ينۆاتاكسي قىزمەتىندە ديسپەتچەر بولىپ جۇمىس ىستەيتىن ول تاعدىر تاۋقىمەتىنە توتەپ بەرىپ, تاباندىلىق تانىتىپ كەلەدى. شاعىن ديسپەتچەرلىك ورتالىقتا قاشاندا قاربالاس. ۇزدىكسىز قوڭىراۋ شالىنىپ, جولاۋشىلار شۇعىل وتىنىشتەرىن جەتكىزىپ جاتادى. سىرتتاي قاراعاندا توماعا-تۇيىق, قاراپايىم كەڭسە بولعانىمەن, قايناپ جاتقان تىرشىلىكتىڭ تۇتقاسىن ۇستاپ وتىرعان ەرەكشە تاعدىر يەسى ەكەنىن اڭعارا دا قويمايسىز.
–مەن ەكىنشى توپتاعى مۇگەدەكپىن, ەكى اياعىمنان ايرىلعانمىن. 2007 جىلدىڭ جەلتوقسان ايىندا وقىس وقيعاعا دۋشار بولدىم, – دەيدى ورال قابىلوۆ, – قازىر پروتەزبەن جۇرەمىن. جالعىز جاردەماقىمەن جان باعۋ قيىن. سوندىقتان, تالپىنۋ قاجەت بولدى. ءوزىم سياقتى ادامداردى, ءتۇرلى قاۋىمداستىقتار مەن ۇيىمداردى ىزدەدىم. مەنىڭ تۇسىنىگىمدە جالعىزدىقپەن ءارى شاراسىزدىقپەن كۇرەسۋ ءۇشىن ورتا قاجەت. مەملەكەت تاراپىنان قولداۋ كورسەتىلگەنىمەن اركىم ءوزى قولىنان كەلەتىن شارۋانى ىستەپ ۇمتىلعانى دۇرىس قوي. ەڭ باستىسى, ءۇمىت ۇزىلمەۋى كەرەك.
ول سۇيىكتى جار, قامقور اكە. ءۇي شارۋاسىنا دا ۇنەمى ارالاسىپ, كورشىلەرىنە دە قولعابىسىن تيگىزەدى. ايتپاقشى, بۇل ورتالىقتا تاعدىرلاس بىرنەشە ادام بار.
–ينۆاتاكسي قىزمەتىن 2011 جىلى باستادىق. سول ۋاقىتتان باستاپ قازاقستان مۇگەدەكتەر ۇيىمىنىڭ وداعى جۇمىسىن جانداندىرا ءتۇستى, – دەيدى «شانس» مۇمكىندىگى شەكتەۋلى جانداردى وڭالتۋ ورتالىعىنىڭ توراعاسى ۆاسيلي شيمانسكي, – قازىرگى الەۋمەتتىك باعدارلامالاردى جۇزەگە اسىرۋ ءبىرشاما قيىندىق تۋعىزادى. بۇل جەردە التى ادام جۇمىس ىستەيدى. شىن مانىندە مۇنداي ادامدارعا جۇمىس تابۋ وتە قيىن. ولار دا مۇنىڭ بارلىعىن جاقسى تۇسىنەدى. جۇمىستارىنا جاۋاپكەرشىلىكپەن قاراپ, تاپسىرىلعان ءىستى تياناقتى اتقارىپ وتىرادى.
تاعدىردىڭ العا تارتقان تاۋقىمەتىن ارقالاپ جۇرسە دە كەلەر كۇندەردىڭ جاقسىلىق شاراپاتىنان كۇدەر ۇزبەگەن قايراتتى جاندار وسىنىسىمەن جالپاق جۇرتقا ۇلگى.
كوكشەتاۋ
