ماۋلەن اشىمباەۆ سينگاپۋر رەسپۋبليكاسىنىڭ پرەزيدەنتى تارمان شانمۋگاراتنامعا قازاقستان پرەزيدەنتى قاسىم-جومارت توقاەۆتىڭ جىلى لەبىزىن جەتكىزىپ, سينگاپۋرلىقتاردى كەلە جاتقان تاۋەلسىزدىك كۇنىمەن قۇتتىقتادى. سونداي-اق ول قازاقستان سينگاپۋردى قاشاندا جۇيەلى دامۋدىڭ وزىق ۇلگىسى سانايتىنىن تىلگە تيەك ەتتى.
سەنات توراعاسى اتاپ وتكەندەي, قازاقستان مەن سينگاپۋر ونداعان جىلدار بويى ءوزارا قۇرمەتكە جانە ورتاق قۇندىلىقتار مەن مۇددەگە نەگىزدەلگەن بەرىك سەرىكتەستىك قالىپتاستىردى. كەيىنگى جىلداردا ەكىجاقتى ىنتىماقتاستىق ايتارلىقتاي نىعايا تۇسكەنىنە دە ءمان بەرىلدى.
«قازاقستان پرەزيدەنتى قاسىم-جومارت توقاەۆ بىلتىر سينگاپۋرعا جاساعان مەملەكەتتىك ساپارى اياسىندا وقىعان دارىسىندە سىزدەردىڭ ەلدەرىڭىز قازاقستاندى دامۋ مەن وركەندەۋ باعىتىندا وزىندىك جول تاڭداۋعا جىگەرلەندىرەتىنىن ايتتى. قازىرگى تاڭدا ەكى ەل اراسىندا ءوزارا قۇرمەتكە, ورتاق قۇندىلىقتارعا جانە ۇقساس ۇستانىمعا نەگىزدەلگەن بەرىك, ۇزاقمەرزىمدى ارىپتەستىك ورنادى. كەيىنگى جىلدارى ءبىزدىڭ ىنتىماقتاستىعىمىز ودان ءارى نىعايا ءتۇستى», دەپ سەنات توراعاسى سينگاپۋر پرەزيدەنتىنە قازاقستان پرەزيدەنتى قاسىم-جومارت توقاەۆتىڭ باستاماسىمەن جۇرگىزىلىپ جاتقان رەفورمالار جونىندە ايتىپ بەردى.
ءوز كەزەگىندە تارمان شانمۋگاراتنام قازاقستان باسشىلىعىنا سەنىم تانىتقانى جانە سينگاپۋرداعى وزگەرىستەرگە قولداۋ كورسەتكەنى ءۇشىن ريزاشىلىق ءبىلدىردى. سونداي-اق رۋحاني ديپلوماتيانى ىلگەرىلەتۋگە جانە كوپ فورماتتى قازاقستان-سينگاپۋر قاتىناستارىن دامىتۋعا قوسقان ۇلەسى ءۇشىن العىس ايتتى. ودان بولەك, ەكى مەملەكەت اراسىنداعى ساياسي ديالوگ جانە ءوزارا ءتيىمدى سەرىكتەستىك دەڭگەيىنە جوعارى باعا بەردى.
پارلامەنت سپيكەرى سەا كيان پەنمەن كەزدەسۋدە ءوزارا پارلامەنتارالىق قارىم-قاتىناستاردى دامىتۋ كەلەشەگى اڭگىمەگە ارقاۋ بولدى. ماۋلەن اشىمباەۆ ەكىجاقتى بايلانىستىڭ جوعارى دەڭگەيىنە جانە كۇشتى مەملەكەتتىك باسقارۋدى كوپۇلتتى وكىلدىك پەن ساياسي ساباقتاستىقتى قامتاماسىز ەتەتىن تەتىكتەرمەن ۇيلەستىرەتىن ەلدىڭ بىرەگەي پارلامەنتتىك مودەلىنە نازار اۋداردى. وسى ورايدا تاراپتار الداعى كەزەڭدە ەكى ەلدىڭ پارلامەنتتەرى اراسىندا زاڭ شىعارۋ سالاسىنداعى ءوزارا ءىس-قيمىلدى تەرەڭدەتۋگە مۇددەلى ەكەندەرىن ءبىلدىردى.
