فوتو: pixabay.com
جاۋاپتى مينيسترلىك – ەڭبەك جانە حالىقتى الەۋمەتتىك قورعاۋ مينيسترلىگى بۇل ماسەلە بويىنشا رەسمي تۇسىنىكتەمە بەردى. مينيسترلىككە قاراستى حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ مالىمەتىنشە, ەلىمىزدىڭ زاڭناماسىنا سايكەس, ەگەر زەينەتاقى الۋشىنىڭ بانكتىك شوتىندا ءۇش اي قاتارىنان ەشقانداي وپەراتسيا جۇرگىزىلمەسە, ياعني شوت قوزعالىسسىز قالسا, وندا تولەمدەر كەلەسى ايدىڭ باسىنان باستاپ ۋاقىتشا توقتاتىلادى.
مۇنداي وپەراتسيالار قاتارىنا كەز كەلگەن شىعىس قوزعالىسى – دۇكەندە كارتا ارقىلى تولەم جاساۋ, باسقا شوتقا اقشا اۋدارۋ نەمەسە قولما-قول شەشىپ الۋ كىرەدى. بۇل تالاپ زەينەتاقى قاراجاتىن ۇنەمدەۋگە باعىتتالعان ەمەس, كەرىسىنشە, قارجى يەسىنىڭ قاۋىپسىزدىگىن قامتاماسىز ەتۋ ءۇشىن قابىلدانعان.
«كەي جاعدايلاردا ازاماتتار شوتقا قول جەتكىزۋ مۇمكىندىگىنەن ايىرىلىپ قالۋى مۇمكىن. بۇل كەزدە ءۇشىنشى تۇلعالار اقشاعا يە بولىپ كەتۋ قاۋپى تۋىندايدى. سوندىقتان مۇنداي نورمالار تولەم الۋشىنىڭ مۇددەسىن قورعاۋ ماقساتىندا ەنگىزىلگەن», دەلىنگەن مينيسترلىك حابارلاماسىندا.
ەگەر زەينەتاقى تولەمى توقتاتىلاتىن بولسا, زەينەتكەرگە بۇل تۋرالى ارنايى ەسكەرتۋ قازپوشتا ارقىلى جولدانادى. تولەمدى قايتا جالعاستىرۋ ءۇشىن الۋشى حالىققا قىزمەت كورسەتۋ ورتالىعىنا بارىپ, ءتيىستى ءوتىنىش بەرۋى كەرەك.
ەسكە سالا كەتەيىك, بۇعان دەيىن ەڭبەك مينيسترلىگى ءبىلىم بەرۋ سالاسىنداعى زاڭسىزدىقتار جونىندە دە كەڭ كولەمدى تەكسەرىستەر جۇرگىزگەنىن حابارلاعان بولاتىن. وسى تەكسەرۋلەردىڭ ناتيجەسىندە سوڭعى بەس-التى جىلدا ءبىلىم جۇيەسىندە 18 ميلليارد تەڭگەگە جۋىق قاراجاتتىڭ جىمقىرىلعانى انىقتالعان ەدى.
زەينەتاقى ماسەلەسى – ءاربىر ەل ازاماتىنىڭ الاڭدايتىن سالاسى. سوندىقتان بۇل باعىتتاعى ءتۇسىندىرۋ جۇمىستارى بارىنشا ناقتى, اشىق ءارى تۇسىنىكتى جۇرگىزىلۋى ءتيىس. ۋاقىتشا توقتاۋ – تولەمنەن باس تارتۋ ەمەس. الايدا بانك شوتىڭىزدا ۇزاق ۋاقىت بويى ەش قوزعالىس بولماسا, تولەم ۋاقىتشا كىدىرتىلەتىنى ەستە بولعانى ءجون.
