جوبا مادەني جانە ءبىلىم بەرۋ باعدارلامالارى ارقىلى سىبايلاس جەمقورلىققا قارسى مادەنيەتتى قالىپتاستىرۋعا جانە نىعايتۋعا باعىتتالعان.
قر ۇلتتىق اكادەميالىق كىتاپحاناسىندا وتكەن ءىس-شاراعا مادەنيەت جانە اقپارات ءمينيسترى ايدا بالاەۆا, سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اسحات جۇماعالي, پارلامەنت دەپۋتاتتارى, مەملەكەتتىك ورگاندار مەن ۇيىمداردىڭ باسشىلارى, مەملەكەت جانە قوعام قايراتكەرلەرى, ەلدىڭ عىلىمي جانە شىعارماشىلىق زيالى قاۋىم وكىلدەرى قاتىستى.
قر مادەنيەت جانە اقپارات ءمينيسترى ايدا بالاەۆا ءوز سوزىندە ء«ادىل قوعام» جوباسىنىڭ ادالدىق پەن ادىلەتتىلىك جولىنداعى ناقتى قادامداردىڭ ءبىرى ەكەنىن اتاپ ءوتتى.
«كەشە عانا مەملەكەت باسشىسى قۇقىق قورعاۋ ورگاندارىنىڭ كەڭەيتىلگەن القا وتىرىسىندا ەلگە جانە زاڭعا قىزمەت ەتۋگە بەل بۋعان ءاربىر ازامات ادامگەرشىلىك پەن ادىلدىك قۇندىلىقتارىن باسشىلىققا الاتىنىن ايتىپ, مۇنداي قاسيەتتەر ەڭ الدىمەن تاربيە ارقىلى بەرىلەتىنىن اتاپ وتكەن بولاتىن. سوندىقتان ءبىز ءار ازاماتتىڭ بويىنا ادالدىقتى دارىتۋ, جاستاردى پاراسات پەن ىزگىلىككە باۋلۋ جولىندا بىرلەسە جۇمىس ىستەۋگە ءتيىسپىز. تەك وسىلاي عانا ءبىز تۇراقتى, سەنىمدى, ادامگەرشىلىككە نەگىزدەلگەن قوعامدى بىرگە قالىپتاستىرا الامىز», دەدى ايدا بالاەۆا.
قر سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اسحات جۇماعالي قازاق حالقىنىڭ ۇلتتىق داستۇرلەرى ەجەلدەن-اق ادىلدىك, ادالدىق جانە پاراساتتىلىق قۇندىلىقتارىن قالىپتاستىرعانىن اتاپ ءوتتى.
«بۇل يدەالدار ۇرپاقتان ۇرپاققا بەرىلىپ, اڭىزداردان, ماقالداردان, ولەڭدەر مەن ادەت-عۇرىپتاردان كورىنىس تاپتى. رۋحاني مۇراعا باي ۇلتتىق مادەنيەت حالىق اراسىندا ادامگەرشىلىك نورمالار مەن قاعيداتتاردى قۇرمەتتەۋدى تاربيەلەۋگە نەگىز بولدى. وسىلايشا, ۇلتتىق مۇرانى, وتباسىلىق جانە قاۋىمدىق داستۇرلەردى قۇرمەتتەۋ ارقىلى سىبايلاس جەمقورلىققا قارسى قۇندىلىقتاردى قۇرا وتىرىپ, ءبىز ادال قوعامدى قالىپتاستىرۋ ءۇشىن بەرىك ىرگەتاس قالايمىز», دەدى اسحات جۇماعالي ۇلى.
ءىس-شارا اياسىندا قاتىسۋشىلارعا حالىق دانالىعى مەن ادالدىق ۇلگىسىن كورسەتەتىن «ىزگىلىك ءداستۇرى» اتتى بەينەروليكتەر, وقۋشىلاردىڭ تاقىرىپ اياسىندا سالعان سۋرەتتەرى كورسەتىلىپ, « ۇلى دالا ادەبى» كورمەسى تانىستىرىلدى.
