اۋرۋحانانىڭ ءباسپاسوز قىزمەتىنىڭ مالىمدەۋىنشە حالىقارالىق شەبەرلىك دارىسىنە ەلىمىزدىڭ تۇپكىر-تۇكپىرىندەگى كلينيكالاردا ورتوپەديا-تراۆماتولوگيا, ميكروحيرۋرگيا بولىمدەرىندە ەڭبەك ەتەتىن دارىگەرلەر قاتىسقان.
«رف-نىڭ سانكت-پەتەربۋرگ قالاسىنان شاقىرىلعان حيرۋرگ سەرگەي گولياننىڭ جەتەكشىلىگىمەن وتكەن شەبەرلىك ساباعى كەزىندە قازاقستاندىق بالالارعا 8 كۇردەلى وتا جاسالدى. وعان قوسا رەسەيدىڭ اتاقتى پلاستيكالىق حيرۋرگى تاعى 20 كىشكەنتاي پاتسيەنتكە كەڭەس بەرىپ, وتاندىق ارىپتەستەرىمىزگە ميكروحيرۋرگيا سالاسىنداعى وزىق ادىستەمەلەر جونىندە لەكتسيالار وقىدى. بۇل شارانىڭ قازاقستانداعى بالالار ميكروحيرۋرگياسىن دامىتۋعا قوسار ۇلەسى زور», دەپ اتاپ ءوتتى №2 قبكا ديرەكتورى مارات راباندياروۆ.
كۇردەلى وپەراتسيالاردىڭ ءبارى ءمامس قاراجاتى ەسەبىنەن جاسالدى. پاتسيەنتتەردىڭ ەڭ كىشىسى 1 جاستا. بالا اناسىنان 8 ساۋساقپەن تۋعان. پوليفالانگيا دەپ اتالاتىن كەمىستىك سالدارىنان ءوسىپ كەلە جاتقان بالانىڭ قولىنداعى ارتىق ساۋساقتار ويىنشىقتاردى ۇستاپ, الاقانىن اشىپ-جۇمۋعا كەدەرگى كەلتىرىپ كەلەدى. بۇگىنگى شارا بارىسىندا دارىگەرلەر وتانى زەرگەرلىك شەبەرلىكپەن ورىنداپ, سابيگە تولىققاندى ءومىر سۇرۋگە مۇمكىندىك سىيلادى.
ء«بىز ءۇشىن بۇل كەرەمەت جاڭالىق بولدى. وسىنداي وتانى الماتىدا, تەگىن جاساتامىز دەگەن وي ءۇش ۇيىقتاساق تۇسىمىزگە كىرمەگەن ەدى», دەيدى اناسى.
حيرۋرگ سەرگەي گوليانانىڭ ايتۋىنشا شەبەرلىك كلاسىن ءجاي عانا تاجىريبە الماسۋ دەپ قاراستىرۋعا بولمايدى.
«سەبەبى ءبىز قازاقستاندىق ارىپتەستەرمەن بىرگە بالالاردىڭ بولاشاقتا ەمىن-ەركىن قيمىلداپ, قالىپتى ءومىر سۇرۋىنە جاعداي جاسادىق», دەپ اتاپ ءوتتى حيرۋرگ.
