فوتو: olympic.kz
قازاقستان ەرلەر بوكس قۇراماسىنىڭ باس باپكەرى قايرات ءساتجانوۆ 6 شىلدە اياقتالعان استاناداعى الەم كۋبوگىندە «التىن» العان بوكسشىلار وسى الەم بىرىنشىلىگىنە تىكەلەي جولداما الاتىنىن ايتتى.
ال كەي سالماق دارەجەلەرىندە ءالى دە ساراپتاۋ كەرەك. دەسە دە باس باپكەر 70 كەلىدە تورەحان سابىرحان ليۆەرپۋلدەگى الەم بىرىنشىلىگىنە باراتىنىن ايتتى. وسى سالماقتا ەلورداداعى الەم كۋبوگىندە قولعاپ تۇيىستىرگەن ابىلايحان ءجۇسىپوۆ ءبىرىنشى جەكپە-جەگىندە قىرعىزستان وكىلى الماز وروزبەكوۆكە جەڭىلىپ قالعان ەدى.
«كەي جىگىتتەر جاراقاتىنا قاراماستان جەڭىسكە جەتە ءبىلدى. ال التىن العاندار مىندەتتى تۇردە ليۆەرپۋلدەگى الەم چەمپيوناتىنا بارادى. سونىمەن قاتار 70 كەلىدە تورەحان سابىرحان دا باق سىنايتىن بولادى. قالعاندار جاتتىعۋ جەكپە-جەكتەرى مەن الداعى جيىندار قورىتىندىسى بويىنشا انىقتالادى», دەدى قايرات ءساتجانوۆ.
بۇعان دەيىن تورەحان سابىرحان ۇلتتىق وليمپيادالىق كوميتەتكە بەرگەن سۇحباتىندا ازىرگە 70 كەلىدە ەكىنشى ءنومىرلى بوكسشى ەكەنىن ايتقان بولاتىن.
«ابىلايحان اعانىڭ بۇل سالماقتاعى تاجىريبەسى مول. سوندىقتان باپكەرلەر شتابى ءدال وسى جارىسقا ونى شىعارۋدى ءجون دەپ تاپتى. ارينە, باپكەردىڭ شەشىمى - ءبىز ءۇشىن زاڭ. ازىرگە مەن وسى سالماق دارەجەسىندە ەكىنشى ءنومىرلى سپورتشىمىن», دەدى تورەحان سابىرحان.
