«قازاقمىس كورپوراتسياسى» جشس ورنىقتى دامۋ جانە كوممۋنيكاتسيالار جونىندەگى باسقارۋشى ديرەكتورى ساكەن شاياحمەتوۆ حابارلاعانداي, بالقاشتا دەنە شىنىقتىرۋ-ساۋىقتىرۋ كەشەنى مەن بالاباقشا سالىنادى, سونداي-اق حامزين اتىنداعى مادەنيەت سارايى قايتا جاڭعىرتىلادى. قارقارالىدا بالالار مەن جاسوسپىرىمدەر سارايىنىڭ قۇرىلىسى جوسپارلانعان.
قازاقمىس پەن اكىمدىك وسى جوبالاردى جۇزەگە اسىرۋ بويىنشا جول كارتاسىنا قول قويدى. ول جاڭا الەۋمەتتىك نىساندارعا جەر تەلىمدەرىن تاڭداۋدان باستاپ پايدالانۋعا بەرۋگە دەيىنگى بارلىق كەزەڭدەردى قامتيدى.
ەرماعانبەت بولەكپاەۆ ناقتى مىندەتتەر قويدى. دەنە شىنىقتىرۋ-ساۋىقتىرۋ كەشەنىندە باسسەينى, ۇستەل تەننيسىنە ارنالعان زالى قاراستىرىلۋى كەرەك جانە مۇگەدەكتىگى بار ادامدار ءۇشىن قولجەتىمدى بولۋى ءتيىس. وبلىس اكىمى حامزين اتىنداعى مادەنيەت سارايىن قايتا جوندەۋ جوباسىن دايىنداپ, ونى قالا جۇرتشىلىعىمەن تالقىلاۋدى تاپسىردى. بۇل رەتتە نىساننىڭ تاريحي كەلبەتىن ساقتاۋ ماڭىزدى. سونداي-اق, ءبىلىم بەرۋ ينفراقۇرىلىمىن جاقسارتۋ ءۇشىن بالقاشتا جاڭا مەكتەپتىڭ جانىندا بالاباقشا سالۋدى جوسپارلاۋ قاجەت. كەلىسىم اياسىنداعى بارلىق جوبالار 2027 جىلدىڭ سوڭىنا دەيىن اياقتالادى.
قاراعاندى وبلىسى
