«وبلىستىڭ گەوگرافيالىق جاعىنان ىڭعايلى ورنالاسۋى, تەمىرجول, اۆتوموبيل جولدارى جانە حالىقارالىق اۋەجاي قىزىلوردانى ەلىمىزدىڭ ءىرى لوگيستيكالىق جانە وندىرىستىك ورتالىعىنا اينالدىرۋعا تولىق مۇمكىندىك بەرەدى. اەا اۋماعى – 550 گەكتار. قورقىت اتا اۋەجايىنىڭ قاسىنان ورىن تەبەدى. ونىڭ 50 گەكتارى اۆياتسياعا قىزمەت كورسەتۋ ايماعى بولسا, 100 گەكتارى كوتەرمە-بولشەك ساۋدا, قويما جانە ساقتاۋ ايماعىنا ارنالادى. قالعانى ونەركاسىپتىك ايماق سانالادى. قازىر اەا ءتيىمدى جۇمىس ىستەۋىن قامتاماسىز ەتۋ ءۇشىن 28 نەگىزگى ەكونوميكالىق قىزمەت تۇرلەرى كەلىسىلدى», دەيدى وبلىستىق كاسىپكەرلىك جانە ونەركاسىپ باسقارماسىنىڭ باسشىسى داۋرەن ابىلقايىروۆ.
اەا-دا قۇرىلىس يندۋسترياسى, جەڭىل ونەركاسىپ, ماشينا جاساۋ, كولىك-لوگيستيكا, تەحنولوگيا مەن يننوۆاتسيا سالاسىنداعى ينۆەستيتسيالىق جوبالاردى جۇزەگە اسىرۋ جوسپارلانعان. ونەركاسىپتىك ايماقتان ءجۇن جانە تەرى وڭدەۋ, كيىم ءوندىرىسى, توقىلماعان ماتەريال ءوندىرىسى دە ورىن تەپپەك. قۇرىلىس يندۋسترياسىن دامىتاتىن شىنىپلاستيك ارماتۋرا, پوليمەرلى, ارماتۋرالانعان قۇبىر ءوندىرىسى, فيبروتسەمەنت بۇيىمدارىن جانە اۆتوكلاۆتى گازبەتون وندىرەتىن زاۋىت سالۋ جوسپارلانىپ وتىر.
جۋىردا قىتايلىق كومپانيامەن «سيليكاتتى-كالتسيلەنگەن تاقتايشا» شىعارۋ ءۇشىن مەموراندۋمعا قول قويىلدى. ايماقتا ورنالاساتىن العاشقى جوبا دا وسى ءوندىرىس ورنى بولماق. ءوڭىر باسشىلىعىنىڭ شەت مەملەكەتتەرگە جاساعان جۇمىس ساپارلارىنىڭ ناتيجەسىندە قازىر سىرتتان كەلىپ, ايماق ەكونوميكاسىن زەرتتەپ جاتقان كومپانيالار كوپ. ولاردىڭ اراسىندا قىتاي ىسكەرلەرىنەن بولەك ەۋروپا بيزنەسمەندەرى دە بار.
اەا قاتىسۋشىلارىنا بىرقاتار سالىق جانە كەدەن جەڭىلدىگى ۇسىنىلادى. ولار كورپوراتيۆتىك تابىس سالىعىنان, اەا اۋماعىنا وتكىزىلەتىن تاۋارلارعا قوسىلعان قۇن سالىعىنان, كەدەندىك باج بەن جەر جانە مۇلىك سالىعىنان, جەر ۋچاسكەسىن پايدالانعانى ءۇشىن تولەماقىدان بوساتىلادى. سونىمەن قاتار كۆوتالاردان تىس شەتەلدىك جۇمىس كۇشىن تارتۋدا جەڭىلدىكتەر دە قاراستىرىلعان.
ەلىمىزدە اەا جۇمىسىنىڭ ۇزاقتىعى – 25 جىل. بۇل مەرزىمدى ۇزارتۋعا دا مۇمكىندىك بار. اەا اۋماعىندا جەر قويناۋىن پايدالانۋ, اكتسيزدەلەتىن تاۋار ءوندىرۋ, ويىن بيزنەسى سالاسىنداعى جوبالاردى ىسكە اسىرۋعا بولمايدى. باسقارما باسشىسىنىڭ ايتۋىنشا, جەر الۋ ءۇشىن ينۆەستور قۇجاتتار تىزبەسىنە ساي باسقارۋشى كومپانياعا ءوتىنىم بەرەدى. ال «QazIndustry» اق بىرىڭعاي ۇيلەستىرۋ ورتالىعى رەتىندە ينۆەستوردى قاتىسۋشى رەتىندە تىركەيدى. وبلىستىڭ ەكونوميكالىق دامۋىنا سەرپىن بەرەتىن ستراتەگيالىق جوبا وسىلاي جۇزەگە اسىرىلا باستايدى. 3 000-نان استام جاڭا جۇمىس ورنى قۇرىلاتىن اەا-نىڭ جوسپارلانعان ەكونوميكالىق كورسەتكىشكە جەتۋى قاداعالانادى.
«ارنايى ەكونوميكالىق ايماعى كوپ پولشا قازىر ءىرى وتاندىق جانە شەتەلدىك ينۆەستيتسيا تارتۋ, جاڭا وندىرىسكە جول اشۋ, ەكسپورتتىق جانە كولىكتىك الەۋەتتى كۇشەيتۋ باعىتىندا الدا تۇر. ءبىز وسى مەملەكەتتىڭ, ءوز ەلىمىزدە قۇرىلعان باسقا دا اەا تاجىريبەلەرىن زەرتتەدىك. پولشالىق ماماندار كەڭەسىنە جۇگىندىك. وسى ارقىلى سىر ءوڭىرىن ەلىمىزدىڭ لوگيستيكالىق جانە وندىرىستىك كارتاسىندا جەتەكشى ورىنعا شىعارامىز دەگەن ءۇمىت بار», دەيدى باسقارما باسشىسى.
قىزىلوردا
