ءىس-شارا اياسىندا ارحيۆتىك قۇجاتتاردى تاپسىرۋ جونىندەگى رەسمي كەلىسىمشارتقا جازۋشىنىڭ نەمەرەسى ابىل كەكىلباەۆ پەن پرەزيدەنت ءارحيۆىنىڭ ديرەكتورى ءاليا مۇستافينا قول قويدى. سونداي-اق سالتاناتتى تۇردە ارناۋلى تاقىرىپتىق كورمە ۇسىنىلدى. كوپشىلىك نازارىنا ۇسىنىلعان قۇجاتتار, سيرەك فوتوسۋرەتتەر, جازۋشىنىڭ جەكە زاتتارى مەن بۇرىن جاريالانباعان تاريحي بەينەجازبالار جۇرتشىلىقتى ەرەكشە اسەرگە بولەدى.
ايتا كەتەيىك, پرەزيدەنت ارحيۆىنە تاپسىرىلعان 22 مىڭنان استام پاراق جانە 308 ساقتاۋ بىرلىگىنەن تۇراتىن رۋحاني بايلىق. ونىڭ ىشىندە جازۋشىنىڭ كوركەم تۋىندىلارىنىڭ تۇپنۇسقالارى, جەكە قولجازبالارى, ساياسي باياندامالارى, رەسمي قىزمەت كەزىندەگى جازبالارى, ءتىپتى ىسساپارلىق ەستەلىكتەرىنە دەيىن تۇگەل قامتىلعان. كوپشىلىك بىلە بەرمەيتىن ءبىر ەرەكشەلىك – ءابىش كەكىلباي ۇلى بارلىق ەڭبەگىن قولمەن جازعان.
مۇنداي اۋقىمدى ءارحيۆتى ساقتاپ, رەتتەپ, مەملەكەت يەلىگىنە تاپسىرۋ – ۇلكەن جاۋاپكەرشىلىك پەن كورەگەندىك. بۇل رەتتە جازۋشىنىڭ ۇرپاقتارى, اسىرەسە نەمەرەسى ابىل كەكىلباەۆ ۇلكەن ەڭبەك اتقارعان. ول پرەزيدەنت ارحيۆىمەن كەلىسسوزدەردى ەكى جىلدان استام ۋاقىت بويى جۇرگىزىپ, ءار قۇجاتتى سۇرىپتاپ, جيناقتاپ, مەملەكەتتىك قورعا تاپسىرعان.
ء«بىزدىڭ باستى ماقساتىمىز – وسى ءارحيۆتى جوعالتپاي, ونى دۇرىس جاعدايدا ساقتاۋ جانە عىلىمي اينالىمعا ەنگىزۋ. پرەزيدەنت ارحيۆىندە قۇجاتتاردى كاسىبي ساقتاۋ جۇزەگە اسىرىلىپ قانا قويماي, ولاردى تسيفرلاندىرۋ مەن قالپىنا كەلتىرۋ جۇمىستارى دا ءجۇرىپ جاتىر. كەيبىر جوعالعان بولىكتەرى قايتا قالپىنا كەلتىرىلۋى مۇمكىن. ەڭ باستىسى – بۇل ماتەريالدار زەرتتەۋشىلەرگە, سونىڭ ىشىندە بولاشاق ۇرپاققا قولجەتىمدى بولادى. ارحيۆپەن كەلىسسوزدى ءبىز ەكى جىل بۇرىن باستادىق, ال 2025 جىلى, استانادا جاڭا عيمارات اشىلاتىنى بەلگىلى بولعان سوڭ, ناقتى قادامدار جاسالدى – قولجازبالاردىڭ تۇگەندەلۋى, جيناقتالۋى جانە!تاپسىرۋ كەزەڭى ۇيىمداستىرىلدى. ودان بولەك, جازبا داپتەرلەرى, ءىس-ساپار كەزىندەگى ەستەلىكتەرى جانە جەكە قۇجاتتار دا تاپسىرىلدى», دەدى ابىل كەكىلباەۆ.
جالپى پرەزيدەنت ءارحيۆى بۇگىندە 1,5 ميلليوننان استام ساقتاۋ بىرلىگىن قامتيدى. ونىڭ ىشىندە عىلىم, مادەنيەت, ساياسات سالاسىندا ەلگە ەڭبەگى سىڭگەن تۇلعالاردىڭ جەكە قورلارى بار. ەندى سول تىزىمگە ءابىش كەكىلباي ۇلىنىڭ ءارحيۆى دە قوسىلدى.
ء«ابىش كەكىلباي ۇلى – تەرەڭ ويلى, مەملەكەتپەن ەلگە ادال قىزمەت ەتكەن قايراتكەر. ول جوعارعى كەڭەستىڭ توراعاسى, مەملەكەتتىك حاتشى سياقتى!جاۋاپتى قىزمەتتەردە بولىپ, تاۋەلسىز ەلدىڭ دامۋ باعىتىنا ۇلكەن ۇلەس قوستى. ونىڭ جەكە ءارحيۆى – ەگەمەن قازاقستاننىڭ قالىپتاسۋ كەزەڭىندەگى ساياسي شەشىمدەر مەن تاريحي وقيعالاردى تەرەڭ زەردەلەۋگە مۇمكىندىك بەرەتىن قۇندى دەرەككوز», دەدى پرەزيدەنت ءارحيۆىنىڭ ديرەكتورى ءاليا مۇستافينا.
سونىمەن قاتار پرەزيدەنت ءارحيۆى سوڭعى جىلدارى ارحيۆتىك قۇجاتتاردى تسيفرلىق فورماتقا كوشىرۋدە ۇلكەن جەتىستىكتەرگە جەتكەن. بۇگىندە 25 ميلليوننان استام قۇجات ساندىق جۇيەگە ەنگىزىلگەن, ولاردىڭ 90 پايىزى زەرتتەۋشىلەرگە ەلەكتروندى تۇردە قولجەتىمدى. وسى جولدا ءابىش كەكىلباەۆتىڭ دا جەكە ءارحيۆى تولىقتاي تسيفرلاندىرىلادى.
