ناۋقاس 2012 جىلدان بەرى جۇرەك جەتكىلىكسىزدىگى اۋرۋىنىڭ ەڭ اۋىر تۇرىمەن اۋىراتىن ەدى. دونورلىق ورگان تاراز قالاسىنان 1.5 ساعات ىشىندە جىلدام جەتكىزىلدى.
دارىگەر ماماندار دونورلىق ورگاندى الۋ, ونى تاسىمالداۋ, جۇرەكتى اۋىستىرۋ وپەراتسياسى بارلىق مەديتسينالىق ءارى ەتيكالىق تالاپقا ساي جۇرگىزىلگەنىن ايتتى. كۇردەلى وتانىڭ ءساتتى وتۋىنە قالالىق دەنساۋلىق ساقتاۋ باسقارماسى, جوعارى ساناتتى دارىگەر-كارديوحيرۋرگ دارحان سۇيگەنباەۆ ونىڭ تاراز قالاسىنداعى ارىپتەستەرى, UMC كومانداسى كوپ كۇش سالدى. بۇل كاسىبيلىكتىڭ, ساپالى قىزمەت پەن ۇيلەسىمدى جۇمىستىڭ ناتيجەسى دەيدى ماماندار.
ورتالىقتىڭ باس دارىگەرى د.سۇيگەنباەۆتىڭ ايتۋىنشا جۇرەك ورگانىن الماستىرۋ قازاقستانداعى ترانسپلانتولوگيا سالاسىنىڭ ماڭىزدى دامۋ كەزەڭى بولىپ سانالادى. سونىمەن قاتار, ورگان الماستىرۋ بويىنشا وڭىرلەر اراسىنداعى مەديتسينالىق ىنتىماقتاستىقتى ارتتىرىپ وتىر.
جوعارىدا ايتىپ وتكەنىمىزدەي, مايىتتەن الىنعان جۇرەك ترانسپلانتاتسياسى شىمكەنتتە ءۇشىنشى رەت جاسالىپ وتىر. بۇعان دەيىن جۇرەك ورتالىعىنىڭ بىلىكتى دارىگەرلەر كومانداسى ەكى رەت اعزا الماستىرۋ وتاسىن ءساتتى وتكىزىپ, قوس ناۋقاسقا جاڭا ءومىر سىيلاعان بولاتىن.
جۇرەك ورتالىعىنىڭ جەتىستىگى ءبىر بۇل ەمەس. مۇندا 21 ناۋقاسقا جاساندى جۇرەك قويىلدى. ونداي وتا تەك استانا مەن شىمكەنتتە عانا جاسالادى. سونداي-اق ورتالىق الەمنىڭ ەڭ زاماناۋي قۇرال-جابدىقتارىمەن جابدىقتالعان. الەمدە جۇرەك اۋرۋىن ەمدەيتىن قانداي جاڭا ءتاسىلى شىقسا, ورتالىق مامانداردى سونى وقىپ, تاجىريبەنى وزدەرىنە ەنگىزەدى. مەديتسينادا كارديولوگيا سالاسى ءۇش باعىتتى اريتميا, ينتەرۆەنتسيا, كارديوحيرۋرگيانى قامتىسا, ورتالىقتا سول ءۇش باعىت بويىنشا دا ناۋقاستاردى جاڭاشا ەمدەۋ قاراستىرىلعان.
شىمكەنت
