فوتو: ۇكىمەتتىڭ ءباسپاسوز قىزمەتى
كەڭەس بارىسىندا ەگىس قۇرىلىمىن قازىرگى احۋالعا ساي وزگەرتۋ, سۋدى از قاجەت ەتەتىن داقىلدارعا كوشۋ جانە سۋ ۇنەمدەۋ تەحنولوگيالارىن ەنگىزۋ ماسەلەلەرى كوتەرىلدى. سونىمەن قاتار سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ پەن تۇركىستان, جامبىل, قىزىلوردا, الماتى جانە جەتىسۋ وبلىستارىنىڭ اكىمدەرى جۇرگىزىلىپ جاتقان جۇمىستار تۋرالى باياندادى.
بيىلعى جىلى «قازسۋشار» مەكەمەسى ارقىلى اۋىل شارۋاشىلىعى وندىرۋشىلەرىمەن 22,5 مىڭ كەلىسىمشارت جاسالعان, بۇل وتكەن جىلمەن سالىستىرعاندا 3 مىڭعا كوپ.
شۋ, تالاس جانە سىرداريا وزەندەرىنىڭ جاعدايى, سۋدى ءادىل ءبولۋ, زاڭسىز سۋ پايدالانۋمەن كۇرەس, سونداي-اق سۋبسيديالاۋ تەتىكتەرى دە تالقىلاندى. سۋ ۇنەمدەۋ تەحنولوگيالارىن قولداناتىن شارۋالارعا مەملەكەت تاراپىنان جوعارى مولشەردە سۋبسيديا قاراستىرىلعان.
«تيىمدىلىككە, ۇنەمدىلىككە جانە ۆەدومستۆوارالىق كەلىسىمدىلىككە باسا نازار اۋدارا وتىرىپ, سۋ تاۋەكەلدەرىن الدىن الا باسقارۋعا كوشۋ قاجەت. وبلىس اكىمدەرى سۋمەن جابدىقتاۋ ۇيىمدارىنىڭ ەگىندىك سۋمەن شارۋالاردى قامتاماسىز ەتۋ, سۋارۋ تەحنولوگيالارىن ساقتاۋ, سۋارۋ رەتتىلىگى جانە كوللەكتورلىق-درەناجدىق سۋدى قايتا پايدالانۋ جونىندەگى ءىس-قيمىلدارىن ۇيلەستىرۋدى قامتاماسىز ەتۋى ءتيىس. سۋ ۇنەمدەۋ تەحنولوگيالارىن ەنگىزۋ جۇمىستارىن كۇشەيتۋ قاجەت. مۇددەلى مەملەكەتتىك ورگاندار مەن فەرمەرلەر بىرلەستىكتەرى وكىلدەرىنىڭ قاتىسۋىمەن ۆەگەتاتسيالىق كەزەڭدە سۋ تاۋەكەلدەرىن باسقارۋ جونىندەگى وڭىرلىك شتابتار قۇرۋدى تاپسىرامىن. سۋدى زاڭسىز پايدالانۋدى باقىلاۋدى كۇشەيتۋ جانە بۇزۋشىلىقتاردى انىقتاۋ جۇمىستارىن جانداندىرۋ ماڭىزدى», ولجاس بەكتەنوۆ.
سونىمەن قاتار, مينيسترلىككە شەكارالاس ەلدەرمەن بىرلەسىپ جۇمىس ىستەۋ, سۋ بەرۋ ليميتتەرىن ناقتى باقىلاۋ جانە گيدروتەحنيكالىق نىسانداردى جوندەۋ بويىنشا مىندەتتەر جۇكتەلدى. سۋ رەسۋرستارىنىڭ ساندىق مونيتورينگى ەندى سپۋتنيكتىك باقىلاۋ جانە ينتەراكتيۆتى كارتالار ارقىلى جۇزەگە اسىرىلاتىن بولادى.
ۆەگەتاتسيالىق كەزەڭنىڭ بارىسى ۇكىمەتتىڭ ءجىتى باقىلاۋىندا. جۇمىستى ۇيلەستىرۋ پرەمەر-ءمينيستردىڭ ورىنباسارى قانات بوزىمباەۆقا جۇكتەلدى.
