2023 جىلدىڭ مامىر ايىندا استانا قالاسى اكىمدىگىنىڭ باستاماسىمەن ىسكە قوسىلعان JOLTAP جوباسى بۇگىندە ەلوردالىقتار ءۇشىن ءۇمىت پەن ءىس-قيمىلدىڭ سيمۆولىنا اينالدى. مەملەكەت باسشىسى قاسىم-جومارت توقاەۆ 2025 جىلدى «جۇمىسشى ماماندىقتار جىلى» دەپ جاريالاپ, قوعامدا ادال ەڭبەكتىڭ قادىرىن ارتتىرۋعا باسا نازار اۋدارعان بولاتىن. وسى يدەيانىڭ ناقتى ىسكە اسقان كورىنىسى – وسى جوبا دەۋگە تولىق نەگىز بار.
باعدارلامانىڭ باستى ماقساتى – استانا تۇرعىندارىنىڭ تابىسىن ارتتىرۋ, جۇمىسسىزدىقپەن كۇرەس, حالىقتىڭ وسال توپتارىن قولداۋ. اسىرەسە NEET جاستارى, ىشكى ميگرانتتار, الەۋمەتتىك تۇرعىدان از قامتىلعان ازاماتتار باستى نازاردا. ولار ءۇشىن بۇل جوبا جاي عانا وقۋ ەمەس – ءومىردى جاڭا پاراقتان باستاۋ مۇمكىندىگى.
«JOLTAP» اياسىندا ەكى باعىتتا قىسقا مەرزىمدى وقىتۋ باعدارلاماسى جۇزەگە اسىرىلۋدا. ءبىرىنشىسى – ناقتى ەڭبەك نارىعىندا سۇرانىسقا يە ناۋبايشى, باريستا, تىگىنشى, ساتۋشى-كاسسير, قوعامدىق تاماقتانۋ قىزمەتكەرلەرى سىندى جۇمىسشى ماماندىقتارعا باعىتتالعان», دەدى جوبا مەنەدجەرى عينايات احمەتوۆ.
وسى ماماندىقتار ىشىندە ەرەكشە سۇرانىسقا يە باعىتتىڭ ءبىرى – «تىگىنشى» كۋرسى. بۇل كۋرستىڭ وقىتۋشىسى, تاجىريبەلى مامان فاريدا مىرزاحمەتوۆا ءوزىنىڭ اسەرلى تاجىريبەسىمەن ءبولىستى:
«وسى سالادا جۇمىس ىستەپ جۇرگەنىمە جيىرما جىلداي ۋاقىت بولدى. كوللەدجدەردە ساباق بەردىم, تىگىن ماستەرى بولىپ جۇمىس ىستەدىم, «استانا يۋتاريا» فابريكاسىندا بەس جىلداي تەحنولوگ بولىپ قىزمەت اتقاردىم. جولتاپ جوباسى اياسىنداعى باعدارلاماعا ساي ساباق وتەمىز. وقۋ مەرزىمى — 22 كۇن. باعدارلاما كەلەسى نەگىزگى مودۋلدەردى قامتيدى: قاۋىپسىزدىك شارالارى, تىگىن جابدىقتارىن پايدالانۋ, قولمەن تىگۋ; تىگىن ماشيناسىمەن جۇمىس ىستەۋ, كيىم بولىكتەرىن دۋبلەرينداۋ, تىگىندەردى دىمقىل-جىلۋمەن وڭدەۋ, بۇيىمداردىڭ بولشەكتەرى مەن توپتارىن وڭدەۋ تەحنولوگياسى. ساباق سوڭىندا بارلىق ستۋدەنتتەر تولىققاندى جۇمىس حالاتىن تىگىپ شىعادى», دەيدى ول.
