تاۋەلسىزدىك جىلدارىندا ءتىل مەن رۋحتىڭ تۋىن تىك ۇستاعان ساناۋلى قايراتكەرلەردىڭ ءبىرى – اقىن مۇحتار شاحانوۆ. قازاق قوعامىندا ول ءوزىن تەك قالام يەسى رەتىندە عانا ەمەس, ۇلتتىق قۇندىلىقتاردىڭ قورعاۋشىسى, رۋح مايدانىنىڭ الدىڭعى شەبىندە جۇرگەن تۇلعا رەتىندە تانىتا ءبىلدى.
مەملەكەت ءۇشىن ماڭىزى زور بىرنەشە جاۋاپتى لاۋازىمداردا ەڭبەك ەتكەن ول – قازاقستان پارلامەنتى ءماجىلىسىنىڭ دەپۋتاتى, سونداي-اق قىرعىز رەسپۋبليكاسىنداعى توتەنشە جانە وكىلەتتى ەلشى قىزمەتتەرىن ابىرويمەن اتقاردى.
اقىننىڭ شىعارماشىلىق جولى دا قازاق ادەبيەتىنىڭ كەڭىستىگىندە وزىندىك ورنەك قالدىردى. كوپ جىلدار بويى «جالىن» جۋرنالىنا جەتەكشىلىك ەتىپ, ادەبيەتتىڭ جاڭا بۋىنىنا جول اشىپ, رۋحاني كەڭىستىكتىڭ تىنىسىن كەڭەيتۋگە زور ۇلەس قوستى.
مۇحتار شاحانوۆ – مازمۇنى تەرەڭ, تاقىرىبى اۋقىمدى, فورماسى دارا تۋىندىلارىمەن وقىرمان جۇرەگىنە جول تاپقان اقىن. ونىڭ «وتىراردىڭ كۇيرەۋى», «ەۆەرەستكە شىعۋ», «عاشىقتىق عالاماتى», «ەركەكتەر جىرى», «سۇلۋلىقتى سەزىنۋ نەمەسە عابيدەن مۇستافينمەن قارتتىق جايلى اڭگىمە», «12-3=؟», «ارمان», «شىڭ باسىنداعى وقيعا», «دوستىق ولكەسىنىڭ زاڭى», «جىگەرلەندىرۋ نەمەسە ءوزىن باقىتسىزبىن دەپ ەسەپتەگەن جىگىتكە جاۋاپ», «تج-لار», ء«تورت انا», «كوسموپوليت قازاقتار» سىندى ولەڭ-داستاندارى ۇلتتىق پوەزيانىڭ مازمۇندىق-يدەيالىق كوكجيەگىن كەڭەيتكەن شىعارمالار قاتارىندا.
ايتا كەتەيىك, ۇلىتاۋدا وتكەن العاشقى ۇلتتىق قۇرىلتايدا ۇلت رۋحانياتى مەن ادەبيەتىنە سىڭىرگەن ولشەۋسىز ەڭبەگى, سونداي-اق تۇركى حالىقتارىنىڭ رۋحاني تۇتاستىعىن ناسيحاتتاۋداعى بەلسەندى قىزمەتى ەلەنىپ, مۇحتار شاحانوۆقا قازاقستاننىڭ ەڭبەك ەرى اتاعى بەرىلدى.
