ول مۇنداي تاجىريبە بۇرىننان بار ەكەنىن مىسالمەن جەتكىزدى.
«لاڭكەستى ۇستاۋ كەزىندە ەرلىكپەن قازا تاپقان حالىق قاھارمانى عازيز بايتاسوۆتىڭ ەسىمى تارازداعى ورتالىق كوشەلەردىڭ بىرىنە بەرىلدى. سونداي-اق قالاداعى وقۋ-جاتتىعۋ پوليگونى دا باتىردىڭ اتىمەن اتالعان. تاياۋدا ونىڭ ءومىرى مەن ەرلىگى تۋرالى «كاپيتان بايتاسوۆ» اتتى كوركەم فيلم كورەرمەن نازارىنا ۇسىنىلماق», دەدى قاسىم-جومارت توقاەۆ.
پرەزيدەنت ءورت ءسوندىرۋ كەزىندە قازا تاپقان اسقار زابيكۋليننىڭ دە ەل ەسىندە ەكەنىن ايتىپ ءوتتى.
«استاناداعى ءورت ءسوندىرۋ بولىمىنە جانە سول ءبولىم ورنالاسقان كوشەگە ونىڭ ەسىمى بەرىلدى. بۇل ازاماتتاردى ناعىز بەيبىت كۇننىڭ باتىرلارى دەۋگە بولادى. ولار اقتىق دەمى قالعانشا انتقا ادال بولدى, قىزمەتتىك پارىزىن وتەۋ جولىندا ءوز ومىرلەرىن قۇربان ەتتى», دەدى مەملەكەت باسشىسى.
پرەزيدەنتتىڭ ايتۋىنشا, زاڭ مەن مەملەكەتكە ادال قىزمەت ەتۋ ادامگەرشىلىك پەن ادىلەتكە نەگىزدەلگەن قۇندىلىقتاردان باستالادى. بۇل, ەڭ الدىمەن, وتباسى تاربيەسىنە بايلانىستى. وسىعان وراي, پرەزيدەنت بىرنەشە بۋىن بويى قۇقىق قورعاۋ قىزمەتىندە جۇرگەن زاينۋليندەر اۋلەتىن ماراپاتتادى.
مەملەكەت باسشىسى قوعامداعى زاڭ مەن ءتارتىپ – تەك رەسمي قۇرىلىمدارعا عانا ەمەس, بارشا ازاماتقا ورتاق جاۋاپكەرشىلىك ەكەنىن جەتكىزدى.
«جالپى, زاڭ مەن ءتارتىپ ۇعىمى كوشەدەگى تازالىق پەن قاۋىپسىزدىك سياقتى قاراپايىم نارسەدەن باستالادى. جەرگىلىكتى بيلىك, بيزنەس جانە قوعام بەلسەندىلەرى ورتاق مۇددە جولىندا كۇش بىرىكتىرىپ جۇمىس ىستەسە, قوعامداعى زاڭ مەن ءتارتىپ تە نىعايا تۇسەدى», دەدى پرەزيدەنت.
سونداي-اق اقمولا وبلىسىندا جۇزەگە اسىپ جاتقان «زيالى قاۋىم» جوباسىنا ەرەكشە توقتالىپ, اۋىل اقساقالدارى مەن تۇرعىندارىنىڭ قۇقىق قورعاۋ قىزمەتىنە كورسەتىپ وتىرعان قولداۋىن وڭ باعالادى.
«سونداي-اق بۇگىن مەن بەس جىلدا بىردە-ءبىر قىلمىس تىركەلمەگەن بىرقاتار اۋىلدىڭ اقساقالدارىن ماراپاتتايمىن. قۇقىق قورعاۋ ورگاندارىنىڭ كوپ جۇمىسى سىرت كوزگە كورىنە بەرمەيدى. جەدەل قىزمەتكەرلەر, تەرگەۋشىلەر, پروكۋرورلار, كريميناليستەر, پاترۋل قىزمەتكەرلەرى, ۋچاسكەلىك ينسپەكتورلار مەن باسقا دا قۇرىلىم قىزمەتكەرلەرى كۇن سايىن ەل تىنىشتىعىن قاس قاقپاي كۇزەتىپ جاتىر. ەشقانداي قاۋىپ-قاتەرگە قاراماستان, وتان ءۇشىن جاساپ جاتقان ادال قىزمەتتەرىڭىزگە زور ريزاشىلىعىمدى بىلدىرەمىن. مەن سىزدەرگە سەنەمىن! ارقايسىسىڭىز مىقتى مامان, وتانشىل ءارى ادال ازامات دەگەن اتقا لايىقسىزدار», دەدى قاسىم-جومارت توقاەۆ.
سونىمەن قاتار پرەزيدەنت قۇقىق قورعاۋ سالاسىنداعى جۇيەلى تالداۋدىڭ ماڭىزدىلىعىن اتاپ ءوتتى.
«ارينە, قۇقىق قورعاۋ مەكەمەلەرىنىڭ جۇمىسىندا ەشقانداي قاتەلىك نەمەسە جەتىسپەۋشىلىك جوق دەپ ايتۋعا بولمايدى. بىراق قارا بۇلتتى ءتوندىرۋدىڭ دە قاجەتى جوق. ءبارىمىز ءبىر ەل, ءبىر حالىق بولىپ قازاقستانىمىز ءۇشىن قىزمەت ەتىپ, تاباندى جۇمىس ىستەۋىمىز كەرەك. بۇل – بارشامىزعا ورتاق ۇلتتىق پارىز, ازاماتتىق بورىش. قازاقستان قاۋىپسىز, زاڭ مەن تارتىپكە باعىناتىن ەل بولۋى كەرەك».
مەملەكەت باسشىسىنىڭ تاپسىرماسىنا سايكەس, ءبىر اپتا ىشىندە پرەزيدەنت اكىمشىلىگى مەن قاۋىپسىزدىك كەڭەسى قۇقىق قورعاۋ ورگاندارىنىڭ قىزمەتىنە قاتىستى ارنايى تالداۋ ازىرلەنەدى. بۇل قۇجاتتا سالانىڭ بارلىق وزەكتى ماسەلەلەرى اشىق كورسەتىلىپ, ولاردى شەشۋدىڭ ناقتى جولدارى ۇسىنىلۋى ءتيىس. پرەزيدەنت بۇل – اسا ماڭىزدى جۇمىس ەكەنىن جانە ونى جۇيەلى تۇردە جالعاستىرۋ قاجەتتىگىن ەرەكشە اتاپ ءوتتى. ونىڭ ايتۋىنشا, ەلىمىزدىڭ باستى باعدارى – زاڭ مەن ءتارتىپ قاعيداتىنا نەگىزدەلۋى كەرەك.
