سۋرەتتى تۇسىرگەندەر – ا.دۇيسەنباەۆ, ە.ۇكىباەۆ
پرەزيدەنت الدىمەن اقتوبە قالاسىندا كەڭەس وداعىنىڭ باتىرى ءاليا مولداعۇلوۆانىڭ مەموريالدىق ەسكەرتكىش كەشەنىنە گۇل شوعىن قويىپ, ونىڭ رۋحىنا ءبىر مينۋت ۇنسىزدىكپەن تاعزىم ەتتى. بيىل قازاقتىڭ قايسار قىزىنىڭ تۋعانىنا 100 جىل تولىپ وتىر.
مەملەكەت باسشىسى ءاليا مولداعۇلوۆانىڭ ەسكەرتكىشى جانىندا جەرگىلىكتى جۇرتشىلىقپەن كەزدەسىپ, ءسوز سويلەدى.
– ءاليا مولداعۇلوۆا – حالقىمىزدىڭ قايسار قىزى. بۇگىن 100 جىلدىعىنا وراي ارنايى كەلدىم. بۇل, ەڭ الدىمەن, ازاماتتىق بورىشىم. تاعزىم ەتۋ ءۇشىن كەلىپ وتىرمىن. بارشاڭىزعا كوپ راحمەت. ءاليانىڭ ەسىمىن حالقىمىزدىڭ اراسىندا, شەتەلدە كەڭ اۋقىمدا دارىپتەۋىمىز كەرەك. ول – ءبىزدىڭ ماقتانىشىمىز. سوندىقتان ونىڭ ەسىمى ءبىزدىڭ جادىمىزدا ماڭگى ساقتالادى, – دەدى قاسىم-جومارت توقاەۆ.
سونداي-اق پرەزيدەنت قازىرگى الماعايىپ زاماندا بىرلىكتى, تاتۋلىقتى ساقتاۋ وتە ماڭىزدى ەكەنىنە نازار اۋداردى.
سودان سوڭ پرەزيدەنت – قازاقستان قارۋلى كۇشتەرىنىڭ جوعارعى باس قولباسشىسى قاسىم-جومارت توقاەۆ XI حالىقارالىق «ايبىن» اسكەري-پاتريوتتىق جاستار جيىنىنىڭ اشىلۋ راسىمىنە قاتىستى.
بيىل قازاقستان, ازەربايجان, بەلارۋس, قىرعىزستان, رەسەي جانە وزبەكستان ەلدەرىنىڭ اسكەري-پاتريوتتىق قوزعالىستارىنا مۇشە 800-گە جۋىق جاستىڭ باسىن قوسقان ءىس-شارا اقتوبە وبلىسىندا ۇيىمداستىرىلدى. سلەت قوس اتاۋلى داتاعا – ۇلى جەڭىستىڭ 80 جىلدىعىنا جانە قازاق حالقىنىڭ باتىر قىزى ءاليا مولداعۇلوۆانىڭ 100 جىلدىق مەرەيتويىنا ارنالادى.
قاسىم-جومارت توقاەۆ بارشا قاتىسۋشىنى «ايبىن» اسكەري-پاتريوتتىق جاستار جيىنىنىڭ اشىلۋىمەن قۇتتىقتاپ, بۇل جاس ورەندەرىمىزدىڭ رۋحىن شىڭدايتىن وتە ماڭىزدى ءىس-شارا ەكەنىنە نازار اۋداردى.
