پانفيلوۆ اۋدانى ۇلكەنشىعان اۋىلىنىڭ تۇرعىنى تويلىباي دومباعۇلوۆ اتالعان اۋىلداعى ورتا مەكتەپتىڭ تەحنيكالىق جاعدايى سىن كوتەرمەيتىنىن قوزعادى.
ء«بىلىم وشاعى سوناۋ 1982 جىلى سالىنعان. بۇگىندە نىساننىڭ جاعدايى وتە ناشار, وقۋشىلار ءۇشىن اسا قاۋىپتى. توزىعى جەتكەن مەكتەپتە 33 جىل بويى جوندەۋ جۇمىسى جۇرگىزىلگەن جوق. اۋىل تۇرعىندارى تاراپىنان ارىز-شاعىم ءجيى ايتىلادى. كۇردەلى جوندەۋ جۇرگىزۋگە قاجەت جوبالىق سمەتالىق قۇجات پەن ساراپتاما دايىندالىپ جاتىر. وسىعان بايلانىستى, جوندەۋ جۇمىسىنا قاجەت قاراجاتتىڭ بولىنۋىنە ىقپال ەتۋىڭىزدى سۇرايمىن», دەدى ول.
بۇل رەتتە رۋسلان قوجاسباەۆ كەيىنگى 3 جىلدا وڭىردە ءبىلىم بەرۋ سالاسىنا قاتىستى 20 نىسان سالىنعانىن جانە ولاردىڭ 15-ءى ءبىلىم وشاعى ەكەنىن ايتىپ, ۇلكەنشىعان اۋىلىنداعى مەكتەپتىڭ قازىرگى جاعدايى دا نازاردان تىس قالمايتىنىن جەتكىزدى.
ال تالدىقورعان قالاسىنىڭ تۇرعىنى – ءبىرىنشى توپ مۇگەدەگى گۇلنارا مۇحامەتجانوۆا «وتباسى بانك» اق ارقىلى ءبىر بولمەلى پاتەرگە ماقۇلداۋ العانىن, الايدا باسپاناسى ونىڭ ەرەكشە قاجەتتىلىگىنە ساي كەلمەيتىنىن ايتتى.
ءوز كەزەگىندە دەپۋتات بىلتىر «AMANAT» پارتياسىنىڭ «كەدەرگىسىز كەلەشەك» جوباسى اياسىندا ەل اۋماعىنداعى الەۋمەتتىك جانە كولىك ينفراقۇرىلىمى نىساندارىنىڭ مۇمكىندىگى شەكتەۋلى ازاماتتارعا قولجەتىمدىلىگىن قامتاماسىز ەتۋگە تالداۋ جۇرگىزىلگەنىن حابارلادى. سونىڭ اياسىندا 4,8 مىڭ ينفراقۇرىلىم نىسانى مەن 1,6 مىڭ قوعامدىق كولىكتى قامتىعان 2,3 مىڭنان استام رەيدتىك ءىس-شارا ۇيىمداستىرىلعان. ناتيجەسىندە 1040 زاڭ بۇزۋشىلىق انىقتالىپ, ولاردى جويۋ بويىنشا ءتيىستى مەكەمەلەرگە ۇسىنىستار جىبەرىلگەن. دەپۋتات بۇل باعىتتاعى جۇمىس الداعى ۋاقىتتا دا جالعاسا بەرەتىنىن جەتكىزدى.
ءوڭىر تۇرعىندارى قاراتال اۋدانى تاستوبە اۋىلى ماڭىنداعى قاراتال وزەنىنىڭ ارناسىن تازالاۋ, بوگەتتى قالپىنا كەلتىرۋ, جەدەل جاردەم جۇرگىزۋشىلەرىنىڭ جالاقىسىن كوتەرۋ, ورتا بۋىن مەديتسينا قىزمەتكەرلەرىنىڭ الەۋمەتتىك جاعدايىن جاقسارتۋ, جاستاردى باسپانامەن قامتاماسىز ەتۋ سياقتى ماسەلەلەردى دە كوتەردى.
ءماجىلىستىڭ ءباسپاسوز قىزمەتىنىڭ مالىمەتىنشە ر.قوجاسباەۆ ەل اۋماعىندا ازاماتتىق قىزمەتشىلەردىڭ جەكەلەگەن ساناتتارىنىڭ جالاقىسى 20 پايىزعا ارتقانىن ايتتى. سونداي-اق بيىل العاشقى التى ايدا «AMANAT» پارتياسىنىڭ «تازا بەيسەنبى» اكتسياسى شەڭبەرىندە ەلىمىزدىڭ بارلىق وڭىرىندەگى 600-دەن استام لاستانعان اۋماق – ساياباقتار, سكۆەرلەر, وزەن-كول جاعالاۋلارى, تاريحي-مادەني نىساندار تازارتىلعانىن مالىمدەدى. اكتسياعا 14 مىڭعا جۋىق ادام قاتىسىپ, 2 مىڭ توننادان استام قوقىس جينالىپ, قايتا وڭدەۋگە جىبەرىلگەن.
«بىلتىر «AMANAT» پارتياسىنىڭ سايلاۋالدى باعدارلاماسى اياسىندا وڭىردە 19 362 ادام تۇراقتى جۇمىسقا ورنالاستىرىلدى. وبلىس اۋماعىندا 363,2 مىڭ شارشى مەتر تۇرعىن ءۇي پايدالانۋعا بەرىلدى. بۇعان قوسا 101,7 مىڭ گەكتار جەر مەملەكەت مەنشىگىنە قايتارىلدى. ال كۇنى كەشە اقسۋ اۋدانىنا قاراستى كولتابان اۋىلىنا بارىپ, 120 ورىندىق جاڭا مەكتەپتىڭ قۇرىلىس جۇمىسىمەن تانىستىم. مەكتەپ قۇرىلىسى 2023-2024 جىلدارى قارجىلاندىرۋدىڭ بولماۋىنا بايلانىستى ۋاقىتشا توقتاپ قالعان ەدى. بيىل رەسپۋبليكالىق بيۋدجەتتەن 1,9 ملرد تەڭگە ءبولىنىپ, جۇمىس قايتا جانداندى. قازىر نىساننىڭ 63 پايىزى دايىن. مەكتەپ عيماراتىندا 25 بۇلدىرشىنگە ارنالعان شاعىن ورتالىق تا بولادى. جوسپارعا سايكەس مەكتەپ بيىل قازان ايىندا پايدالانۋعا بەرىلەدى», دەدى دەپۋتات.
ايتا كەتەلىك, رۋسلان قوجاسباەۆ جەتىسۋ وبلىسىنا ساپارى اياسىندا اقسۋ اۋداندىق ورتالىق اۋرۋحانا عيماراتىنىڭ قۇرىلىس جۇمىسىن دا نازارعا الدى. اتالعان جوبانىڭ جالپى قۇنى – 1,7 ميلليارد تەڭگە. بۇل قاراجات دەپۋتاتتىڭ تىكەلەي ارالاسۋىمەن رەسپۋبليكالىق بيۋدجەتتەن ءبولىندى. وسىلايشا, بيىل ءساۋىر ايىندا مەردىگەرگە 300 ميلليون تەڭگە قارجى اۆانس رەتىندە اۋدارىلىپ, قۇرىلىس قايتا جانداندى. قالعان قاراجات كەزەڭ-كەزەڭىمەن بولىنەدى.
