فوتو: اشىق دەرەككوز
جەزقازعان قالاسىندا جالپى ۇزىندىعى 398 شاقىرىم بولاتىن جىلۋ جەلىسى بار. اتالعان ينفراقۇرىلىم 1951 جىلى پايدالانۋعا بەرىلگەن, بۇگىندە توزۋ دەڭگەيى 56,6%-دى قۇرايدى. 1969 جىلى ىسكە قوسىلعان 8 سورعى ستانساسى جۇمىس ىستەيدى. قازىرگى تاڭدا جىلۋ جەلىلەرىندەگى شىعىن 35–40%-عا دەيىن جەتىپ, جىلۋمەن قامتۋ ساپاسىنا كەرى اسەرىن تيگىزىپ جاتىر. بۇل جاڭا قۇرىلىستاردى جۇيەگە قوسۋعا كەدەرگى كەلتىرىپ وتىر.
«جەزقازعان قالاسىنىڭ كەڭەيۋىن جانە سالىنىپ جاتقان جاڭا باتىس اۋدانىن جىلۋمەن قامتاماسىز ەتۋ قاجەتتىلىگىن ەسكەرە وتىرىپ, رەكونسترۋكتسيالاۋ مەن جاڭعىرتۋ بويىنشا باستاپقى جوبا تۇزەتىلدى: قۇبىرلاردىڭ ديامەترى 800 مم-دەن 1000 مم-گە دەيىن, ال رەكونسترۋكتسيالاۋعا جاتاتىن جەلىلەردىڭ ۇزىندىعى 11,4 شاقىرىمنان 12,3 شاقىرىمعا دەيىن ۇلعايتىلدى», دەلىنگەن حابارلامادا.
رەزەرۆتەن بولىنگەن قارجى 98 مىڭنان استام تۇرعىنى بار جەزقازعان قالاسىنىڭ جىلۋ جەلىلەرىن ساپالى دايىنداۋعا جانە الداعى جىلىتۋ ماۋسىمىندا ۇزدىكسىز قىزمەت كورسەتۋگە مۇمكىندىك بەرەدى.
