جوبا اياسىندا ۇزدىك امەريكالىق حيرۋرگتار داررين حيۋبەرت, توماس لي, جازيرا ىرگەباي جانە مەريلين بەيگەن بالالار مەن جاس پاتسيەنتتەرگە تەگىن جاق-بەت رەكونسترۋكتسيالىق وتاسىن جاسايدى. اقش-تىق سالا ۇزدىكتەرىمەن بىرلەسە جۇزەگە اسىرىلعان جوبا ەل ازاماتتارىنىڭ تولىققاندى ساۋ ءومىر سۇرۋىنە تاپتىرماس مۇمكىندىك بولىپ وتىر.
حيرۋرگتار توبى الماتى قالالىق №5 كلينيكالىق اۋرۋحاناسىندا ەمدەلۋشىلەرگە تەگىن كەڭەس بەرىپ, ەگجەي-تەگجەي تەكسەرۋدەن وتكىزىپ جاتىر. بۇگىنگە دەيىن ولاردىڭ وسى قىزمەتىنە 50-دەن استام ادام جۇگىنگەن.
ء«بىز كۇن سايىن تاڭەرتەڭ ەكى وتا جاسايمىز, ال تۇستەن كەيىن وقۋ لەكتسيالارىن وتكىزەمىز. ء وتىپ جاتقان وتالاردىڭ بارلىعى تىكەلەي ەفيردە اۋديتورياعا كورسەتىلەدى. وتا جاساۋ كەزىندە قانداي ارەكەت جاساپ جاتقانىمىزدى ءتۇسىندىرىپ وتىراتىندىقتان, اۋديتوريادا اۋدارماشى جۇمىس ىستەيدى. باستى ماقساتىمىز بالالارعا ساپالى وتا جاساۋ ءارى جەرگىلىكتى دارىگەرلەرمەن تاجىريبە الماسۋ. پراكتيكا بارىسىندا العان داعدىلار ولارعا بولاشاقتا پايداسىن تيگىزەدى دەپ ۇمىتتەنەمىز», دەدى اقش Chippenham & Johnston-Willis مەديتسينالىق ورتالىعىنىڭ پلاستيكالىق حيرۋرگى جانە پلاستيكالىق حيرۋرگيا ءبولىمىنىڭ باسشىسى دوكتور داررين حيۋبەرت.
ماڭىزدى جوبانىڭ جۇزەگە اسۋىنا قولداۋ كورسەتكەن سولتۇستىك امەريكانىڭ قازاقستاندىق مادەني-ىسكەر قاۋىمداستىعىنىڭ (KCBANA) ديرەكتورى اينۋر رودجەرس يگى باستاما ارى قاراي جالعاساتىنىن اتاپ ءوتتى.
«جوبا مەديتسينالىق تاجىريبە الماسۋدىڭ كەشەندى جۇيەسىن قۇرۋعا باعىتتالعان. بولاشاقتا ءبىز قازاقستاندىق جانە امەريكالىق دارىگەرلەر ءۇشىن تاعىلىمدامادان ءوتۋ باعدارلامالارىن ىسكە قوسۋدى, رەزيدەنتۋرانى ۇيىمداستىرۋدى, قازاقستانداعى ەرەكشە قاجەتتىلىكتەرى بار بالالار ءۇشىن مامانداندىرىلعان كومەك الا الاتىن ورتالىقتار اشۋدى, سونداي-اق مەديتسينالىق قۇرال-جابدىقتاردى جەتكىزۋ, شالعاي ايماقتار مەن تابيعي اپاتتاردان زارداپ شەككەن اۋداندارعا كومەك جىبەرۋ, بالالار ۇيلەرىنە قولداۋ كورسەتۋ مەن قايىرىمدىلىق شارالارىن جۇيەلى تۇردە ۇيىمداستىرۋدى جوسپارلاپ وتىرمىز», دەدى ول.
شەتەلدىك حيرۋرگتار الماتىدا 29 ماۋسىم-6 شىلدە ارالىعىندا بولىپ, ساپار بارىسىندا 10 بالا مەن ءجاسوسپىرىمنىڭ اۋرۋىنان ايىعۋىنا اتسالىسادى.