تىگىن ءىسى – تەك كاسىپ ەمەس, شىعارماشىلىق پەن ىشكى ەركىندىكتىڭ ءبىر ءتۇرى. بۇل سالانى مەڭگەرگەن ءاربىر ادام وزىندىك ورنەكپەن ءومىر سۇرۋگە مۇمكىندىك الادى. سولاردىڭ ءبىرى – نۇرگۇل داۋىتپايقىزى. ول بۇرىن مۇلدە باسقا سالادا ەڭبەك ەتىپ, ءومىرىن قايتا باستاۋعا بەل بۋعان ستۋدەنت. «JOLTAP» جوباسى ونىڭ بالالىق ارمانىنا قايتا ورالىپ, تىگىن ءىسى ارقىلى ءوزىن تابۋىنا سەبەپ بولعان
«مەن 10 جىلداي مەديا-ماركەتينگ سالاسىندا جۇمىس ىستەدىم. تولاسسىز اقپارات ايدىنىنان وتە قاتتى شارشادىم. ءبىراز ۋاقىت دەمالىستان كەيىن, اپكەمنەن JOLTAP باعدارلاماسى تۋرالى ەستىدىم. ۇيدە توقىما توقۋمەن اينالىسىپ جۇرگەنمىن. سول ۋاقىتتا ءوزىمنىڭ بالالىق شاقتاعى ارماندارىم ەسىمە ءتۇسىپ كەتتى. مەن ادەمى كيىنگەندى, ەرەكشە ءستيلدى ءوزىم قۇراستىرىپ, تىككەندى ۇناتاتىنمىن. بىراق, تىگۋدىڭ جانە ءپىشۋدىڭ ءادىس-ءتاسىلىن بىلمەيتىنمىن. ءسويتىپ, باعدارلامانىڭ 2 كۋرسىنا جازىلدىم. ءبىرىنشى - سانگەر-قۇراستىرۋشى, ەكىنشى – تىگىن ءىسى. سانگەر-قۇراستىرۋشى كۋرسى 15 كۇن بولدى, ءپىشۋ سالاسىن تولىعىمەن يگەرىپ شىقتىم. ال, تىگىن ىسىندە وقىتۋشىمىز فاريدا ارىستانقىزى ەڭ الدىمەن تىگىن ماشينالارىنىڭ تۇرىمەن تانىستىرىپ, بارلىق ساقتىق شارالارىنا ۇيرەتتى. وقۋ 21 كۇنگە سوزىلدى. كەيىن قالتانىڭ ءتۇر-ءتۇرىن تىگۋدىڭ بارلىق ءادىس-تاسىلدەرىن مەڭگەردىك. سوڭىندا العان ءبىلىمىزدىڭ بارلىعىن قولدانا وتىرىپ, حالات تىگىپ شىقتىم», دەيدى ول.
نۇرگۇل بولاشاقتا قازاقتىڭ ۇلتتىق كيىمدەرىن, ۇلتتىق ويۋلارىن ءارى قاراي تۇرلەندىرىپ, دامىتقىسى كەلەتىنىن ايتتى. بىراق, تىگىن جانە ءپىشۋ سالاسىن تولىعىمەن ۇيرەنۋ ءۇشىن كەمىندە 10 جىلداي تاجىريبە كەرەك ەكەنىن ايتىپ ءوتتى.
«كۋرس وقىپ جۇرگەننىڭ وزىندە ءۇيىمنىڭ قاسىنداعى تىگىن اتەلەسىنە بارىپ, پراكتيكادان ءوتۋدى سۇرادىم. ولاردىڭ ايتۋىنشا, اتەلە كيىمدى رەستاۆراتسيالاۋمەن اينالىسادى. ولار ماعان رەستاۆراتسيانىڭ بارلىق ءتۇرىن ۇيرەتىپ, ۇناسا وسىندا جۇمىس ىستەۋگە قالا بەرىڭىز دەپ ۇسىنىس جاسادى. بۇل جەردە 1 ماۋسىمنان باستاپ جۇمىس ىستەپ جاتىرمىن.