«قازاقستان پارلامەنتى سينگاپۋردىڭ ءارتۇرلى سالاداعى, سونىڭ ىشىندە زاڭنامالىق باعىتتاعى بىرەگەي تاجىريبەسىنە ەرەكشە قىزىعۋشىلىق تانىتادى. اتاپ ايتقاندا, زاڭ شىعارۋ ۇدەرىسىن تسيفرلاندىرۋ, جاساندى ينتەللەكت, جاسىل ەكونوميكا جانە ءتيىمدى مەملەكەتتىك باسقارۋدى قولدانا وتىرىپ, جوبالار ازىرلەۋ ماسەلەلەرى – باستى نازارىمىزدا. ءبىزدىڭ پارلامەنتتىڭ ەكى پالاتاسىندا دا جۇمىس ىستەيتىن سينگاپۋرمەن دوستىق توپتارىنىڭ الەۋەتىن بەلسەندى پايدالانۋدىڭ ماڭىزى زور. بۇل دەپۋتاتتارىمىز اراسىنداعى ىنتىماقتاستىقتىڭ ەلەۋلى تەتىگى ەكەنى انىق», دەدى م.اشىمباەۆ.
سونداي-اق سەنات توراعاسى مەملەكەت باسشىسى قاسىم-جومارت توقاەۆتىڭ باستاماسىمەن قازاقستاندا جۇزەگە اسىرىلىپ جاتقان اۋقىمدى ساياسي جاڭعىرتۋلارعا توقتالىپ, دامۋدىڭ جاڭا ەكونوميكالىق مودەلىن قالىپتاستىرۋ باعىتىنداعى جۇمىستار جونىندە ايتتى.
«قازىرگى تاڭدا قازاقستاندا ۇلتتىق ەكونوميكانى ءارتاراپتاندىرۋدى كوزدەيتىن ماڭىزدى رەفورمالار جۇرگىزىلىپ جاتىر. وسى رەتتە ءبىز ەنەرگەتيكا, پايدالى قازبالاردى وڭدەۋ, ينفراقۇرىلىمدى دامىتۋ, تسيفرلىق ەكونوميكا, قارجى تەحنولوگيالارى, لوگيستيكا جانە بايلانىس سياقتى نەگىزگى سەكتورلاردا ىنتىماقتاستىقتى نىعايتۋدىڭ بولاشاعى زور دەپ ەسەپتەيمىز. ورتالىق ازياعا سالىنىپ جاتقان بارلىق تىكەلەي شەتەلدىك ينۆەستيتسيانىڭ 60 پايىزدان استامى – قازاقستاننىڭ ەنشىسىندە. ءبىز شەتەلدىك كومپانيالار ءۇشىن بارىنشا قولايلى جاعداي جاساۋعا تولىق دايىنبىز. سونىڭ اياسىندا شەتەلدىك ينۆەستورلاردى قولداۋ ءۇشىن قاجەتتى زاڭنامالىق شارالار دا قابىلدادىق», دەپ م.اشىمباەۆ سينگاپۋرلىق كومپانيالاردى ىنتىماقتاسا جۇمىس ىستەۋگە جانە بىرلەسكەن كاسىپورىندار قۇرۋعا شاقىردى.
ءوز كەزەگىندە سينگاپۋر پارلامەنتىنىڭ سپيكەرى قازاقستاندا جۇرگىزىلىپ جاتقان قوعامدىق-ساياسي وزگەرىستەرگە جوعارى باعا بەردى جانە بارلىق باعىت بويىنشا ىنتىماقتاستىقتى ودان ءارى كەڭەيتۋگە مۇددەلى ەكەنىن جەتكىزدى.
سونىمەن قاتار قازاقستان پارلامەنتىنىڭ دەپۋتاتتارى سينگاپۋردىڭ «Punggol Digital District» تسيفرلىق كلاستەرىنە باردى. بۇل – 50 گەكتار اۋماقتى الىپ جاتقان, كيبەرقاۋىپسىزدىك, جاساندى ينتەللەكت, روبوتتەحنيكا, قارجى تەحنولوگيالارى سياقتى نەگىزگى سەكتورلاردا تسيفرلىق سالانىڭ كوشباسشى كومپانيالارى ورنالاسقان ورنىقتى بيزنەس-يننوۆاتسيالىق اۋدان. پلاتفورما ءارتۇرلى جۇيە مەن سەنسورلاردان دەرەكتەر جينايدى. ونىڭ ىشىندە ليفتتەر, جارىقتاندىرۋ, ينجەنەرلىك جەلىلەر; عيماراتتاردىڭ قامتىلۋ كورسەتكىشتەرى, تەمپەراتۋرا, ىلعالدىلىق, جاۋىن-شاشىن جانە تاعى باسقا كليماتتىق پارامەترلەر بار.
بۇدان باسقا, دەپۋتاتتار «Marina Barrage» گيدروتەحنيكالىق نىسانىنىڭ قىزمەتىمەن تانىستى. ول سينگاپۋردىڭ ءبىرىنشى پرەمەر-ءمينيسترى لي كۋان يۋدىڭ يدەياسىمەن سالىنعان. بوگەت سۋ قورىن ۇلعايتىپ قانا قويماي, تولقىن مەن جاڭبىر كەزىندە جاعالاۋلاردىڭ سۋ استىندا قالۋىنا جول بەرمەيتىن توسقاۋىل رەتىندە جۇمىس ىستەيدى.
