اۋدان اكىمىنىڭ ورىنباسارى بەكسۇلتان اقىلبەك پەن اۋدان اكىمىنىڭ اپپارات باسشىسى ەرجاس توقتاسىنوۆ اۋدان باسشىسىنىڭ اتىنان اۋداندىق پەرزەنتحاناعا ارنايى بارىپ, ءسابي سۇيگەن انالاردى شىن جۇرەكتەن قۇتتىقتادى. قازاقى داستۇرگە ساي پەرزەنتحاناعا قۇرىقول كەلمەگەن اكىمدىك قىزمەتكەرلەرى ۇلتتىق بولمىسىمىزدىڭ سيمۆولىنا اينالعان دومبىرا مەن نارەستەلەرگە ارنالعان ارنايى وراۋ جابدىقتارىن 15 انا مەن ولاردىڭ جاڭا تۋعان سابيلەرىنە سىيعا تارتىپ, زور قۋانىشقا بولەدى.
«بۇل — بولاشاق ۇرپاققا ۇلتتىق ونەر مەن ءداستۇردى سابيلىك كەزەڭنەن باستاپ دارىتۋدى كوزدەگەن يگى باستاما», – دەيدى قۇتتىقتاۋشىلار.
سالتاناتتى شاراعا اۋداندىق ورتالىق اۋرۋحانانىڭ ديرەكتورى المات چورمانوۆ تا قاتىسىپ, جاس انالار مەن مەديتسينا قىزمەتكەرلەرىن مەرەكەمەن قۇتتىقتاپ, جۇرەكجاردى تىلەگىن جەتكىزدى.
شارا شىمىلدىعىن "ۇشقوڭىر" ۇلتتىق فولكلورلىق ءانسامبلىنىڭ ونەرپازدارى اشىپ, اۋەلەتە ورىنداعان اندەرىمەن انالاردىڭ كوڭىلىن شاتتىققا بولەدى.
بيىلعى جىلدىڭ باسىنان بەرى اۋداندا 2 916 ءسابي دۇنيەگە كەلسە, سوڭعى ءبىر ايدا 476 نارەستە ومىرگە كەلگەن. ال بۇگىنگى تاڭنىڭ وزىندە 22 بالا جارىق دۇنيە ەسىگىن اشتى. بۇل — اۋدانىمىزدىڭ ءوسىپ-وركەندەۋىنىڭ, جارقىن بولاشاعىنىڭ ناقتى كورىنىسى.
ۇلت بولاشاعى – ۇرپاق تاربيەسىنەن باستالاتىنىن ەسكەرسەك, وسىنداي يگى شارالار انالارعا رۋحاني دەمەۋ عانا ەمەس, ۇلتتىق قۇندىلىقتاردى ۇلىقتاۋدىڭ جارقىن ۇلگىسى بولماق.
الماتى وبلىسى.
