تۇركىستاندا جانارماي قۇيۋ بەكەتىندە جارىلىس بولدى

وقيعا بەيبىتشىلىك كوشەسىندە ورنالاسقان اۆتوكولىكتەرگە جانارماي قۇيۋ بەكەتىندە بولعان. جارىلىس توگىلگەن جانارمايدىڭ گاز-اۋا قوسپاسىنان تۇتانۋى سالدارىنان بولعان. 

جالىن بىردەن كورشىلەس جەكە تۇرعىن ۇيگە, كوممەرتسيالىق عيماراتقا جانە ءدارىحانا مەن دۇكەنگە تاراعان. ءورتتىڭ جالپى اۋدانى 855 شارشى مەتردى قۇراعان.

جارىلىس سالدارىنان 1996 جىلى تۋعان جۇرگىزۋشى اۋىر دارەجەدەگى كۇيىك الىپ, شۇعىل تۇردە اۋرۋحاناعا جەتكىزىلگەن. الدىن الا مالىمەت بويىنشا, ونىڭ دەنەسىنىڭ 85–90% كۇيىپ قالعان.

«وقيعانىڭ سالدارىن جويۋ ءۇشىن تجد (جەكە قۇرامنىڭ 31 ادامى مەن 9 بىرلىك تەحنيكاسى), شىمكەنت قالاسى توتەنشە جاعدايلار دەپارتامەنتىنىڭ (8 ادام جانە 2 بىرلىك تەحنيكا), ىشكى ىستەر ورگاندارىنىڭ (4 ادام جانە 1 بىرلىك تەحنيكا), سونداي-اق جەرگىلىكتى اتقارۋشى ورگانداردىڭ (10 ادام جانە 2 بىرلىك تەحنيكا) كۇشتەرى مەن قۇرالدارى جۇمىلدىرىلدى. وقيعا ورنىندا تەرگەۋ ءبولىمى مەن ءورت-سىناۋ زەرتحاناسىنىڭ قىزمەتكەرلەرى جۇمىس ىستەپ جاتىر», دەپ حابارلادى تۇركىستان وبلىسىنىڭ توتەنشە جاعدايلار دەپارتامەنتى.

قازىر گاز-اۋا قوسپاسىنىڭ تۇتانۋ سەبەپتەرى انىقتالىپ جاتىر.

ايتا كەتەيىك, سوڭعى ۋاقىتتا قازاقستاندا كوپقاباتتى ۇيلەردە ورتتەردىڭ جيىلەپ كەتكەنى بايقالادى. بيىلعى جىلدىڭ العاشقى بەس ايىندا ەلىمىزدە 369 ءورت وقيعاسى تىركەلگەن.