سۋرەتتى تۇسىرگەن – نۇربەك يحسانوۆ
«فەلدشەرلىك-اكۋشەرلىك پۋنكتتىڭ اشىلۋى – قۋانىشتى ءارى ماڭىزدى وقيعا. بۇل – مەملەكەت باسشىسىنىڭ تاپسىرماسىنا سايكەس اۋىل تۇرعىندارىنىڭ دەنساۋلىعىن جاقسارتۋعا باعىتتالعان جۇيەلى جۇمىستىڭ, «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىنىڭ ناقتى ناتيجەسى», دەدى اۋىل حالقىنىڭ قۋانىشىنا ورتاقتاسا كەلگەن وبلىس اكىمى ناريمان تورەعاليەۆ.
مەديتسينالىق نىساننىڭ اۋماعى – 260 شارشى مەتر. كۇنىنە 40 ادامدى قابىلداۋعا قاۋقارلى پۋنكتتىڭ جوبالىق قۇنى – 207 ميلليون تەڭگە. «جيەنباي» جشس قۇرىلىستى ساپالى جۇرگىزىپ شىققان.
كونەككەتكەن اۋىلى جايىق وزەنىنىڭ سول جاعىندا ورنالاسقان, گاز, سۋ, جول سياقتى يگىلىك كەشىگىپ جەتەتىن اۋىلدىڭ ءبىرى. بىرنەشە جىلدان بەرى سالىنىپ جاتقان «بارباستاۋ – اقجايىق – يندەر» اۆتوجولى قازىر ەسەنساي اۋىلىنا جاقىنداپ قالدى. اۆتوجولدىڭ 93 شاقىرىمىنان باستاپ ەسەنساي اۋىلىنا دەيىنگى 52 شاقىرىمىنا بيىل اسفالت توسەلسە, كونەككەتكەن اۋىلدىق وكرۋگى اۋماعى تولىق اسفالتپەن قامتىلادى. كوكتەمدە, كۇزدە, جاۋىن-شاشىن ۋاقىتىندا جول ازابىن تارتاتىن تۇرعىندار ءۇشىن بۇل – ۇلكەن جەتىستىك. ءوڭىر باسشىسى وسى ساپارىندا اۆتوجولدان كونەككەتكەن, قامىستىكول اۋىلدارىنا بۇرىلاتىن كىرەبەرىس جولدار دا جوندەلەتىنىن ايتىپ, كوپشىلىكتى قۋانتىپ تاستادى.
بيىل كونەككەتكەن اۋىلىندا قۇرىلىس جۇمىسى قارقىندى ءجۇرىپ جاتىر. قازىر 100 ورىندىق مادەنيەت ءۇيىنىڭ قابىرعاسى قالانىپ تۇر. قۇرىلىسشىلار اكىمگە بەرگەن ۋادەسىندە تۇرسا, ىشكى ارلەۋ جۇمىسى جىلدام اياقتالىپ, قىركۇيەكتىڭ باسىندا اۋىلدا جاڭا مادەنيەت ءۇيى دە اشىلۋعا ءتيىس. بۇدان بولەك, تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2023–2029 جىلدارعا ارنالعان تۇجىرىمداماسى اياسىندا 2 پاتەرلى 2 تۇرعىن ءۇي سالىنىپ جاتىر. اۋدان اكىمى مۇرات سەردالين تۇرعىن ۇيلەر ماۋسىم-شىلدە ايلارىندا اياقتالىپ, الەۋمەتتىك جاعىنان ءالسىز توپتاعى ازاماتتارعا كەزەك بويىنشا بەرىلەتىنىن ءمالىم ەتتى.
ايتا كەتەيىك, 2023–2025 جىلدارى باتىس قازاقستان وبلىسىندا 50 جاڭا مەديتسينالىق نىسان سالۋ كوزدەلگەن بولسا, سونىڭ 39-ى بۇگىندە ىسكە قوسىلدى.
باتىس قازاقستان وبلىسى
