2025 جىلعى 17 ماۋسىمدا وتكەن كەزدەسۋدە يننوۆاتسيالار مەن تەحنولوگيالاردى قۇقىقتىق قورعاۋ ماسەلەلەرى, وڭىرلىك ديالوگتى دامىتۋ جانە تۇراقتى ءارى تەحنولوگياعا نەگىزدەلگەن ءوزارا ءىس-قيمىل تەتىكتەرىن ىلگەرىلەتۋ جولدارى تالقىلاندى.
جيىنعا قازاقستان, قىرعىزستان, تاجىكستان جانە قىتاي حالىق رەسپۋبليكاسىنىڭ زياتكەرلىك مەنشىككە جاۋاپتى مەملەكەتتىك ورگاندارىنىڭ وكىلدەرى قاتىستى. سونىمەن قاتار, شاراعا بايقاۋشى رەتىندە دۇنيەجۇزىلىك زياتكەرلىك مەنشىك ۇيىمىنىڭ (WIPO) وتپەلى جانە دامۋشى ەكونوميكاسى بار ەلدەر دەپارتامەنتىنىڭ ديرەكتورى حابيپ اسان قاتىستى.
كەزدەسۋ بارىسىندا ستراتەگيالىق جوسپارلاۋ, تسيفرلىق تەحنولوگيالاردى, ونىڭ ىشىندە جاساندى ينتەللەكتىنى قولدانۋ ماسەلەلەرى كەڭىنەن ءسوز بولدى.
قازاقستاننىڭ زياتكەرلىك مەنشىك قۇقىعى كوميتەتىنىڭ توراعاسى شولپان ابدرەەۆا ءوز سوزىندە «ورتالىق ازيا – قىتاي» فورماتىنداعى ىنتىماقتاستىقتى جۇيەلى جانە مازمۇندى جۇمىس جۇرگىزۋگە ارنالعان ءتيىمدى الاڭ رەتىندە اتاپ ءوتتى. ول سونداي-اق تسيفرلىق ەكونوميكانىڭ سىن-قاتەرلەرىن ەسكەرە وتىرىپ قۇقىقتىق رەتتەۋدى جەتىلدىرۋ, داۋلاردى شەشۋ تەتىكتەرىن دامىتۋ, ىسكەرلىك ورتاعا قولايلى جاعداي جاساۋ جانە زاماناۋي تسيفرلىق شەشىمدەردى ەنگىزۋ – ءوزارا مۇددەلى باعىتتار ەكەنىن جەتكىزدى.
كەزدەسۋ قورىتىندىسىندا تاراپتار وڭىرلىك دەڭگەيدە پراكتيكالىق ىنتىماقتاستىقتى تەرەڭدەتۋگە نيەتتى ەكەندەرىن راستاپ, بىرلەسكەن مالىمدەمە قابىلدادى.
