قازاقستان جازۋشىلار وداعىنىڭ ءباسپاسوز قىزمەتى ءۇش كونكۋرسقا دا قۇجاتتار قابىلداۋ باستالعانىن مالىمدەپ, بارشا قالامگەرلەردى جوباعا قاتىسۋعا شاقىردى. «جازۋشىلاردىڭ ادەبي شەبەرلىك مەكتەبى» اتتى ءبىرىنشى جوبا بويىنشا, ەلىمىزدىڭ بارلىق اۋماعىندا تۇراتىن جاس قالامگەرلەر (18-35 جاسقا دەيىن) ءوتىنىم بەرە الادى. ءوتىنىم بەرۋشى قازاقستان جازۋشىلار وداعىنىڭ مۇشەسى بولۋى مىندەتتى ەمەس.
وسى جوبا اياسىندا جاس قالامگەرلەر قازاقستان جازۋشىلار وداعىنىڭ جانىنداعى «جازۋشىلاردىڭ ادەبي شەبەرلىك مەكتەبىنە» 10 كۇندىك وقۋعا كەلىپ, تالىمگەرلەر شەتەلدىك جانە وتاندىق تانىمال قالامگەرلەردەن ءدارىس الادى. ادەبي شەبەرلىك مەكتەبىنە قاتىسۋشى جاس قالامگەرلەردىڭ جولى, تاماعى جانە جاتىن ورنى قازاقستان جازۋشىلار وداعى تاراپىنان تولەنەدى. جوبا سوڭىندا ءار جاس قالامگەرگە ارنايى كۋرستان وتكەنى تۋرالى سەرتيفيكات بەرىلەدى.
ال, «جاڭا قازاقستاننىڭ ادەبي-تانىمدىق پانوراماسى» اتتى ەكىنشى جوباعا دا ەلىمىزدىڭ بارلىق اۋماعىندا تۇراتىن جاس قالامگەرلەر (18-35 جاسقا دەيىن) قاتىسۋعا قۇقىلى. بۇل جوبا بويىنشا دا ۇمىتكەر قازاقستان جازۋشىلار وداعىنىڭ مۇشەسى بولۋى مىندەتتى ەمەس. جاس قالامگەرلەر جازاتىن تۋىندىسىنا اقپارات جيناۋ ءۇشىن ەلىمىزدىڭ ءار ءوڭىرىن ارالاپ, ولكەنىڭ تاريحى, مادەنيەتى مەن بۇگىنگى تىنىس-تىرشىلىگىمەن تانىسادى. قالامگەردىڭ ءىسساپار شىعىنى مەن قالاماقىسى ۇيىمداستىرۋشىلار تارابىنان تولەنىپ, جازعان تۋىندىسى كىتاپ بولىپ جارىق كورەدى.
ءۇشىنشى جوبانىڭ اتاۋى – «تمد ەلدەرىنىڭ ارحيۆتەرىندەگى قازاقستاندىق جازۋشىلاردىڭ زەرتتەۋ جۇمىستارى». جوباعا قاتىسۋعا ەلىمىزدىڭ بارلىق اۋماعىندا تۇراتىن جازۋشىلار ءوتىنىم بەرە الادى. جاسقا شەكتەۋ قويىلمايدى. باستى تالاپ ءوتىنىم بەرۋشى قازاقستان جازۋشىلار وداعىنىڭ مۇشەسى بولۋى مىندەتتى.
جوبا اياسىندا قالامگەر تمد ەلدەرىنىڭ ارحيۆتەرىنە بارىپ, ەلىمىزدىڭ مادەنيەتى مەن ادەبيەتىنە قاتىسى بار مۇراعاتتىق ماتەريالداردى تاۋىپ, زەرتتەۋلەر جۇرگىزەدى, مۇراعات ماتەريالدارى نەگىزىندە عىلىمي-تانىمدىق, عىلىمي-زەرتتەۋ نەمەسە وچەرك سيپاتىنداعى كىتاپتار نەمەسە ارحيۆتىك ماتەريالدار جيناقتارىن شىعارادى.
