فوتو: سۋ رەسۋرستارى جانە يرريگاتسيا مينيسترلىگى
مينيسترلىىكتىڭ حابارلاۋىنشا, انىقتالعان 65 زاڭبۇزۋشىلىقتىڭ 61-ءى – سۋ جەتكىزۋشىنىڭ كەلىسىمىنسىز سۋ كوپ قاجەت ەتەتىن داقىلداردى ەگۋگە بايلانىستى. تاعى 3 جاعدايدا كۇرىش القاپتارى كەلىسىمشارتسىز سۋارىلعان. بۇل فاكتىلەر سۋدى پايدالانۋ ءتارتىبىن ورەسكەل بۇزۋ بولىپ ەسەپتەلەدى.
جيىندا سۋ سالاسىنداعى قۇقىق بۇزۋشىلىقتاردى انىقتاۋ بويىنشا مينيسترلىك قۇرعان مونيتورينگتىك توپتاردىڭ جۇمىسى تۋرالى ەسەپ تىڭدالعان. سۋ رەسۋرستارى مينيسترلىگى مەن قۇقىق قورعاۋ ورگاندارى بىرلەسىپ ارەكەت ەتۋگە كەلىسكەن.
«مەملەكەت باسشىسىنىڭ سۋدىڭ «كولەڭكەلى نارىعىن» جويۋ جونىندەگى تاپسىرماسىن ىسكە اسىرۋ ماقساتىندا مينيسترلىك بىرقاتار شارا قابىلدادى. سۋ نىساندارىن تۇراقتى باقىلاۋمەن اينالىساتىن ءتورت جۇمىس توبى قۇرىلدى, سۋ زاڭناماسىن بۇزعانى ءۇشىن جاۋاپكەرشىلىك كۇشەيتىلىپ, سۋارۋ سۋىن پايدالانۋ ەرەجەلەرى قابىلداندى. قۇقىق قورعاۋ ورگاندارى سۋارۋ سۋىن ءادىل ءبولۋ مەن ونى زاڭسىز پايدالانۋعا قارسى كۇرەستە ماڭىزدى ءرول اتقارادى. مونيتورينگتىك توپتاردىڭ قۇرامىنا قۇقىق قورعاۋ ورگاندارى وكىلدەرىن قوسۋ ولاردىڭ تيىمدىلىگىن ارتتىرادى», دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
ايتا كەتەيىك, 2025 جىلدىڭ 10 ماۋسىمىنان باستاپ سۋارۋ سۋىن پايدالانۋ ەرەجەلەرى زاڭدى كۇشىنە ەنگەن بولاتىن. جاڭا تارتىپكە سايكەس:
- كەلىسىمشارتسىز سۋ تۇتىنعاندار – ءتاريفتىڭ ەكى ەسەلەنگەن مولشەرىندە ايىپپۇل تولەيدى;
- سۋ جەتكىزۋشىنىڭ كەلىسىمىنسىز داقىل ءتۇرىن وزگەرتكەندەر – ءتاريفتىڭ 1,5 ەسەلەنگەن مولشەرىندە ايىپپۇل ارقالايدى.
سونىمەن قاتار, جاڭا سۋ كودەكسى كۇشىنە ەندى. قۇجاتقا سايكەس, باسسەيندىك ينسپەكتسيالارعا جەدەل ارەكەت ەتۋ جانە قاداعالاۋ فۋنكتسيالارى بەرىلدى. سۋ سالاسىنداعى زاڭبۇزۋشىلىقتار ءۇشىن جاۋاپكەرشىلىكتى كۇشەيتەتىن وزگەرىستەر اكىمشىلىك قۇقىق بۇزۋشىلىقتار كودەكسىنە دە ەنگىزىلدى.
