قازىرگى تاڭدا ەلىمىزدىڭ 122 جوعارى وقۋ ورنىندا 680 مىڭعا جۋىق ستۋدەنت ءبىلىم الىپ جاتىر. وسى ساننىڭ ارتىندا ارقايسىسىنىڭ جەكە ماسەلەسى مەن قۇقىعى بار. بۇل تۇرعىدا ءبىلىم الۋشى جاستاردىڭ اكادەميالىق ەركىندىگى مەن الەۋمەتتىك ءال-اۋقاتى ءۇشىن جاۋاپ بەرەتىن ومبۋدسمەندەر ينستيتۋتى ماڭىزدى ءرول اتقارىپ كەلەدى. مينيسترلىك وكىلى اقەركە ابىلايحاننىڭ ايتۋىنشا, ستۋدەنتتىك ومبۋدسمەندەر ينستيتۋتى ەلىمىزدىڭ بارلىق وڭىرىندە ەكى جىلدان بەرى جۇمىس ىستەيدى. «بۇگىنگى تاڭدا وركەنيەتتى ەلدىڭ ازاماتى رەتىندە ءبىلىم الۋشى جاستار تەك ءبىلىم ەمەس, جوعارى رۋحاني قۇندىلىقتارعا دا يە بولۋى قاجەت. مينيسترلىك بۇل باعىتتا «تولىق ادام» يدەولوگياسىن العا تارتا وتىرىپ, تاربيەلىك جۇمىستاردى جاڭا دەڭگەيگە كوتەرىپ وتىر. اكادەميالىق ادالدىقتى ساقتاۋ – ءبىلىم بەرۋدەگى نەگىزگى قاعيدالاردىڭ ءبىرى. وسى ماقساتتا 18 جوعارى وقۋ ورنى مۇشە بولعان اكادەميالىق ادالدىق ليگاسى قۇرىلدى», دەدى ول.
ونىڭ ايتۋىنشا, ستۋدەنتتەردىڭ اكادەميالىق جانە الەۋمەتتىك ماسەلەلەرىن شەشۋ ءۇشىن پسيحولوگيالىق كومەك ورتالىقتارىن ۇيىمداستىرۋ, كومپلاەنس-قىزمەتتەردى جەتىلدىرۋ, سىبايلاس جەمقورلىققا قارسى جاڭا ستاندارتتاردى ەنگىزۋ سياقتى شارالار قابىلدانىپ جاتىر. جاستار اراسىندا ۆولونتەرلىك پەن ءوزىن-ءوزى باسقارۋ جۇيەسى دە دامىپ كەلەدى. ماسەلەن, بۇگىندە جوعارى وقۋ ورىندارىندا 100-دەن استام دەبات كلۋبى, 120-دان استام ەكولوگيالىق جانە شىعارماشىلىق كلۋب جۇمىس ىستەيدى.
ءمينيستردىڭ كەڭەسشىسى توقتار بولىسوۆ 2024–2025 وقۋ جىلىنداعى ستۋدەنتتىك ومبۋدسمەندەر قىزمەتىنىڭ ناتيجەسىن باياندادى. «بيىل ستۋدەنتتىك ومبۋدسمەندەرگە 6 079 ءوتىنىش ءتۇستى. ولاردىڭ باسىم بولىگى اكادەميالىق ادىلەتسىزدىك, جاتاقحانا, الەۋمەتتىك-تۇرمىستىق ماسەلەسىنە قاتىستى بولدى. 1 جىل ىشىندە ومبۋدسمەندەر تاراپىنان 100-دەن استام جوسپارلى جانە 20-دان استام جوسپاردان تىس تەكسەرىس جۇرگىزىلدى. بۇل جۇمىس وقۋ مەن تۇرمىس جاعدايلارىن جاقسارتۋعا مۇمكىندىك بەردى», دەدى ول.
