فوتو: مەملەكەتتىك باسقارۋ اكادەمياسىنىڭ ءباسپاسوز قىزمەتى
2024–2025 وقۋ جىلىندا مەملەكەتتىك باسقارۋ اكادەمياسىندا 109 ماگيسترانت پەن 4 دوكتورانت ءساتتى ديپلوم قورعاپ, وقۋىن ءتامامدادى.
سالتاناتتى ديپلوم تاپسىرۋ ءراسىمىنىڭ اشىلۋىندا مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي تۇلەكتەرگە اق جول تىلەپ, مەملەكەتتىك قىزمەت جۇيەسىندە جۇرگىزىلىپ جاتقان رەفورمالار تۋرالى ايتتى.
ونىڭ ايتۋىنشا, پرەزيدەنت قاسىم-جومارت توقاەۆتىڭ تاپسىرماسى بويىنشا قابىلدانىپ جاتقان وزگەرىستەر اياسىندا اكادەميانى ۇزدىك بىتىرگەن تۇلەكتەر ەندى وڭىرلىك دەڭگەيدەگى باسشىلىق قىزمەتتەرگە كونكۋرستان تىس تاعايىندالا الادى.
اكادەميا رەكتورى ازامات جولمانوۆ تۇلەكتەردى قۇتتىقتاپ, جىلى لەبىزىن ءبىلدىردى.
سونداي-اق تۇلەكتەرگە ديپلوم تابىستاۋ ءۇشىن ارنايى قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى الىبەك اسەت ۇلى باقاەۆ, قازاقستان رەسپۋبليكاسىنىڭ ۇلتتىق ەكونوميكا ۆيتسە-ءمينيسترى اسان كوبەنتاي ۇلى دارباەۆ شاقىرىلدى.
اكادەميادا «مەملەكەتتىك ساياسات» ءبىلىم بەرۋ باعدارلاماسى بويىنشا ماگيستراتۋرانى تامامداعان ايسانا راحيموۆا وڭىرىنە ورالىپ, مەملەكەتتىك قىزمەتتەگى ەڭبەگىن جالعاستىرماق.
«بۇگىن ءبىز ءۇشىن قۋانىشتى, ەرەكشە كۇن. اكادەميا باسشىلىعىنا, پروفەسسورلىق-وقىتۋشىلىق قۇرامىنا ءبىلىم الۋشىلارعا بەرگەن زور مۇمكىندىگى ءۇشىن مىڭ العىس. ەندى پاۆلودار وڭىرىنە ورالىپ, قىزمەتىمدى جالعاستىرماقپىن», دەدى اكادەميا تۇلەگى.
اتاپ وتەيىك, پرەزيدەنت جانىنداعى مەملەكەتتىك باسقارۋ اكادەمياسىنا 2025-2026 وقۋ جىلىنا ماگيستراتۋراعا جانە دوكتورانتۋراعا وقۋعا قۇجات قابىلداۋ وسى جىلدىڭ 25 ماۋسىمىنا دەيىن جۇرگىزىلدى. جاڭا وقۋ جىلىنا مەملەكەتتىك قىزمەتشىلەر ءۇشىن 132 گرانت (ماگيستراتۋراعا – 120, دوكتورانتۋراعا – 12) ءبولىندى.
