بۇگىندە مودۋلدىك ءۇي قۇراستىرۋ الەمنىڭ كوپتەگەن ەلىندە بەلسەندى جۇزەگە اسقان. مىسالى, قىتايدىڭ شەنچجەن قالاسىنداعى «Tencent» كەڭسە ورتالىعى, «CitizenM Tower of London» قوناقۇيى, كانادانىڭ مونرەال قالاسىنداعى «Habitat» 67 تۇرعىن ءۇي كەشەنى – مودۋلدىك عيماراتتاردىڭ جارقىن كورىنىسى.
وسىنداي نەگىزگە قۇرىلعان ۋنيۆەرسيتەتتىڭ ينجەنەرلىك توبى جوبالاعان نىساندار تەمىربەتون مودۋلمەن سالىستىرعاندا 10 ەسە جەڭىل, جۇمىس كۇشىن 5 ەسە از قاجەت ەتەدى. سەيسميكالىق قاۋىپسىز جوبا كانىگى قۇرىلىستان 2 ەسە قالتاعا قونىمدى. جوبا جەتەكشىسى, قازاقستاننىڭ قۇرمەتتى قۇرىلىسشىسى ەرىك تۇراش ۇلىنىڭ ايتۋىنشا, مودۋلدىك ءۇيدى كەز كەلگەن ورىنعا وڭاي ورنالاستىرۋعا بولادى.
«تەحنيكالىق سيپاتتاماسى تالاپقا ساي مودۋلدىك ۇيلەردىڭ پىشىنىنە دە تاڭداۋ كوپ. ماسەلەن, سۇرانىسقا ساي قوعامدىق عيماراتتاردى, ساۋدا نىساندارىن, تۋريستەر تۇراقتايتىن ورىنداردى شەڭبەر, دوعا, ءۇشبۇرىش فورمادا دا قۇراستىرۋ ويلاستىرىلعان. ءبىز بۇل ءۇيدى شاكىرتتەرىممەن بىرگە ۋنيۆەرسيتەت اۋلاسىندا قۇراستىردىق. قازىر جاڭا جۇيەمەن سالىنعان نىسان ستۋدەنتتەردىڭ دەمالاتىن, شىعارماشىلىقپەن اينالىساتىن الاڭىنا اينالعان», دەپ ءسوز ساباقتاعان ساتباەۆ ۋنيۆەرسيتەتىنىڭ پروفەسسورى جوبا, اسىرەسە تۋريزم سالاسىن تۇلەتۋگە سەرپىن بەرەتىنىن اتاپ ءوتتى. «ەلىمىزدىڭ تابيعاتى – كوپ قىرلى. تاۋ, شاتقال, جەر بەدەرىنەن بىرنەشە شاقىرىم تومەن ورانالاسقان كورىكتى مەكەندەر كوپ. سونداي ورىندارعا تۋريستەردى تارتۋ ءۇشىن جايلى ورىن بولۋى ماڭىزدى. ءبىزدىڭ جوبا وسى ماسەلەنى از شىعىنمەن شەشە الادى. ارنايى تسەحتا دايىندالعان تەمىر قاڭقالاردى تەحنيكامەن جەتكىزۋ دە جەڭىل ءارى وڭاي قۇراستىرىلادى. سونىمەن بىرگە ماۋسىمدىق ساياحات كەزىندە بوس قالسا سۋ تاسقىنى, وزگە دە توتەنشە جاعدايدا قابىلداۋ پۋنكتتەرىنىڭ قىزمەتىن اتقارا الادى. سەبەبى جوبادا ينفراقۇرىلىمدىق, ءومىر سۇرۋگە قاجەتتى بولىكتەر ەسكەرىلگەن», دەدى ەرىك تۇراش ۇلى.
ەكى جەتەكشى مەن 11 ستۋدەنت قۇراستىرعان مودۋلدىك ءۇي جوباسىن قازاق باس ساۋلەت-قۇرىلىس اكادەمياسىنىڭ ماماندارى دا جوعارى باعالاعان. ىزدەنۋشىلەر باستاماسى قىرعىزستانداعى عىلىمي بايقاۋدا دا جۇلدە ەنشىلەدى. جوبانىڭ وزگە دە ۇتىمدى تۇسىن ۋنيۆەرسيتەتتىڭ 3-كۋرس ستۋدەنتى ماديار شرازدين ايتىپ بەردى.
«جوبا يدەياسى بىلتىر تۋدى. ۇستازدارىمىز ەرىك تۇراش ۇلى مەن قازاقستاننىڭ قۇرمەتتى ارحيتەكتورى سەرىك سىزدىق ۇلى ويىمىزدى بىردەن قۋاتتادى. جۇمىس بارىسىندا تاجىريبەلەرىمەن ءبولىسىپ, كەمشىلىگىمىزدى كۇزەپ-تۇزەدى. سونىڭ ناتيجەسىندە ەكولوگيالىق تازا, ءموبيلدى جوبامىزدى ىسكە اسىردىق. ءمودۋلدى ءۇي ءبىر قاباتپەن شەكتەلمەيدى. جوبالاۋ بارىسىندا ماتەريالدى ءوزارا الماستىرۋ, قاجەتتىلىك تۋعاندا دايىن ءۇيدىڭ قاپتالىنان, جوعارىدان بلوك قوسۋ مۇمكىندىگى قاراستىرىلعان», دەدى بولاشاق ينجەنەر.
ەندى توپ مۇشەلەرى جوبانىڭ اۋقىمىن كەڭەيتىپ, شەتەلگە شىعارۋدى كوزدەپ وتىر. عالامدىق سۇرانىس تامىرىن باسىپ وتىرعان ستۋدەنتتەر مودۋلدىك ءۇي جوباسى حالقى تىعىز ورنالاسقان افريكا ەلدەرىندەگى دە باسپاناعا قاجەتتىلىكتى بيۋدجەت تۇرعىسىنان ءتيىمدى شەشۋگە بولاتىنىن تىلگە تيەك ەتتى.