بريفينگ بارىسىندا توقتار بولىسوۆ ستۋدەنتتەردىڭ پىكىرلەرىنە ارنالعان جاڭا باقىلاۋ فورماتىن دا اتاپ ءوتتى. ونىڭ ايتۋىنشا, شىمكەنت قالاسىندا «2GIS» پلاتفورماسى مەن الەۋمەتتىك جەلىلەردەگى ستۋدەنتتەردىڭ پىكىرلەرى سارالانىپ, كەيبىر ۋنيۆەرسيتەتتەردە جۇيەلى كەمشىلىكتەر انىقتالعان. مالىمەتتەر وقۋ ورىندارىنا جولداندى. ەندى شىلدە-تامىز ايلارىندا قايتا مونيتورينگ جۇرگىزىلەدى. وسى رەتتە اقپاراتتىق-اعارتۋشىلىق جۇمىستار دا نازاردان تىس قالماعان. جاستاردىڭ قۇقىقتىق ساۋاتتىلىعىن ارتتىرۋ ءۇشىن دارىستەر, كەڭەس بەرۋ كەزدەسۋى جانە الەۋمەتتىك جەلىدە جاريالانىمدار ۇيىمداستىرىلعان. سونىمەن قاتار «ستۋدەنتتىك ومبۋدسمەندەر مەكتەبى» اياسىندا ادام قۇقىقتارى, كوممۋنيكاتسيا, قاقتىعىستاردى شەشۋ جانە ۋنيۆەرسيتەت اكىمشىلىگىمەن ءوزارا ارەكەتتەسۋ بويىنشا ترەنينگتەر وتكىزىلگەن.
رەسپۋبليكالىق ستۋدەنتتىك ومبۋدسمەن ۇلان ناۋكەن جاستاردىڭ قۇقىقتىق مادەنيەتىن قالىپتاستىرۋ مەن اشىق ديالوگتى دامىتۋدا مينيسترلىك پەن قازاقستان ستۋدەنتتەرىنىڭ اليانسى اراسىنداعى سەرىكتەستىكتىڭ ماڭىزدىلىعىنا توقتالدى. ء«بىز – ستۋدەنت پەن ۋنيۆەرسيتەت اراسىنداعى اشىق ءارى سەنىمدى ديالوگتىڭ قۇرالىنا اينالدىق. ومبۋدسمەندەر قازىرگى تاڭدا ستۋدەنتتەردىڭ ماسەلەلەرىن ۋنيۆەرسيتەت اكىمشىلىگى مەن باسقا دا ءتيىستى ورگاندارعا جەتكىزە وتىرىپ, ولاردىڭ قۇقىقتارىن قورعاۋعا ىقپال ەتىپ كەلەدى», دەدى ۇ.ناۋكەن. ونىڭ ايتۋىنشا, جىل باسىنان بەرى ستۋدەنتتىك ومبۋدسمەندەردىڭ باستاماسىمەن 200-دەن استام قوعامدىق شارا, قۇقىقتىق كەزدەسۋلەر, سپورتتىق جانە شىعارماشىلىق بايقاۋلار, ەكولوگيالىق اكتسيالار, دەبات تۋرنيرلەرى, وتكىزىلگەن. سونداي-اق ستۋدەنتتىك ءوزىن-ءوزى باسقارۋ جۇيەسىن نىعايتۋعا باعىتتالعان «Studunion» جوباسى ارقىلى ەلىمىزدىڭ جوعارى وقۋ ورىندارىندا ستۋدەنتتەردىڭ وكىلدىك ينستيتۋتتارى دامىپ, جاستاردىڭ باسقارۋ ۇدەرىسىنە ارالاسۋىنا مۇمكىندىك بەرىلگەن.
بريفينگ قورىتىندىسىندا سپيكەرلەر ستۋدەنتتىك ومبۋدسمەندەر ينستيتۋتىن ءارى قاراي دامىتۋ ءۇشىن زاڭنامالىق جانە ۇيىمداستىرۋشىلىق تەتىكتەردى كۇشەيتۋ قاجەت ەكەنىن اتاپ ءوتتى.
