مەملەكەت باسشىسىنىڭ 2019 جىلعى 14 مامىرداعى ايماققا جۇمىس ساپارىندا ۇكىمەت پەن وبلىس اكىمدىگىنە «كوكارال» بوگەتىن قالپىنا كەلتىرۋ ءۇشىن شۇعىل شارالار قابىلداۋدى تاپسىرعان بولاتىن. وسىعان بايلانىستى «كوكارال بوگەتىن ساقتاپ قالۋ جانە سىرداريا وزەنىنىڭ اتىراۋىن قالپىنا كەلتىرۋ» جوباسىنىڭ جوبا-سمەتالىق قۇجاتتاماسى ازىرلەنىپ, مەملەكەتتىك ساراپتامادان وڭ قورىتىندى الىندى. جالپى قۇنى 4,5 ملرد تەڭگە بولاتىن جوبا بويىنشا تاپسىرىس بەرۋشى – قر سۋ رەسۋرستارى جانە يرريگاتسيا مينيسترلىگى, مەردىگەرى – «قازسۋشار» رمك قىزىلوردا فيليالى.
2022-2026 جىلدار ارالىعىن قامتيتىن جوبا اياسىنداعى جۇمىستار كەزەڭ-كەزەڭىمەن قارجىلاندىرىلىپ كەلەدى. جوندەۋ بارىسىندا زاقىمدالعان بوگەت قالپىنا كەلتىرىلىپ, «قاراشالاڭ» كولى ارقىلى تەڭىزگە ەكى ارنا جانە «تۇششى» كولى ارقىلى ءبىر ارنا قازۋ جوسپارلانعان. بۇل كىشى ارال تەڭىزىنىڭ وڭتۇستىك بولىگىندە تۇراقتى سۋ اينالىمىن قالىپتاستىرۋعا مۇمكىندىك بەرەدى.
اتالعان ءىرى ەكولوگيالىق جوبا ارال ءوڭىرىنىڭ تابيعي تەپە-تەڭدىگىن قالپىنا كەلتىرۋگە, سۋ رەسۋرستارىن ءتيىمدى پايدالانۋعا جانە جەرگىلىكتى حالىقتىڭ تۇرمىس ساپاسىن جاقسارتۋعا باعىتتالىپ وتىر.
