سۋعا باتۋعا شاق قالعان 2 ايەلدى قۇتقارعان
وقيعا 2022 جىلى بوتاقارا كەنتىنە تاياۋ ماڭداعى وزەن ماڭىندا بولعان. روستوۆكا اۋىلىنىڭ ۋچاسكەلىك پوليتسيا ينسپەكتورى باتىرحان سەيدىعاليەۆ ادامداردىڭ سۋعا باتىپ بارا جاتقانىن ايتىپ مەدەت اسقاروۆتان كومەك سۇرايدى.
كەلىنشەكتىڭ ءبىرى تەرەڭگە قاراي ءجۇزىپ كەتىپ, سۋعا باتا باستاعان. ونى كورىپ, قۇتقارۋ ءۇشىن سوڭىنان جۇزگەن قۇربىسىن دا ءيىرىم تەرەڭىنە تارتا بەرگەن. سول ۋاقىتتا باتىرحان كەلىنشەككە كومەككە ۇمتىلعان, بىراق سۋ جۇتىپ قويىپ, تۇنشىعىپ, ابدىراپ تۇرىپ قالعان. ءسويتىپ وزەننىڭ ءدال ورتاسىندا, ءيىرىمىنىڭ قاتتى تۇسىندا تۇرعان ۇشەۋىنە دە قاۋىپ تونەدى.
ولاردى ءدال ۋاقىتىندا كەلگەن مەدەت اسقاروۆ قۇتقارادى. الدىمەن ارىپتەسىنىڭ قولىنان تارتىپ, وعان انا كىسىنىڭ قولىنان ۇستاۋدى ءتۇسىندىرىپ, جيەككە الىپ شىعادى. سودان كەيىن سۋعا باتىپ كەتكەن ەكىنشى كەلىنشەكتى قۇتقارۋ ءۇشىن سۇڭگىپ, ونى جاعاعا الىپ شىققان ەكەن.
«مەدەت اقىلبەك ۇلى كەلىپ, ۇشەۋمىزدى دە قۇتقارىپ قالدى. ەرلىگىنە باس يەمىز. سويتسەك, ءبىز باتقان جەرگە شومىلۋعا بولمايدى ەكەن. ءجۇزۋ بىلگەنىمىزبەن ءداپ سول تۇستا ءيىرىم بار بولعاندىقتان سۋعا باتتىق. بىزگە ونى قۇداي جىبەردى, امان قالدىق, وعان العىسىمىز شەكسىز!», دەپ ەسكە الادى ەكى كەلىنشەكتىڭ ءبىرى ينگا كوشەربەكوۆا.
جول-كولىك وقيعاسىنان 2 ادامدى امان الىپ قالعان
سول جىلى قاراشا ايىندا بوتاقارا كەنتىنىڭ تۇرعىنى تىلەگەن ساكەنوۆ قاس قارايعان شاقتا جۇمىسىنان ۇيىنە بارا جاتىپ, جۋىردا عانا العان جاڭا كولىگىمەن اۋدارىلىپ قالادى. شوشىنىپ قالسا كەرەك, ەسىك اشۋعا قاۋقارى بولماعان. مۇنى جول ۇستىندە كەلە جاتقان مەدەت اقىلبەك ۇلى بايقاپ قالعان.
«ازداعان بوران ءارى كوكتايعاق ەدى, رولگە يە بولا الماي, ەكى رەت اۋدارىلىپ تۇستىك. ەسىمنەن تانىپ قالىپپىن. كوك ءتۇتىننىڭ ءيىسى شىعا باستادى. كولىگىمنىڭ ىشىندە قاۋىپسىزدىك بەلدىگىن بوساتا الماي جاتقان كەزدە مەدەت اسقاروۆ كەلىپ, اۋەلى قاسىمداعى جولاۋشىنى, سودان سوڭ مەنى سىرتقا شىعاردى. ول بولماعاندا كولىگىمىز ورتەنىپ, سونىڭ ىشىندە قالىپ قويار ما ەدىك. ءتارتىپ ساقشىسىنا مىڭ العىس!», دەپ ەسكە العان ەكەن كولىك جۇرگىزۋشىسى.
