ادەتتە سەزىم مۇشەلەرىنىڭ ءبىرى ىستەن شىقسا, ونىڭ ورنىنا باسقا قاسيەت ەرەكشە دامىپ, ادامنىڭ بەيىمدەلۋ قابىلەتى ارتا تۇسەتىنى بەلگىلى. «ەكسترابيليتي-2025» ءتۋرنيرىنىڭ ەرەكشەلىگى دە وسى قاعيداتقا نەگىزدەلگەن. وسى جولى قاتىسۋشىلار بوۋلينگتى كوزىن بايلاپ وينادى.
ۇيىمداستىرۋشىلاردىڭ ايتۋىنشا, مۇنداي فورمات قوعامدا ينكليۋزيۆتى جانداردى قولداۋعا جانە «ەكسترابيليتي» ۇعىمىن تەرەڭ تۇسىندىرۋگە باعىتتالعان. قاتىسۋشىلار تەك جەڭىس ءۇشىن ەمەس, ىشكى الەۋەتتى اشۋ ءۇشىن سىنعا ءتۇستى.
تاۋەكەل ناۋرىزباەۆ – ەرەكشە بايقاۋدى وتكىزۋگە مۇرىندىق بولىپ وتىرعان بىرلەستىك مۇشەسى. ول وسىنداي فورماتتاعى ويىن الەمدىك ۇلگىدەگى جەتىلگەن تاجىريبە ەكەنىن ايتادى. ەلىمىزدە بۇل ءۇشىنشى جىل قاتارىنان وتكىزىلىپ وتىر.
«ەكى كوزى كورمەيتىن ادامنىڭ, تۇيسىگى مىقتى بولادى. ەل ىشىندە ءمۇنى «ۇشىنشى كوز» نەمەسى «كوكىرەك كوزى» دەپ جاتادى. ول ءار ادامنىڭ ىشىندەگى بۇعىپ جاتقان قۋات. بوۋلينگتى كوزدى بايلاپ ويناۋ سەزگىرلىكتى, كەڭىستىكتى سەزىنۋدى, زەيىن قويۋدى جانە ەستە ساقتاۋدى ۇيرەتەدى. ەڭ باستىسى زاعيپ جانداردىڭ الەمىنە بويلاپ كورەدى. بۇل قوعامداعى تۇسىنىستىك پەن باۋىرمالدىقتى ارتتىرادى دەپ ەسەپتەيمىز», دەيدى تاۋەكەل ناۋرىزباەۆ.
تۋرنيرگە مەملەكەتتىك مەكەمە قىزمەتكەرلەرى مەن «مۇگەدەك جاستار قوعامى» بىرلەستىگىنىڭ مۇشەلەرى قاتىستى. ءىس-شارا سوڭىندا ۇيىم توراعاسى مۇرات ءابدىمومىنوۆ ويىنشىلارعا العىسىن ءبىلدىرىپ, ۇزدىكتەردى ارناۋلى كۋبوك جانە ديپلومدارمەن ماراپاتتادى.
