فوتو: سۋ رەسۋرستارى جانە يرريگاتسيا مينيسترلىگى
سونداي-اق مينيستر سايرام اۋدانىنىڭ ديقاندارىن سۋارمالى سۋمەن قامتاماسىز ەتىپ وتىرعان جوعارعى اقسۋ سۋ تورابىنىڭ جۇمىسىمەن تانىستى. بۇگىندە سۋ تورابىنان سەكۋندىنا 7 تەكشە مەتر سۋ جىبەرىلىپ جاتىر. ن.نۇرجىگىتوۆ سايرام اۋدانىنىڭ ديقاندارىمەن جانە «تۇران سۋ» مەكەمەسىنىڭ قىزمەتكەرلەرىمەن كەزدەستى. ۆەدومستۆو باسشىسىنىڭ ايتۋىنشا تۇركىستان وبلىسىنىڭ ديقاندارىن سۋارمالى سۋمەن تۇراقتى قامتاماسىز ەتۋ ءۇشىن بايدىبەك اتا سۋ قويماسى سالىنىپ جاتىر.
«نىسان قولدانىسقا بەرىلگەننەن كەيىن سايرام اۋدانىندا سۋارمالى سۋمەن قامتۋ ماسەلەسى تولىق شەشىلەدى. دەگەنمەن شارۋالار سۋ ۇنەمدەيتىن جۇيەلەرگە كوشۋى كەرەك. بۇل – زامان تالابى. ەلىمىزدە سۋ ۇنەمدەۋ جۇيەلەرىن ساتىپ الۋ شىعىنى 80%-عا دەيىن وتەلەدى. ۇڭعىما قازۋ ءۇشىن دە 80% سۋبسيديا قاراستىرىلعان. مەملەكەت تاراپىنان قولداۋ بار, ەندى سونى پايدالانۋ كەرەك», دەدى مينيستر.
ن.نۇرجىگىتوۆ سونىمەن قوسا, «سايرام-سۋ» سۋ بوگەتىنە باردى. نىسان سايرام-سۋ وزەنىنىڭ اعىنىن رەتتەپ, وڭ جانە سول جاعالاۋ ماگيسترالدىق كانالدارى ارقىلى 8 760 گەكتار جەردى سۋارمالى سۋمەن قامتاماسىز ەتىپ وتىر جانە «توعىز» سۋ قويماسىنا قوسىمشا سۋ جىبەرەدى.
سۋ رەسۋرستارى جانە يرريگاتسيا مينيسترلىگىنىڭ حابارلاۋىنشا سونداي-اق مينيستر تۇركىستان وبلىسىنىڭ «قازسۋشار» فيليالىنا جاڭا ارنايى تەحنيكالاردىڭ كىلتتەرىن تابىستاۋ راسىمىنە قاتىستى. جالپى العاندا, فيليال 69 تەحنيكا الدى, ونىڭ ىشىندە ەكسكاۆاتور-تيەگىشتەر, شىنجىر تاباندى ەكسكاۆاتورلار, تىركەمەلەر, سۋ تاسىعىشتار, ساموسۆالدار, اۆتوكران, تارتقىش, اسپالى جابدىق, ديزەلدى گەنەراتور جانە ت.ب. بار. فيليالعا جالپى سانى 133 تەحنيكا ءبولىندى, ەندى قالعانى جىل سوڭىنا دەيىن جەتكىزىلەدى.
ەستەرىڭىزگە سالايىق, قازىرگى ۋاقىتتا «قازسۋشار» رمك فيليالدارىن بۇكىل ەل بويىنشا جاڭا جابدىقتارمەن جاراقتاندىرۋ جالعاسىپ جاتىر. بۇگىندە كاسىپورىن فيليالدارى جوسپارلانعان 757 ارنايى تەحنيكا مەن اۆتوكولىكتىڭ 439-ىن العان.
