قازاقستان حوككەيشىلەرى – ۋنيۆەرسيادانىڭ كۇمىس جۇلدەگەرى

استانا. 15 اقپان. يسپانيانىڭ گرانادا قالاسىندا ءوتىپ جاتقان قىسقى ۋنيۆەرسيادا شەڭبەرىندە قازاقستاننىڭ حوككەيدەن ەرلەر اراسىنداعى ستۋدەنتتەر قۇراماسى بۇگىن تۇندە فينالدا رەسەي كومانداسىنان 1:3 ەسەبىمەن ۇتىلىپ, كۇمىس جۇلدەگەر اتاندى. بۇل تۋرالى Vesti.kz ءتىلشىسى حابارلادى. ماتچتاعى ەسەپتى ءبىرىنشى بولىپ رەسەيلىكتەر اشتى. ولار 3-مينۋتتا تيمۋر شينگارەۆتىڭ مەرگەندىگىمەن العا شىقتى. ارادا 11 مينۋت وتكەندە, ەسەپ ۇلعايا ءتۇستى. بۇل جولى ەگور كريۆچەنكو ەرلەدى. ەكىنشى كەزەڭدە قارسىلاستار تاعى ءبىر شايبا سالىپ تابلوداعى كورسەتكىشتى 3:0-گە جەتكىزدى. مۇنى الەكساندر تورچەنيۋك جاسادى. ءۇشىنشى كەزەڭدە ءبىزدىڭ جىگىتتەر ءبىر شايبانىڭ قارىمتاسىن قايتاردى. جالعىز گولدى ۆلاديسلاۆ ەلاكوۆ پەن گەرمان نەستەروۆتان پاس العان رەنات سافين ءتۇسىردى. وسى ەسەپ ماتچتىڭ سوڭىنا دەيىن وزگەرگەن جوق. ايتا كەتەيىك, قازاقستاننىڭ ستۋدەنتتەر قۇراماسى مۇنىڭ الدىندا, 2013 جىلى وتكەن قىسقى ۋنيۆەرسيادادا دا كۇمىس جۇلدەلى بولىپ ەدى. سول جولى يتاليانىڭ ترەنتينو قالاسىندا وينالعان فينالدىق كەزدەسۋدە كانادا ستۋدەنتتەرىنەن 2:6 بولىپ ۇتىلعانبىز. ال گرانادادا مۇنىڭ الدىندا ۋنيۆەرسيادانىڭ ءۇشىنشى ورنى ءۇشىن كانادا جانە چەحيا تالاستى. ماتچ «ۇيەڭكى جاپىراعى» ەلى حوككەيشىلەرىنىڭ ايقىن باسىمدىلىعىمەن ءبىتتى. ويىننىڭ باسىندا ءبىراز قارسىلاسقان چەحتار سودان كەيىن ويىن تىزگىنىن قارسىلاستارىنا ءبىرجولا بەرىپ قويدى. ناتيجەسىندە 2:6 ەسەبىمەن ۇتىلدى. ەسكە سالا كەتەيىك, ۋنيۆەرسيادادا قازاقستان ستۋدەنتتەرى كۇنى بۇگىنگە دەيىن 11 جۇلدە جەڭىپ الدى. ولاردىڭ اراسىندا 5 التىن, 6 كۇمىس مەدال بار. سپورتشىلار اراسىندا اناستاسيا سلونوۆا ۋنيۆەرسيادانىڭ ەكى دۇركىن چەمپيونى اتاندى. ال تۋرنيردە رەسەي قۇراماسى 20 التىن, 18 كۇمىس جانە 18 قولا مەدالمەن وق بويى الدا كەلەدى. دامير قوجامقۇل. دەرەك, فوتو: Vesti.kz.