– بيىل «ايبىن» جيىنى قازاقتىڭ قايسار قىزى, كەڭەس وداعىنىڭ باتىرى ءاليا مولداعۇلوۆانىڭ تۋعانىنا 100 جىل تولۋىنا ارنالىپ وتىر. ەرجۇرەك مەرگەن قىزدىڭ ەرلىگى حالقىمىزدىڭ جانە دوستاس ەلدەردىڭ تاريحىنا التىن ارىپپەن جازىلعان. قازاقتىڭ قارشاداي قىزى سوعىسقا اتتانىپ, بىردەن قان مايداننىڭ ورتاسىنا ءتۇستى. ول سۇراپىل شايقاستاردا تەڭدەسسىز ەرلىك پەن وتان الدىنداعى پارىزعا ادالدىق ۇلگىسىن كورسەتتى. بيىل ۇلى جەڭىسكە – 80 جىل! بۇل – ءبىزدىڭ ەلدەرىمىزگە ورتاق تاريحي مەرەكە. ۇلى جەڭىس كۇنىن اتاپ ءوتۋ – باتىر بابالاردىڭ رۋحىنا تاعزىم ەتۋ, ولاردىڭ ەرلىگىن جادىمىزدا جاڭعىرتۋ دەگەن ءسوز. قازاقستان ءۇشىن مۇنىڭ ءمان-ماعىناسى ايرىقشا. حالقىمىز ۇلى جەڭىسكە ولشەۋسىز ۇلەس قوستى, ازاتتىق پەن ادىلدىك ءۇشىن ايانباي كۇرەستى. قازاقستاننان 1 ميلليون 200 مىڭ ازامات مايدانعا اتتاندى, ونىڭ تەڭ جارتىسى ەرلىكپەن قازا تاپتى. مىڭداعان ادام دالادا, زاۋىتتار مەن فابريكالاردا ەڭبەك ەتىپ, مايدانعا ازىق-ت ۇلىك, قارۋ-جاراق جانە وق-ءدارى جىبەردى. ءبىز داڭقتى ەرلەرىمىز بەن تىل ەڭبەككەرلەرىن ەشقاشان ۇمىتپايمىز, ولاردىڭ ەسىمىن ماڭگى ەستە ساقتايمىز. باتىرلارىمىز جەر-جاھانداعى بەيبىتشىلىك پەن تىنىشتىق ءۇشىن اسا اۋىر سىناقتاردى ەڭسەردى, – دەدى مەملەكەت باسشىسى.
پرەزيدەنتتىڭ ايتۋىنشا, قازىرگى قۇبىلمالى, ب ۇلىڭعىر زاماندا ءبىز وسى تاريحي اقيقاتقا ادال بولۋىمىز كەرەك, زۇلمات سوعىستىڭ قاسىرەتتى ساباعىن ۇمىتپاۋىمىز قاجەت.
– جاستار بەيبىت زاماننىڭ قادىرىن تۇسىنۋگە ءتيىس. جىل وتكەن سايىن جاھاندىق شيەلەنىستەر ءورشىپ, مەملەكەتتەر اراسىندا قاقتىعىستار جيىلەگەنىن كورىپ وتىرسىزدار. قازىرگى اسا كۇردەلى ۋاقىتتا ەلدەرىمىز اراسىنداعى تۇسىنىستىك, ءوزارا سەنىم مەن كەلىسىم وتە ماڭىزدى ءرول اتقارادى. بۇگىنگى جارىستار ءبىزدىڭ شەتەلدەرمەن كوپجاقتى بايلانىستارىمىزدى كەڭەيتۋگە ۇلەس قوسادى, – دەدى قاسىم-جومارت توقاەۆ.
مەملەكەت باسشىسى اسكەر قاتارىندا بولۋ ابىرويلى مىندەت ەكەنىن اتاپ ءوتىپ, ەلىمىز وسكەلەڭ ۇرپاقتىڭ اسكەري-پاتريوتتىق تاربيەسىنە باسا ءمان بەرەتىنىن جەتكىزدى.
