فورۋمنىڭ باستى مىندەتى – قازاقستان مەن قىتاي اراسىنداعى ساياسي ءوزارا سەنىمگە نەگىزدەلگەن كەلىسىمدەردى پراكتيكالىق دەڭگەيدە جۇزەگە اسىرۋ. بۇل ەلىمىزدىڭ ەنەرگەتيكالىق قاۋىپسىزدىگىن كۇشەيتۋگە, وتاندىق شيكىزاتتى تەرەڭ وڭدەۋگە جانە ءتيىمدى ەنەرگيا ەكونوميكاسىنا كوشۋگە مۇمكىندىك بەرەدى. سونىمەن قاتار, ماڭىزدى ينۆەستيتسيالىق جوبالار مەن ستراتەگيالىق قۇجاتتارعا قول قويۋ جوسپارلانعان.
فورۋمنىڭ اشىلۋىندا ءسوز سويلەگەن ەنەرگەتيكا ءمينيسترى ەرلان اقكەنجەنوۆ قازاقستان مەن قىتاي اراسىنداعى ەنەرگەتيكالىق ارىپتەستىكتى «التىن وتىز جىلدىققا» بەت العان كەزەڭدەگى جاڭا سەرپىن دەپ باعالادى.
«نەگىزگى باستامالار قاتارىندا – شىمكەنت مۇناي وڭدەۋ زاۋىتىن جاڭعىرتۋ, اقتوبە وبلىسىندا كارباميد وندىرەتىن زاۋىت سالۋ, سونداي-اق جاڭارتىلاتىن ەنەرگيا كوزدەرى سالاسىندا اۋقىمدى جوبالاردى ىسكە اسىرۋ بار. بۇل – ارتاراپتاندىرىلعان, تەحنولوگيالىق ەكونوميكا قۇرۋعا باعىتتالعان قادامدار», دەدى ە. اقكەنجەنوۆ.
پلەنارلىق سەسسيادا تاراپتار بىرنەشە ءىرى جوبانى تانىستىرىپ, بىرقاتار كەلىسىمدەرگە قول قويدى. اتاپ ايتقاندا:
-
شىمكەنت ءموز-ءىن جاڭعىرتۋ: قر ەنەرگەتيكا مينيسترلىگى, «قازمۇنايگاز» اق جانە CNPC اراسىندا زاۋىتتىڭ قۋاتتىلىعىن جىلىنا 12 ملن تونناعا دەيىن ارتتىرۋعا باعىتتالعان نەگىزدەمەلىك كەلىسىم جاسالدى.
-
كارباميد زاۋىتى: اقتوبە وبلىسىندا جۇزەگە اسىرىلاتىن جوبا بويىنشا قازاقستاننىڭ ەنەرگەتيكا مينيسترلىگى, «قازمۇنايگاز» ۇك» اق, CNPC جانە وبلىس اكىمدىگى اراسىندا كەلىسىمگە قول قويىلدى.
-
گاز سالاسىنداعى ىنتىماقتاستىق: «سولتۇستىك-1» جوباسى بويىنشا ەنەرگەتيكا مينيسترلىگى, «QazaqGaz» ۇك» اق جانە CNPC اراسىندا ۇشجاقتى مالىمدەمە قابىلداندى.
-
جاڭارتىلاتىن ەنەرگيا كوزدەرى: «ساۋران» كۇن ەلەكتر ستانتسياسىن سالۋ, گيدرواككۋمۋلياتسيالىق ستانتسيالار مەن سۋتەگى ەنەرگەتيكاسى باعىتىندا قىتاي كومپانيالارىمەن مەموراندۋمدار جاسالىپ جاتىر.
فورۋم اياسىندا PowerChina, Huawei جانە Longi سياقتى ءىرى قىتايلىق كورپوراتسيالار قازاقستاندا ءوندىرىستى جەرگىلىكتەندىرۋ جانە تەحنولوگيالىق شەشىمدەردى ەنگىزۋ نيەتىن ءبىلدىردى. بۇل باعىتتا زەرتتەۋ ورتالىقتارى مەن جوعارى تەحنولوگيالىق وندىرىستەردى دامىتۋ جونىندە ناقتى ۋاعدالاستىقتار بار.
سونىمەن فورۋم سوڭىندا ەنەرگەتيكا سالاسىنداعى جەتەكشى كومپانيالار مەن ينۆەستورلار ءوزارا كەلىسىمدەرگە رەسمي تۇردە قول قويىپ, جاڭا باستامالارعا نەگىز قالادى. شىمكەنت ءموز-ءىن جاڭعىرتۋ, گاز-حيميا جوبالارىن ىسكە اسىرۋ جانە بالامالى ەنەرگەتيكا تەحنولوگيالارىن ەنگىزۋ – قازاقستان مەن قىتاي اراسىنداعى سەرىكتەستىكتىڭ كەلەسى كەزەڭىن ايقىندايتىن ماڭىزدى باستامالار سانالادى.
Power Central Asia + China فورۋمى — وڭىرلىك ەنەرگەتيكالىق تۇراقتىلىقتى قامتاماسىز ەتۋگە جانە ۇزاق مەرزىمدى ەكونوميكالىق ءوسىمدى قولداۋعا باعىتتالعان ستراتەگيالىق الاڭ رەتىندە تانىلىپ وتىر.