5 بالانى كوك ءتۇتىننىڭ ىشىنەن الىپ شىققان
2018 جىلى جەلتوقسان ايىندا بوتاقارا كەنتىندە كوپقاباتتى ءۇيدىڭ بىرىنەن ءورت شىعادى. سول جولى قاھارمان پوليتسەي 5 بالانى وتقا ورانعان ۇيدەن سىرتقا امان الىپ شىعادى.
دالادا بۇرقاسىن بوران بولاتىن. ءتۇننىڭ ءبىر ۋاعىندا ۇيدەگىلەر ۇيقىعا كەتكەندە پەشتىڭ دالاداعى مۇرجاسى قۇلاپ, ءتۇتىن كەرى ۇيگە كىرگەن. ايەل ادام كوزىن اشىپ, ويانعان مەزەتتە ءۇيدىڭ ءىشى كوك ءتۇتىن ەكەن, جولداسى ۆاحتالىق جۇمىسقا كەتكەن بولاتىن. ءتورت بالاسى ۇيىقتاپ جاتقان ەدى. مينۋت سايىن دەم الۋ قيىنداي تۇسكەن كوك ءتۇتىن باسقان ۇيىنەن 5 ايلىق بالاسىن قولىنا الىپ جۇگىرە شىعىپ, تۇتىننەن قارلىعىپ قالعان بار داۋسىمەن كومەك سۇراعان.
مەدەت اقىلبەك ۇلى ۇيىنە كەلىپ, كولىگىنەن ءتۇسىپ جاتقان كەزدە, كورشىلەس ۇيدەن جۇگىرە شىققان ءبىر ايەلدىڭ ومىراۋداعى بالاسىمەن ءسۇرىنىپ قۇلاعانىن كورەدى جانە كومەك سۇراپ, جانۇشىرا ايعايلاعان داۋىسىن ەستيدى. ۇيىندە ءورت بولىپ جاتقانىن, ءتورت بالاسى ءۇيدىڭ ىشىندە قالىپ قويعانىن ەستىپ, ۇرەيگە بوي الدىرعان ايەل ادامدى اۋەلى سابىرعا شاقىرىپ, سودان سوڭ, دىم كورىنبەيتىن كوك ءتۇتىن باسقان ءۇيدىڭ ىشىنە بىردەن كىرگەن.
«ۇيىنە جۇگىرىپ كىرىپ, ەڭبەكتەپ الىپ ىزدەدىم. قولىما اياعى ىلىككەن بالالاردى سىرتقا شىعارىپ وتىردىم. ايەلىمە ايتىپ, جەدەل جاردەم شاقىرتتىق», دەيدى ءتارتىپ ساقشىسى.
انا ءۇشىن بالالارىنىڭ اماندىعىنان ارتىق قانداي باقىت بار؟! جانسۇلۋ اسانقىزى سول وقيعا تۋرالى ءالى كۇنگە دەيىن تولقىپ ەسكە الادى.
ء«بىر مەزەتتە كورشى ۇيدە تۇراتىن پوليتسەي جىگىتتىڭ كولىگىنەن ءتۇسىپ ماعان قاراي جۇگىرىپ كەلە جاتقانىن بايقادىم. پوليتسيا قىزمەتكەرى ەڭ الدىمەن مەنى سابىرعا شاقىرىپ, ءمان-جايدى تۇسىنگەن سوڭ, كوك ءتۇتىن جايلاعان ۇيگە كىرىپ كەتىپ, ۇيىقتاپ جاتقان ءتورت بالامدى كەزەكپەن الىپ شىعىپ ءوز ۇيىنە اپاردى. سونىڭ ارقاسىندا بالالارىم امان قالدى. ەگەر سول كۇنى ول بولماعاندا, قانداي قايعى بولارىن ەلەستەتۋ دە قورقىنىشتى. قازىر التى بالانىڭ اناسىمىن. مەدەت اقىلبەك ۇلىنا العىسىم شەكسىز», دەيدى جانسۇلۋ سەدەنوۆا.
ەرلىك – ەل ەسىندە
قاراعاندىدا وتتان, سۋدان جانە جول-كولىك وقيعاسىنان توعىز ادامدى قۇتقارىپ قالعان پوليتسەي ەرلىكتەرىن جۇمىستان تىس ۋاقىتتا جاساعان.