– قۋاتتى ارميا – تاۋەلسىزدىك تىرەگى, قارقىندى دامۋ كەپىلى. بۇگىن ساپتا تۇرعان ساربازدار – ناعىز وتانشىل, باتىل, مىقتى ازاماتتار. قازاقستان ارمياسىنىڭ كەلەشەگى سىزدەردىڭ قولدارىڭىزدا! ادىلەتتى جانە قاۋىپسىز قازاقستاندى قۇراتىن دا – سىزدەر. مەن جوعارعى باس قولباسشى رەتىندە ەلىمىزدىڭ ءبىلىمدى, ادال, وزىق جاستارىنا سەنەمىن! الداعى كۇندەرى سىزدەردىڭ قانشالىقتى كۇشتى ءارى ەپتى ەكەندەرىڭىز سىنالادى. اسكەري قىزمەتتىڭ قانداي بولاتىنىن سەزىنىپ, زاماناۋي ارميانىڭ وزىق تەحنولوگيالارىمەن تانىساسىزدار. ناعىز جاۋىنگەر تاباندى ەڭبەك, قاتاڭ ءتارتىپ پەن جاۋاپكەرشىلىك قانا جەڭىسكە جەتكىزەتىنىن بىلەدى. تاكتيكالىق ويىندار كەزىندە سىزدەرگە باتىلدىق پەن شەشىمتالدىق قاجەت بولادى. كوماندامەن ۇيىمداسا ارەكەت ەتۋ, ءبىر-بىرىڭە كومەكتەسۋ تالاپ ەتىلەدى. بۇگىن وسى جيىندا قازاقستاننىڭ نامىسىن «جاس سارباز» اسكەري-پاتريوتتىق قوزعالىسىنىڭ ەڭ ۇزدىك مۇشەلەرى قورعايدى. جاستارىمىز جارىسقا لايىقتى دەڭگەيدە قاتىسىپ قانا قويماي, وزدەرىن وسى ەلدىڭ قوناقجاي ءارى كەڭپەيىل يەسى رەتىندە كورسەتەتىنىنە سەنىمدىمىن. وسى جيىننان جاڭا داعدى ۇيرەنىپ, ادال دوس تاۋىپ, كەرەمەت اسەرمەن ورالۋلارىڭىزعا تىلەكتەسپىن. بارشاڭىزعا ساتتىلىك تىلەيمىن! – دەدى قاسىم-جومارت توقاەۆ.
جيىن اياسىندا بالالار مەن جاسوسپىرىمدەر «ايبىن دارىنى» ينتەلەكتۋالدىق ويىنىنا, «Smart Sarbaz» تەحنولوگيالىق كونكۋرسىنا جانە «ايبىن» جۇلدىزى شىعارماشىلىق سايىسىنا قاتىسادى. پنەۆماتيكالىق مىلتىقتان اتۋ, كالاشنيكوۆ اۆتوماتىن شاشىپ, قايتا جيناۋدان جارىسادى. سونداي-اق باعدارلامادا سپورتتىق سايىستار, «كۇشىمىز بىرلىكتە» اسكەري-تاكتيكالىق ويىنى بار. كەشقۇرىم جاستار الاۋ باسىندا پاتريوتتىق اندەر ورىندايدى.
رەسمي اشىلۋ سالتاناتىنان كەيىن مەملەكەت باسشىسىنا قورعانىس ءمينيسترى, اۆياتسيا گەنەرال-لەيتەنانتى داۋرەن قوسانوۆ FPV-درون وپەراتورلارىن دايارلايتىن يننوۆاتسيالىق وقۋ-جاتتىعۋ كەشەنى مەن ۇشقىشتارعا ارنالعان زاماناۋي جاتتىعۋ سيمۋلياتورلارىن تانىستىردى.
ودان كەيىن پرەزيدەنت «Smart sarbaz» جاس روبوت تەحنيكتەرى ۇيىرمەسىنىڭ جۇمىسىمەن تانىستى. سونداي-اق بالالاردىڭ «جاس سارباز» اسكەري-پاتريوتتىق ۇرمەلى اسپاپتار وركەستەرىنىڭ ورىنداۋىنداعى مۋزىكالىق شىعارمانى تىڭدادى.