بۇل جوبا قازاقستاننىڭ بارلىق قالالارىندا بولۋ كەرەك. بۇل جوبادا ناقتى ەڭبەك پەن ءوز كاسىبىڭدى, جولىڭدى تابا الاتىنداي باعىتتار قاراستىرىلعان. بۇل ماماندىقتار ۇنەمى سۇرانىستا. ءبىر سوزبەن ايتقاندا جولتاپ جوباسى مەنىڭ بالالىق ارمانىمدى قايتا ەسىمە ءتۇسىرىپ, وزىمە ۇنايتىن جاڭا كاسىپتى مەڭگەرىپ, ارى قاراي ومىرگە دەگەن قىزىعۋشىلىعىمدى ارتتىردى. بۇل مەن ءۇشىن ىستىق جوبا. جوبا ارى قاراي دا جالعاسىن تاپسا ەكەن دەگەن نيەتىم بار», دەيدى نۇرگۇل داۋىتپايقىزى.
جوبا ۇسىنعان ەكىنشى باعىت – تسيفرلىق داۋىرگە بەيىمدەلگەن «Freelance مۇمكىندىك» باعدارلاماسى. مۇندا SMM, گرافيكالىق جانە ۆەب-ديزاين, بەينەمونتاج, تارگەتينگ, ماركەتپلەيس, موبيلوگرافيا سىندى داعدىلار ۇيرەتىلەدى. بۇل داعدىلار بۇگىندە فريلانس, ونلاين جۇمىس جانە شاعىن بيزنەستى دامىتۋ ءۇشىن اۋاداي قاجەت.
ايتا كەتەيىك, بۇرىن جوبا 18 جاستان باستاپ ستۋدەنت قابىلداسا, ەندى جوباعا 16 جاسقا تولعان جاسوسپىرىمدەر دە قاتىسا الادى. بۇل وزگەرىس – جاستاردىڭ مۇمكىندىگىن كەڭەيتىپ, ەرتە جاستان ەڭبەككە بەيىمدەلۋگە جول اشادى. اسىرەسە وقۋدى ەندى بىتىرگەن, ماماندىعىن تاپپاي جۇرگەن جاسوسپىرىمدەر ءۇشىن بۇل سەنىمدى باستاما بولا الادى.
جوبا باسشىلىعى 16-17 جاس ارالىعىنداعى قاتىسۋشىلار وقۋعا تەك اتا-اناسىمەن نەمەسە زاڭدى وكىلىمەن بىرگە كەلىپ, جازىلا الاتىنىن اتاپ ءوتتى. بۇل قاۋىپسىزدىك پەن زاڭدى كەلىسىمدى قامتاماسىز ەتۋ ءۇشىن قاجەت.
وقۋعا جازىلۋ ءۇشىن وزىڭىزبەن بىرگە كەلەسى قۇجاتتاردى الا كەلىڭىز:
- جەكە كۋالىك ء(سىزدىڭ جانە اتا-اناڭىزدىڭ)
- تۋ تۋرالى كۋالىك
- نەمەسە قامقورشىلىقتى راستايتىن قۇجات
بۇگىنگى تاڭدا جوبا اياسىندا 32 مىڭنان استام ادام قامتىلعان, ولاردىڭ 12 مىڭنان استامى قىسقا مەرزىمدى وقۋدان وتكەن, 7 مىڭنان استام ادام تۇراقتى جۇمىسقا ورنالاسقان. ال ەڭ باستىسى – 1 مىڭنان استام جەكە كاسىپكەرلىك اشىلىپ, جاڭا جۇمىس ورىندارى قۇرىلدى.
وسى جوبا ارقىلى تىگىن اتەلەسى, اياق كيىم جوندەۋ شەبەرحاناسى, كوفەحانا اشقان جاندار از ەمەس. ولاردىڭ ءبارىنىڭ باستاۋىندا — JOLTAP-تا العان ءبىلىم مەن باتىلدىق جاتىر.
