سۋرەتتى تۇسىرگەن – ءمادي عۇبايدۋللين
ءىس-شاراعا باتىس قازاقستان وبلىسىنىڭ اكىمى ناريمان تورەعاليەۆ قاتىسىپ, جارمەڭكەنىڭ ءمان-ماڭىزىن اتاپ ءوتتى.
– حالىقتىڭ ءال-اۋقاتىن كوتەرۋ, ولاردى جۇمىسپەن قامتۋ, الەۋمەتتىك قورعاۋ – قاشاندا قوعامداعى وزەكتى ماسەلە. اسىرەسە ازاماتتاردىڭ جۇمىسقا ورنالاسۋىنا مەملەكەت تاراپىنان قولداۋ ءبىلدىرۋ ءىسى مەملەكەت باسشىسىنىڭ باستى نازارىندا تۇر. ءبىز ءوڭىر تۇرعىندارىن جۇمىسقا ورنالاستىرۋ, مەملەكەتتىك باعدارلامالاردىڭ يگىلىكتەرىن حالىققا ءتۇسىندىرۋ ماقساتىندا «Talpyn» مۇمكىندىكتەر الاڭى شاراسىن ۇيىمداستىرىپ وتىرمىز, – دەدى وبلىس اكىمى.
ءوڭىر باسشىسىنىڭ ايتۋىنشا, 2022–2024 جىلدار ارالىعىندا وبلىستا جاڭا بيزنەس يدەيالاردى ىسكە اسىرۋ ءۇشىن 1800 ازاماتقا ارنايى گرانت بەرىلگەن ەكەن. ال بيىل تاعى 445 ادامعا وسىنداي گرانت بەرۋ جوسپارلانعان. «اۋىل اماناتى» باعدارلاماسى اياسىندا 2024 جىلى وبلىستا 268 شاعىن نەسيە بەرىلىپ, 2,5 ملرد تەڭگە قاراجات بولىنسە, بيىل جوبانى ىسكە اسىرۋعا 5,5 ملرد تەڭگە ءبولىنىپ, 815 جوبا قارجىلاندىرىلماق. «وسى ارقىلى 886 جۇمىس ورنى قۇرىلادى دەپ وتىرمىز. قابىلدانىپ جاتقان شارانىڭ بارلىعى – مەملەكەت تاراپىنان تۇرعىندارعا كورسەتىلگەن ۇلكەن كومەك», دەدى ناريمان تورەعالي ۇلى.
مەملەكەت باسشىسىنىڭ «جۇمىسشى ماماندىقتارى جىلىن» جاريالاۋى دا قاراپايىم ەڭبەك ادامدارىنا دەگەن قۇرمەتتى ارتتىرىپ وتىر. جىل باسىنان بەرى وبلىستا بوس جۇمىس ورىندارى جارمەڭكەسى 22 مارتە ۇيىمداستىرىلدى. ولارعا جالپى سانى 368 جۇمىس بەرۋشى قاتىستى. ناتيجەسىندە, 118 جۇمىس ىزدەۋشى تۇراقتى جۇمىسقا ورنالاستى.
بۇل جولعى ءىس-شاراعا 79 جۇمىس بەرۋشى قاتىسىپ, 1 282 بوس جۇمىس ورنىن ۇسىندى. ولاردىڭ قاتارىندا قپو, «كۇبىلەي», «Uniserv», «زەنيت» زاۋىتى سەكىلدى ءىرى مەكەمەلەر مەن جەكە كاسىپكەرلەر, مەملەكەتتىك مەكەمەلەر بار. ءبىر ەرەكشەلىگى, جيىن كەزىندە وسى الاڭدا تاجىريبەلى كاسىپكەرلەر مەن جاستاردىڭ اشىق كەزدەسۋى ءوتتى. كەزدەسۋدە سپيكەرلەرگە سۇراق قويعان, بەلسەندى بولعان قاتىسۋشىلارعا موتيۆاتسيالىق كىتاپتار سىيعا تارتىلدى. وسىنداي سىيلىقتىڭ بىرىنە جاھانشا دوسمۇحامەد ۇلى اتىنداعى جوعارى پەداگوگيكالىق كوللەدجدىڭ 4-كۋرس ستۋدەنتى ءجاميلا وتەپوۆا يە بولدى.
جارمەڭكە كەزىندە «اۋىل اماناتى» باعدارلاماسى مەن ء«بىر اۋىل – ءبىر ءونىم» جوبالارى ناتيجەسىندە وندىرىلگەن تاۋارلار ساۋداعا شىعارىلدى. «Talpyn» – مۇمكىندىكتەر الاڭى» ءىس-شاراسى جۇمىس ىزدەپ جۇرگەن مامانداردىڭ جۇمىس تابۋىنا عانا ەمەس, جاڭا كاسىپ تۋرالى ويلاۋىنا دا جول اشتى.
باتىس قازاقستان وبلىسى