اتالعان ەرلىكتەرى ەسكەرىلىپ پوليتسيا قىزمەتكەرى مينيسترلىكتىڭ «قۇقىق ءتارتىبىن قامتاماسىز ەتۋگە قوسقان ۇلەسى ءۇشىن» مەدالىمەن ناگرادتالدى. مەملەكەت باسشىسىنىڭ جارلىعىمەن قىزمەتتىك بورىشىن اتقارۋ كەزىندە كورسەتكەن باتىلدىعى مەن جانقيارلىعى ءۇشىن II دارەجەلى «ايبىن» وردەنى كەۋدەسىنە تاعىلدى.
مەدەت اقىلبەك ۇلى قارقارالى اۋدانىنىڭ تاتتىمبەت اۋىلىندا 1987 جىلى دۇنيەگە كەلگەن. 1997 جىلى بۇقار جىراۋ اۋدانىنداعى بوتاقارا كەنتىنە كوشىپ كەلىپ, سول كەنتتە مەكتەپتى تامامداعان سوڭ, ءبىر جىل جۇمىس ىستەيدى. ودان كەيىن اسكەري بورىشىن وتەۋ ءۇشىن پەتروپاۆل قالاسىنا اتتانادى. اسكەردەن كەلگەن سوڭ ەكى ايدان كەيىن كۇزەت پوليتسياسىنا جۇمىسقا ورنالاسىپ, وندا 2007-2009 جىلدارى جۇمىس ىستەپ, ال 2009-2013 جىلدارى پاترۋلدىك پوليتسيا بولىمىندە ەڭبەك ەتتى. 2013-2014 جىلدارى بۇقار جىراۋ اۋدانىندا كەزەكشىنىڭ كومەكشىسى, 2014-2021 جىلدارى ۋاقىتشا ۇستاۋ يزولياتورىندا جۇرگىزۋشىسى, 2021-2023 جىلدارى پاترۋلدىك پوليتسيادا جۇمىس ىستەدى. 2023 جىلدان وسى ۋاقىتقا دەيىن ۋچاسكەلىك پوليتسيا ينسپەكتورى بولىپ قىزمەت اتقارىپ كەلەدى. ول ۇيدەگى 7 ۇلدىڭ ورتانشىسى. اكەسىنەن جاستاي ايىرىلىپ قالعان. ەشكىمنىڭ الا ءجىبىن اتتاماۋ, قاجەت كەزدە قول ۇشىن سوزۋدى انا تاربيەسىنەن دارىتقان. اعاسى ورالبەك (كەزەكشى بولىمىندە) پەن باۋىرى جاراس تا (جەدەل ۋاكىل) قىزمەتتەرىن وسى سالادا اتقارىپ ءجۇر. سول اعاسىنا قاراپ, بالا كەزىنەن پوليتسەي بولۋدى ارمانداعان مەدەت اقىلبەك ۇلى 15 جىل سەرجانت بولدى, 2021 جىلى وفيتسەر شەنىن الدى. ونىڭ ەلگە ادال قىزمەت ەتۋگە انت قابىلداعانىنا 19 جىلعا جۋىقتاپتى. كەلىنشەگى ايگۇل ەكەۋى ءتورت بالا تاربيەلەپ وتىرعان ۇلگىلى وتباسى.
مەرەكە قارساڭىندا قاراعاندى وبلىستىق پوليتسيا دەپارتامەنتىنىڭ مۇراجايىندا ەرلىكتى ۇمىت قالدىرماي, جاس قىزمەتكەرلەرگە ۇلگى ەتۋ ماقساتىندا «ەرلىك – ەل ەسىندە» اتتى تاعىلىمدى ءىس-شارا ءوتىپ, وعان قاۋىپ-قاتەر مەزەتتەرىندە ازاماتتارعا قول ۇشىن سوزىپ, باتىل ارەكەتكە بارعان پوليتسيا قىزمەتكەرلەرى مەن ولاردىڭ قۇتقارعان تۇرعىندارى شاقىرىلدى. باتىرلىق – ءبىر كۇندىك ەمەس, ومىرلىك قاسيەت. ەندەشە مەدەت اسقاروۆ سەكىلدى قاھارمانداردىڭ ەرلىكتەرى جاس پوليتسەيلەرگە قاشاندا ۇلگى بولىپ قالا بەرمەك.