ادال ەڭبەك – ابىرويدىڭ باستاۋى
اسحات شۋينشاليەۆ – جوبانىڭ ناقتى قاتىسۋشىسى, بۇگىندە بىرنەشە سەرىكتەستىكتىڭ جۇمىسىن ۇيىمداستىرىپ, بەلسەندى كاسىپكەر رەتىندە ەڭبەك ەتۋدە:
«مەن بۇل جوباعا جۇمىسسىزدىق ماسەلەسىن تەرەڭ ءتۇسىنىپ, كاسىپكەرلىككە جاڭاشا قادام باسۋ ءۇشىن كەلدىم. بۋحگالتەرلىك نەگىزدەر كۋرسىنان 16 كۇن وقىدىم. قازىر 5 جشس, 1 اۋىلشارۋاشىلىق كووپەراتيۆى, 1 تۇتىنۋ كووپەراتيۆى سىندى بىرنەشە ۇيىممەن جۇمىس ىستەپ جاتىرمىن. سالىق جەڭىلدىكتەرىن پايدالانىپ, زاڭدى نەگىزدە ءىس جۇرگىزىپ ءجۇرمىن. بۇل – العان ءبىلىمنىڭ ناقتى جەمىسى!», دەيدى ول.
ول جوبانىڭ ىقپالىن جوعارى باعالاپ, ەكى ادامعا ايتىپ, ولاردى دا كۋرسقا قاتىسۋعا تارتقان. كەلەشەكتە ءوز جوبالارىن دا وسى باعدارلاما اياسىندا ۇسىنۋعا دايىن ەكەنىن جەتكىزدى.
ال گۇلميرا تالعات ەسىمدى ستۋدەنت:
«جولتاپ جوباسى ۇنادى. ءىس باستاعىسى كەلەتىن ادامدارعا ۇلكەن مۇمكىندىك. ءبىر ماماندىقتان شاتاسىپ, ەندى باسقا سالاعا اۋىسقىسى كەلەتىندەر ءۇشىن تاپتىرماس باعدارلاما ەكەن. ءپىشۋدى ۇيرەتكەن ۇستازىمىزعا مىڭ العىس!», دەپ شىنايى العىسىن ءبىلدىردى.
Jumystap.kz – كادرلىق كوپىر
جوبا اياسىندا Jumystap.kz ونلاين پلاتفورماسى دا ىسكە قوسىلعان. بۇل رەسۋرس جۇمىس بەرۋشى مەن ىزدەۋشىنى جىلدام بايلانىستىرىپ, ەڭبەك نارىعىنداعى تەپە-تەڭدىكتى قالپىنا كەلتىرۋگە سەپ بولۋدا. بۇگىندە مۇندا 2,8 مىڭنان استام جۇمىس بەرۋشى, 18 مىڭنان اسا ىزدەۋشى تىركەلگەن, 3,4 مىڭ بوس جۇمىس ورنى ۇسىنىلعان.
جوبانىڭ وپەراتورى – «جاڭا مۇمكىندىك» قوعامدىق قورى. مەملەكەت پەن ۇكىمەتتىك ەمەس سەكتوردىڭ, بيزنەستىڭ بىرىگىپ جۇمىس ىستەۋىنىڭ ناتيجەسىندە ناقتى ناتيجە كورىنىس تاۋىپ وتىر. «JOLTAP» – وسى ۇشتىكتىڭ ۇيلەسىمىندەگى تابىستى تەتىك.
«JOLTAP» – جاي عانا باعدارلاما ەمەس. بۇل – قوعامدى قايتا تۇلەتۋدىڭ, ادامدارعا سەنىم ۇيالاتۋدىڭ, جاڭا ءومىر باستاۋدىڭ الاڭى. ەلىمىزدە ادال ەڭبەككە قۇرمەت ارتقان سايىن, مۇنداي جوبالار تەك قالالاردا ەمەس, اۋدان-اۋىلدارعا دا تارالۋى ءتيىس. سەبەبى ءار ازاماتتىڭ بويىندا – شەبەرلىككە, كاسىپكە, تابىسقا دەگەن جول بار. ال سول جولدى جولتاپ كورسەتەدى.
