قايىرجان حاسانوۆ اتىنداعى الاش جانە تاريحي-ولكەتانۋ مۋزەيىندە وتكەن ءىس-شارا قازاقتىڭ ءتول اسپابى – دومبىرانى ۇلىقتاعان تاعىلىمدى كەزدەسۋ بولدى. بايقاۋدى قاراتوبە اۋداندىق مادەنيەت ءۇيى, «ىزگىلىك» قوعامدىق بىرلەستىگى, «ايەلدەر» قوعامدىق بىرلەستىگى جانە قاراتوبە جاستار رەسۋرستىق ورتالىعى ۇيىمداستىردى.
– دومبىرا حالقىمىزدىڭ جانى, رۋحى, شەجىرەسى. ونىڭ ءۇنى ارقىلى ەلدىڭ تاريحى, جۇرەگى, ارمانى سويلەيدى. بۇگىنگى بايقاۋ تەك ونەر جارىسى ەمەس, بۇل – ۇلتتىڭ وتكەنى مەن بۇگىنى اراسىنداعى رۋحاني كوپىر. ءبىزدىڭ مىندەت وسىنداي شارالار ارقىلى جاستاردىڭ بويىندا ۇلتتىق ونەرگە دەگەن قۇرمەتتى, سۇيىسپەنشىلىكتى قالىپتاستىرۋ. قازاقتىڭ قانىنا سىڭگەن كۇي مەن اۋەن تەك ەستەلىك ەمەس, ول ومىرشەڭ ونەگە. الاش مۋزەيىنىڭ بۇل باستاماسى قۇپتارلىق ءارى قولداۋعا لايىق ءىس, - دەدى ءىس-شارانىڭ اشىلۋ سالتاناتىندا قۇتتىقتاۋ ءسوز سويلەگەن قاراتوبە اۋدانىنىڭ اكىمى قادىرجان سۇيەۋعاليەۆ.
بايقاۋعا قاتىسقان ونەرپازدار بۇعان دەيىن ۇلكەن ساحنادا ونەر كورسەتپەسە دە اۋىل-ايماق اراسىندا تانىلىپ جۇرگەن انشىلەر ەكەن. ولار ورىنداعان حالىق اندەرى كورەرمەننىڭ جۇرەگىنە جول تاۋىپ, شىنايى ىقىلاسقا بولەندى.
ونەر سايىسىنىڭ ناتيجەسىندە ءبىرىنشى جۇلدە ەگىندىكولدىك قاماجاي يزبانوۆاعا بۇيىردى. ەكىنشى ورىنعا – اققوزىلىق اقجان ايتقالي يە بولسا, ءۇشىنشى ورىندى ۇشاعاشتىق ءمارۋاش ەلەشوۆا الىپ كەتتى. قاراتوبەلىك گۇلارا قايىرجانقىزى «كورەرمەن كوزايىمى» اتاندى. بارلىق جۇلدەگەر اقشالاي سىيلىققا يە بولدى.
باتىس قازاقستان وبلىسى
