جازدا جيدەك جەپ ۋلانباۋ ءۇشىن نەنى ەستە ۇستاۋ قاجەت

جەمىس-جيدەكتە زياندى زاتتار جاسىرىنادى

ماماننىڭ ايتۋىنشا, جەمىس پەن جيدەكتەردىڭ زيانسىز ءارى پايدالى بولۋى ولاردىڭ ءوسىرۋ تاسىلىنە, وڭدەلۋىنە جانە ساقتالۋىنا تىكەلەي بايلانىستى. دۇرىس جۋىلماعان نەمەسە ساپاسىز ءونىم تۇتىنۋشىنى ۋلاندىرۋى مۇمكىن.

«جيدەك پەن جەمىستەردە ءجيى كەزدەسەتىن زياندى زاتتار – پەستيتسيدتەر, گەربيتسيدتەر جانە نيتراتتار. بۇلار — وسىمدىكتەردى زيانكەستەر مەن ارامشوپتەردەن قورعاۋ ءۇشىن قولدانىلاتىن حيميالىق زاتتار. بىراق قالدىقتارى جەمىستە قالىپ قويسا, ادام اعزاسىنا زيان كەلتىرەدى», دەيدى سادۋباەۆا.

نيتراتتار – كوزگە كورىنبەيتىن قاۋىپ

ادەتتە نيتراتتار كوبىنەسە كوكونىستەردە كەزدەسەدى دەپ ويلايمىز. بىراق مامان جەمىستەردە دە ولاردىڭ بولۋى مۇمكىن ەكەنىن ايتادى. ارتىق مولشەردە جينالعان نيتراتتار, اسىرەسە بالالار مەن جۇكتى ايەلدەر ءۇشىن قاۋىپتى.

ساپاسىز جيدەكتىڭ سالدارى اۋىر بولۋى مۇمكىن

«پىسپەگەن نەمەسە ساپاسىز جيدەكتەردە سالمونەللا, كولي تاياقشاسى, ليستەريوز سىندى پاتوگەندەر كەزدەسەدى. بۇلار ىشەك ينفەكتسيالارىن, تاماقتان ۋلانۋدى (قۇسۋ, ءىش ءوتۋ, قىزبا) تۋدىرۋى مۇمكىن», دەپ ەسكەرتەدى مامان.

سونداي-اق, حيميالىق زاتتار شامادان تىس قولدانىلعان ونىمدەر اللەرگيالىق رەاكتسيالار (قىشىنۋ, ءىسىنۋ, تەرىدە بورتپە, تىنىس الۋ قيىندىعى) تۋىنداتۋى دا ىقتيمال.

جيدەكتەن ۋلانۋ جازدا جيىلەيدى

كوميتەتتىڭ مالىمەتى بويىنشا, 2024–2025 جىلدارى كوكونىستەر مەن جەمىستەردىڭ 3403 ۇلگىسى زەرتتەلىپ, ونىڭ 41 سىناماسى (1,2%) كەدەن وداعىنىڭ تەحنيكالىق رەگلامەنتىنە سايكەس كەلمەگەن (نەگىزىنەن نيتراتتار بويىنشا).

«جيدەكتەن ۋلانۋ جاعدايلارى كوبىنە ماۋسىم, شىلدە جانە تامىز ايلارىندا تىركەلەدى. بۇل – جەمىستىڭ كوپتەپ ءپىسىپ, دۇرىس ساقتالماعان كەزەڭىمەن بايلانىستى», دەيدى سادۋباەۆا.

جەمىس-جيدەكتى دۇرىس جۋ – ۋلانۋدىڭ الدىن الۋدىڭ باستى جولى.

• اعىندى سالقىن سۋمەن جاقسىلاپ جۋ;

• قوسىمشا اس سوداسى ەرىتىندىسىن قولدانۋ – باكتەريالار مەن پەستيتسيدتەر قالدىقتارىن ازايتادى;

• جەمىستەردى توڭازىتقىشتا ساقتاۋ, اسىرەسە پىسكەن جانە جۇمساق تۇرلەرىن ۇزاق ۋاقىت اشىق اۋادا قالدىرماۋ;

• بازاردا نەمەسە جول جيەگىندە سانيتارلىق تالاپ ساقتالماعان جەرلەردەن الماۋ.

جەمىس-جيدەك - اعزا ءۇشىن دارۋمەن كوزى, بىراق ونى دۇرىس تاڭداماۋ, دۇرىس جۋماي تۇتىنۋ ۇلكەن قاتەرگە الىپ كەلۋى مۇمكىن. مامان كەڭەسىنە قۇلاق اسىپ, جەمىستى تەك ءدامى ءۇشىن ەمەس, قاۋىپسىزدىگى ءۇشىن دە تەكسەرىپ تۇتىنۋ ءار ادامنىڭ ءوز قولىندا.