فوتو: ۇكىمەتتىڭ ءباسپاسوز قىزمەتى
«جالپى ەكونوميكالىق جاعداي تۇراقتى. الايدا جىلدار بويى قوردالانعان ماسەلەلەر دە جوق ەمەس. ۇكىمەت ولاردى شەشۋ ءۇشىن جۇيەلى جۇمىس اتقارىپ جاتىر», دەدى ۇكىمەت باسشىسى دەپۋتات ەرلان سايروۆتىڭ ساۋالىنا جاۋاپ بەرە وتىرىپ.
بەكتەنوۆ اتاپ وتكەندەي, قازىرگى تاڭدا ەلىمىزدە سالىق رەفورماسى جۇرگىزىلىپ جاتىر. جاڭا قابىلدانعان سالىق كودەكسى كەلەسى جىلدان باستاپ رەسپۋبليكالىق بيۋدجەتكە شامامەن 3 ترلن تەڭگەدەن استام قوسىمشا ءتۇسىم اكەلەدى دەپ كۇتىلەدى.
«بۇل قارجىنىڭ بارلىعى تەك دامۋ ماقساتتارىنا – ينفراقۇرىلىم, ەلەكتر قۋاتى, كولىك جەلىلەرى مەن ينجەنەرلىك ينفراقۇرىلىمدى جاڭعىرتۋعا باعىتتالادى. بۇل – ۇزاق مەرزىمدى ءارى تۇراقتى ەكونوميكالىق ءوسىمنىڭ نەگىزى», دەدى ولجاس بەكتەنوۆ.
پرەمەر-ءمينيستردىڭ ايتۋىنشا, ۇكىمەت جۇرگىزىپ جاتقان شارالاردىڭ ناتيجەسىندە سالىق بازاسى كەڭەيىپ, رەسپۋبليكالىق بيۋدجەتكە قوسىمشا تۇسىمدەر تۇسەدى. بۇل مەملەكەتكە الەۋمەتتىك جانە ەكونوميكالىق مىندەتتەمەلەردى تولىق ورىنداۋعا مۇمكىندىك بەرەدى.
سونىمەن قاتار, بەكتەنوۆ 2026–2028 جىلدارعا ارنالعان رەسپۋبليكالىق بيۋدجەت جوباسىن ازىرلەۋ بارىسىندا بيۋدجەت تاپشىلىعىن تومەندەتۋ بويىنشا ناقتى مەجەلەر قويىلعانىن ايتتى:
- 2026 جىلى – تاپشىلىق ءىجو-ءنىڭ 2,5%-ىنا دەيىن;
- 2027 جىلى – 1,8%-عا دەيىن;
- 2028 جىلى – 1,4%-عا دەيىن قىسقارماق.
«بيۋدجەت ءتارتىبىن كۇشەيتىپ, تابىس كوزدەرىن ۇلعايتۋ ارقىلى ءبىز الداعى ءۇش جىلدا بيۋدجەت تاپشىلىعىن ەكى ەسەگە جۋىق تومەندەتۋدى جوسپارلاپ وتىرمىز», دەپ تۇيىندەدى ءسوزىن ۇكىمەت باسشىسى.
