فوتو: عىلىم جانە جوعارى ءبىلىم مينيسترلىگى
قازىرگى تاڭدا ەلىمىزدىڭ 122 جوعارى وقۋ ورنىندا 680 مىڭعا جۋىق ستۋدەنت ءبىلىم الادى. مينيسترلىك جاستاردىڭ قۇقىقتارى مەن مۇددەلەرىن قورعاۋعا, وقۋ پروتسەسىندەگى ادىلەتتىلىك پەن اشىقتىقتى قامتاماسىز ەتۋگە باعىتتالعان كەشەندى جۇمىس جۇرگىزىپ كەلەدى. بۇل رەتتە ستۋدەنتتىك ومبۋدسمەندەر ينستيتۋتىنىڭ ورنى ەرەكشە.
اقەركە ابىلايحاننىڭ ايتۋىنشا, ستۋدەنتتىك ومبۋدسمەندەر ەكى جىلدان استام ۋاقىت ىشىندە بارلىق وڭىرلەردە بەلسەندى جۇمىس جۇرگىزىپ كەلەدى. بيىل ستۋدەنتتەردەن 6000-نان استام ءوتىنىش ءتۇسىپ, ولاردىڭ دەنى وقۋ پروتسەسى, جاتاقحانا, ستيپەنديا جانە ۇيىمداستىرۋشىلىق ماسەلەلەرگە قاتىستى بولعان.
«اكادەميالىق ادالدىقتى ساقتاۋ – ءبىلىم الۋداعى باستى پرينتسيپتەردىڭ ءبىرى. بۇل رەتتە اكادەميالىق ادالدىق ليگاسى قۇرىلعان. وعان بۇگىندە 18 جوعارى وقۋ ورنى مۇشە», دەدى ول.
توقتار بولىسوۆ ستۋدەنتتىك ومبۋدسمەندەردىڭ 2024-2025 وقۋ جىلىنداعى قىزمەتىنە توقتالىپ, 6079 ءوتىنىشتىڭ قارالعانىن مالىمدەدى.
«ومبۋدسمەندەر ينستيتۋتىنىڭ ماقساتى – ستۋدەنتتەردىڭ قۇقىقتارى مەن زاڭدى مۇددەلەرىن ءتيىمدى قورعاۋدى قامتاماسىز ەتۋ, سونداي-اق ەلدەگى جوعارى وقۋ ورىندارىندا قاۋىپسىز ءارى ادىلەتتى ءبىلىم بەرۋ ورتاسىن قالىپتاستىرۋ. جىل ىشىندە 100-دەن استام جوسپارلى ءىس-شارا مەن 20-دان استام جوسپاردان تىس مونيتورينگ جۇرگىزىلدى. ومبۋدسمەندەر ستۋدەنتتەردىڭ وتىنىشتەرىنە جەدەل ارەكەت ەتىپ, تۋىنداعان ماسەلەلەردى ۋاقىتىلى شەشۋگە جانە قيىن جاعدايداعى ستۋدەنتتەرگە قولداۋ كورسەتۋگە مۇمكىندىك بەردى», دەدى ول.
سونىمەن قاتار «ستۋدەنتتىك ومبۋدسمەندەر مەكتەبى» اياسىندا قۇقىق, كوممۋنيكاتسيا, قاقتىعىستاردى شەشۋ بويىنشا ترەنينگتەر وتكىزىلىپ, بەلسەندى ستۋدەنتتەردى دايارلاۋ قولعا الىندى.
رەسپۋبليكالىق ستۋدەنتتىك ومبۋدسمەن ۇلان ناۋكەن جاستاردىڭ قۇقىقتىق مادەنيەتىن قالىپتاستىرۋ مەن اشىق ديالوگتى ىلگەرىلەتۋ بويىنشا قازاقستان ستۋدەنتتەرىنىڭ اليانسى مەن مينيسترلىكتىڭ ارىپتەستىگى ماڭىزدى ەكەنىن اتاپ ءوتتى:
«بۇل ينستيتۋت قازىرگى تاڭدا ستۋدەنت پەن جۇيە اراسىنداعى اشىق ديالوگ قۇرالى رەتىندە قالىپتاسىپ, ەلدەگى ءبىلىم بەرۋ كەڭىستىگىنىڭ جاۋاپتى ءارى ينكليۋزيۆتى بولۋىنا جول اشىپ كەلەدى», دەدى ومبۋدسمەن.
ونىڭ مالىمەتىنشە, ومبۋدسمەندەر ستۋدەنتتەردىڭ وتىنىشتەرى نەگىزىندە وقۋ ورىندارى اكىمشىلىگىمەن جانە باسقا دا جاۋاپتى ورگاندارمەن ءتيىمدى ءوزارا ءىس-قيمىل ورناتىپ, جاستاردىڭ قۇقىقتارى مەن مۇددەلەرىنىڭ ساقتالۋىنا ناقتى ىقپال ەتتى.
