كەشەن اق امۋر, سازان, باقتاق سىندى بالىق قورىن يننوۆاتسيالىق جولمەن مولايتتى. بۇگىندە «بۇقتىرما ۋىلدىرىق شاشۋ-ءوسىرۋ» شارۋاشىلىعى ۇشان-تەڭىز جۇمىس اتقارىپ جاتىر.
«مەكەمە قۇلدىراپ, ىسكە العىسىز بولىپ تۇرعان. يەكتىڭ استىندا كول جاتقانىمەن بالىق ونىمدەرىن باسقا جاقتان اكەلەمىز. ءسويتىپ, وزىمىزدە نەگە وندىرمەسكە دەگەن وي كەلدى. 5 جىلدىق جوسپار قۇرىپ, جۇمىسقا كىرىستىك. ناتيجەسى جوق ەمەس. بالىقتى ۋىلدىرىق كەزىنەن باپتاپ, ساقتاپ, كوك ايدىندا كوبەيتەمىز», دەيدى شارۋاشىلىق ديرەكتورى سىمبات انۋاربەكوۆ.
قازىر شارۋاشىلىقتىڭ قۋاتتىلىعى 13 ملن شاباق وندىرۋگە جەتەدى. الداعى ۋاقىتتا 50 ملن-عا دەيىن جەتكىزۋ جوسپارى بار. شىعىستا بالىق شارۋاشىلىعىن دامىتۋدىڭ 2021–2030 جىلدارعا ارنالعان باعدارلاماسى قابىلدانعان. ونىڭ ۇستىنە, سۋى مول ءوڭىر ءۇشىن بالىق ءوسىرۋ مۇمكىندىگى دە زور. 2030 جىلعا قاراي وبلىستا جىل سايىن 9 774 توننا بالىق ءوسىرىپ, ساتىلىمعا شىعارۋ جوسپارلانسا, ونىڭ 8 578 تونناسى – اقبالىق, 1 151 تونناسى – تۇقى, 45 تونناسى بەكىرە تۇقىمداس بولماق.
«بۇگىندە بالىق وسىرۋمەن وڭىردە 15 مەكەمە اينالىسادى. بۇل جاعالاۋداعى مەكەمەلەر زايسان, بۇقتىرما, ءشۇلبى, وسكەمەن سۋ قويمالارىنىڭ بويىندا ورنالاسقان. 2023–2024 جىلدارى وبلىستاعى مەكەمەلەرگە 600 ملن تەڭگە سۋبسيديا بەرىلگەن», دەيدى شقو تابيعي رەسۋرستار جانە تابيعات پايدالانۋدى رەتتەۋ باسقارماسى باسشىسىنىڭ ورىنباسارى مەرحات ءامىروۆ.
سۋرەتتى تۇسىرگەن – اۆتور
2022 جىلى شارۋاشىلىق عىلىمي-وندىرىستىك جوبالاردى جۇزەگە اسىرۋعا باعىتتالعان 300 ملن تەڭگەنىڭ گرانتىن ۇتقان. قارجى نەگىزىنەن ءوندىرىستى تۇبەگەيلى جوندەۋ جۇمىسىنا, جابدىقتار ساتىپ الۋعا جۇمسالعان. قالعانى قاجەتتى مامانداردى تارتۋعا بولىنگەن. دەگەنمەن مامان تاپشىلىعى ءالى دە بايقالادى. ءوندىرىس وشاعىنا بالىق ءوسىرۋشى, شاباق ءوربىتۋشى ماماندار كەرەك.
جۇمىس قولعا الىنعالى بالىق كوبەيگەن. سوعان قاراي شارۋاشىلىق باسىندا جۇمىس تا ارتا تۇسكەن. سىمبات انۋاربەكوۆ العاش باسشى بولىپ كەلگەندە 1 200 گەكتار توعاننىڭ 10%-ى عانا جۇمىس ىستەپ تۇرسا, قازىر شاباق ءوسىرىپ-وندىرۋگە سۋ بەتىندەگى اۋماقتىڭ 30%-ى پايدالانىلادى. تسەح ءىشى قاربالاس. ءار مامان ءوز ىسىمەن اينالىسىپ ءجۇر. ۋىلدىرىعى جەتىلگەن بالىقتاردى سىعىپ, زەرتحانادا تەكسەرەدى ەكەن. تەكسەرۋدەن وتكەنىن دەرناسىلگە اينالدىرۋ ءۇشىن ارنايى اكۆاريۋمعا جىبەرەدى. جۇمىستىڭ باسى وسى – ۋىلدىرىق الۋ, بالىقتىڭ سالماعىن ولشەۋ. ودان سوڭ ۋىلدىرىقتاردى سۇتپەن ارالاستىرىپ, كولبالارعا سالادى. ونىڭ ىشىندە ءبىر تاۋلىك اينالىپ تۇرادى. تاۋلىك وتكەن سوڭ «امۋر» اپپاراتىنىڭ ىشىندە 1 ملن دانا ۋىلدىرىق وتىرعىزىلىپ, ودان دەرناسىل شىعادى. مامانداردىڭ سوزىنشە, دەرناسىلدىڭ سالماعى 25 گرامنان اسقاندا تولىق شاباق بولىپ قالىپتاسادى. وسىلايشا, بالىقشىلار بيىل تۇقى بالىعىنان 7,5 ملن, سازاننان 4 ملن شاباق العان.
«2023 جىلى سازاننان بولەك, شارۋاشىلىق توعاندارىنا اق امۋر شاباقتارى جىبەرىلگەن. تۇقى تۇقىمداس بۇل بالىق ءتۇرى ءبىزدىڭ وڭىردەگى سۋ ايدىندارىندا كەزدەسپەيدى. وڭتۇستىكتى, ىلە, سىرداريا وزەندەرىن مەكەندەيدى. شارۋاشىلىق ۇجىمى اق امۋر شاباقتارىن ءوسىرۋدى وڭىردەگى وزەن, كولدەردىڭ ەرەكشەلىگىن, قازىرگى جاعدايىن ەسكەرە وتىرىپ قولعا الدى», دەدى سىمبات انۋاربەكوۆ.
شىعىس قازاقستان وبلىسى,
كۇرشىم اۋدانى
