باعدارلاما شەڭبەرىندە قىزمەتتەر مىندەتتى الەۋمەتتىك مەديتسينالىق ساقتاندىرۋ جۇيەسى ارقىلى تەگىن كورسەتىلىپ كەلەدى. بۇل – الەۋمەتتىك ادىلەتتىلىكتىڭ جانە مەديتسينالىق كومەكتىڭ تەڭ قولجەتىمدىلىگىنىڭ ناقتى كورىنىسى. جالپى وڭىردە انا مەن بالا دەنساۋلىعىن ساقتاۋ باستى الەۋمەتتىك باسىمدىقتاردىڭ ءبىرى. بۇل باعىتتا وڭىردە كەشەندى شارالار جۇزەگە اسىرىلىپ, ناقتى ناتيجەلەرگە قول جەتكىزىلۋدە.
وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋۆاليەۆتىڭ ايتۋىنشا, سوڭعى ەكى جىلدا انا مەن بالا ءولىمىنىڭ كورسەتكىشتەرى تۇراقتى تۇردە تومەندەگەن. بۇل وڭ ديناميكا پروفيلاكتيكالىق سكرينينگ, پەريناتالدىق كومەك جانە كادر دايىندىعى جۇيەسىندەگى ساپالى وزگەرىستەردىڭ ناتيجەسى. بۇگىندە وڭىردە پرەناتالدىق سكرينينگپەن قامتۋ دەڭگەيى 88%-عا جەتكەن. بۇل ماقساتتا 47 ۋدز مامانى وقىتىلىپ, ونىڭ 12-ءسى ۇلىبريتانياداعى Fetal Medicine Foundation سەرتيفيكاتىنا يە بولعان. وسى شارالاردىڭ ناتيجەسىندە تۋا بىتكەن دامۋ اقاۋلارىنىڭ ەرتە دياگنوستيكاسى 4%-عا ارتقان.
ايتا كەتەلىك, حالقى بۇگىندە 2,2 ميلليوننان اساتىن وبلىستا رەپرودۋكتيۆتى جاستاعى ايەلدەر سانى – 433 مىڭنان استام, ال 18 جاسقا دەيىنگى بالالار – 900 مىڭعا جۋىق. جىل سايىن ورتا ەسەپپەن 54 مىڭعا جۋىق ءسابي دۇنيەگە كەلەدى.
