فەستيۆالعا باتىس قازاقستان وبلىسىنىڭ اۋداندارىنان بولەك, ماڭعىستاۋ مەن اتىراۋ وبلىستارىنان دا حالىق تەاترى ۇجىمدارى ارنايى كەلدى. ونەر سايىسىنا قاتىسۋشى ۇجىمدارعا تاريحي توپىراقتا ەرەكشە قۇرمەت كورسەتىلدى. قوناقتار سىرىم دات ۇلى اتىنداعى تاريحي-ولكەتانۋ مۋزەيىن ارالاپ, ەل مەن جەردىڭ تاريحىمەن جاقىن تانىستى. اسىرەسە قادىر اقىننىڭ بالا كۇنگى مەكەنى, ولەڭگە العاش ەلەڭدەگەن شاعى تۋرالى تىڭ دەرەكتەرمەن تانىسىپ, ءومىرى مەن ونەرىنە قاتىستى مالىمەتكە قانىقتى. اۋدان ورتالىعىنداعى قادىر ەسكەرتكىشىنە تاعزىم ەتىپ, گۇل شوقتارىن قويدى.
– بۇگىن قادىر اعامىزدىڭ ءانى كومپوزيتسياعا, ءسوزى قويىلىمعا اينالىپ, ساحنا تورىندە سويلەيدى. قازاق بار جەردە – قادىر بار. قادىر بار جەردە – قازاقتىڭ رۋحى بار. سىزدەردىڭ جاساپ جاتقان ەڭبەكتەرىڭىز – ۇلت رۋحانياتىنا قوسقان شىنايى ۇلەس, – دەدى مەيمانداردى قارسى العان سىرىم اۋدانى اكىمىنىڭ ورىنباسارى سەرىك توقمامبەتوۆ.
ونەر سايىسىنا بارلىعى 11 ۇجىم – حالىق تەاترلارى قاتىستى. ولار جىمپيتى ساحناسىندا ونەر كورسەتىپ, حالىققا رۋحاني دەمالىس سىيلادى. ونەرىن قازاقستاننىڭ ەڭبەك سىڭىرگەن ءارتىسى, «پاراسات» وردەنىنىڭ يەگەرى سەردەش قاجىمۇراتوۆ باستاعان قازىلار القاسى باعالاپ وتىردى.
فەستيۆال ناتيجەسىندە, تاسقالا اۋدانىنىڭ حالىق تەاترى باس جۇلدەگە يە بولدى. ءى ورىنعا – سىرىم اۋدانى بۇلان اۋىلىنىڭ حالىق تەاترى, ءىى ورىنعا – تەرەكتى اۋدانىنىڭ «دات» حالىق تەاترى, ءىىى ورىنعا – قازتالوۆ اۋدانى, جالپاقتال اۋىلىنىڭ م.عۇماروۆ اتىنداعى حالىق تەاترى لايىق دەپ تانىلدى.
– حالىق تەاترى ۇجىمدارى قادىر اقىننىڭ شىعارمالارى بويىنشا شاعىن سيۋجەتتى وزدەرى قۇراستىرىپ, كومپوزيتسيا تۇرىندە كورەرمەنگە ۇسىندى. اقىن ولەڭدەرى, اقىننىڭ سوزىنە شىعارىلعان اندەر بارىنشا پايدالانىلدى. 20-25 مينۋتتىق قويىلىمعا بارىنشا دايىندالىپ, ارنايى دەكوراتسيا قۇرىپ, جاڭا فورماتتىڭ ءمانىن ءتۇسىنىپ كەلگەن ۇجىمدار دا بولدى. قازىلار القاسىنا بارلىق ۇجىمنىڭ ونەرىن ءبىر كۇن ىشىندە كورىپ, باعالاپ بەرۋ وڭاي بولمادى, – دەيدى سەردەش قاجىمۇراتوۆ.
باتىس قازاقستان وبلىسى
