– بيىل شىبىندىكولدىڭ جاعاسىندا جاڭا دەمالىس بازاسىنىڭ قۇرىلىسى باستالادى. ينۆەستور – «QaiMak Resort» جشس. ينۆەستيتسيا كولەمى – 250 ملن تەڭگە. سونىمەن قاتار, تارعىن اۋىلىندا كافە مەن سانيتارلىق ايماعى بار جول بويىنداعى كەشەن اشىلادى. بۇل اۋدان بويىنشا تۋريستىك باعىتتاردىڭ تارتىمدىلىعىن ارتتىرادى, – دەيدى ۇلان اۋدانى اكىمىنىڭ ورىنباسارى ليازيزا كەنجەتاەۆا.
دۇبىعالى, ايىر جانە شىبىندىكول ماڭىن اباتتاندىرۋ قولعا الىنىپ, «باگراتيون» پانتامەن ەمدەۋ شيپاجايىن 40 توسەك-ورىنعا كەڭەيتۋگە كوڭىل ءبولىندى. تاريحي-مادەني نىساندار ابلايكيت, اقباۋىر ارحەولوگيالىق كەشەندەرى مەن بوزانباي اۋىلىنداعى بۇركىتتوبە الاڭىن دامىتۋعا ەرەكشە نازار اۋدارىلدى.
سونىمەن قاتار, 7 ەكسكۋرسيالىق مارشرۋت ازىرلەنگەن. ولاردىڭ قاتارىندا «مەدۆەدكا – توعاناس – بەستەرەك» ەكولوگيالىق سوقپاعى بار. بۇل جەردە تۋريستەردىڭ ىڭعايلىلىعى ءۇشىن كيىز ۇيلەر, فوتوزونالار مەن باسپالداق ورناتۋ جوسپارلانعان. اۋىل تۋريزمىنە دە ەرەكشە ءمان بەرىلە باستادى. قوناقتارعا ءداستۇرلى ۇيلەردە تىنىعىپ, ءوڭىر مادەنيەتىمەن جاقىنىراق تانىسۋ ۇسىنىلادى.
2024 جىلدىڭ قورىتىندىسى بويىنشا ۇلان اۋدانىنا 13,8 مىڭ تۋريست كەلگەن. ورنالاستىرۋدان تۇسكەن كىرىس 261,6 ملن تەڭگەنى قۇرادى. اۋداننىڭ ءيميدجى حالىقارالىق دەڭگەيدەگى ءىس-شارالاردىڭ, سونىڭ ىشىندە الەمنىڭ تۇكپىر-تۇكپىرىنەن بۇركىتشىلەر جينالاتىن «شىعىس سالبۋرىنى» فەستيۆالىنىڭ ارقاسىندا نىعايىپ كەلەدى.
شىعىس قازاقستان وبلىسى
