى دەپ جوسپارلانىپ وتىر», دەدى الىشەر تۇرسىنوۆ.
ال قالا اكىمدىگىنىڭ «Astana Tourism» ءتۋريزمدى دامىتۋ ورتالىعىنىڭ باسشىسى ارتيوم دميتريەۆيچ كۆاشۋك سوزىنشە «Astana Tourism» ءتۋريزمدى دامىتۋ ورتالىعى قالاداعى تۋريستىك سالانى جان-جاقتى دامىتۋ ءۇشىن, سونىڭ ىشىندە قالا قوناقتارى ءۇشىن قىزىقتى ءىس-شارالار كۇنتىزبەسىن قۇرۋ ماقساتىندا قۇرىلدى.
ء«بىز ەلوردا قوناقتارى ءۇشىن جايلى ءارى قاۋىپسىز جاعداي جاساۋعا بار كۇشىمىزدى سالامىز, ءار ساپار ەرەكشە اسەر قالدىرىپ ەكەن دەيمىز.
حالىقارالىق ارتىستەردىڭ, ۇيىمداستىرۋشىلاردىڭ جانە تۋريستەردىڭ استاناعا دەگەن قىزىعۋشىلىعى ارتىپ كەلە جاتقانىن بايقاپ وتىرمىز. قالا بارعان سايىن اۋقىمدى ءىس-شارالار وتەتىن الاڭعا اينالىپ كەلەدى. بۇل –جيناقتالعان تاجىريبە مەن تۋريزم سالاسىنداعى جۇيەلى جۇمىستىڭ ناتيجەسى. سونىمەن قاتار ينفراقۇرىلىمنىڭ دا دامىپ كەلە جاتقانىنىڭ ايقىن دالەلى.
Backstreet Boys توبىنىڭ كونتسەرتى سەكىلدى كولەمدى ءىس-شارالار ەلورداعا شەتەلدىك تۋريستەردىڭ نازارىن اۋدارىپ, جەرگىلىكتى ەكونوميكانىڭ دامۋىنا سەرپىن بەرەدى جانە استانانىڭ حالىقارالىق دەڭگەيدەگى بەدەلىن ارتتىرادى», دەدى ارتيوم كۆاشۋك.
ايتا كەتەلىك, استانادا 299 قوناق ءۇي جۇمىس ىستەيدى, ونىڭ ىشىندە 9-ى بەس جۇلدىزدى, 3-4 جۇلدىزدى شامامەن 100 قوناق ءۇي بار. جىل سايىن استانا كوپ ءىس-شارا وتەتىن مادەني قالا مارتەبەسىن نىعايتىپ كەلەدى. مىسالى, قالادا بىلتىر 128 ءىس-شارا وتكىزىلسە, بيىل 201 ءىس-شارا جوسپارلانعان.
مۇنداي ءىس-شارالار كوپجاقتى مۋلتيپليكاتيۆتى اسەر بەرەدى. قوناق ۇيلەردىڭ جۇكتەمەسى ارتادى, مەيرامحانالارعا, كولىككە, ساۋدا جانە مادەني نىساندارعا كەلۋشىلەر كوبەيەدى. ءبىر عانا كونتسەرت ونداعان سالانىڭ دامۋىنا سەرپىن بەرەدى.
