استانا. 6 مامىر. بۇگىن ۋەفا چەمپيوندار ليگاسى جارتىلاي فينالدىق باسەكەسىنىڭ ەكىنشى ويىنى وتەدى. اتالعان سىندا «بارسەلونا» (بارسەلونا, يسپانيا) ءوز الاڭىندا «باۆاريانى» (ميۋنحەن, گەرمانيا) قابىلدايدى. بۇل تۋرالى egemen.kz حابارلادى.
كەشە تۇندە جارتىلاي فينالدىڭ العاشقى ويىنى ءوتىپ, «يۋۆەنتۋس» ءوز الاڭىندا ءمادريدتىڭ «رەالىن» 2:1 ەسەبىمەن جەڭگەنى بەلگىلى.
ەندىگى كەزەكتە ادەتتەگىدەي بۇگىنگى ويىنعا قاتىستى كەيبىر قىزىقتى دەرەكتەرگە نازار اۋدارايىق.
- «باۆاريا» «بارسەلونانىڭ» الاڭىندا وتكىزگەن سوڭعى 4 ويىننىڭ 3-ۋىندە جەڭىسكە جەتتى.
- بۇگىنگە دەيىن قوس كوماندا ەۋروكۋبوك باسەكەلەرىنىڭ جارتىلاي فينالىندا ەكى رەت كەزدەسكەن. ونىڭ سوڭعىسى وسىدان ەكى جىل بۇرىن بولعانى ەسىمىزدە. چەمپيوندار ليگاسىنىڭ 2012-2013 جىلعى ماۋسىمىندا بولعان سول ويىندا «باۆاريا» ەكى كەزدەسۋ ناتيجەسى بويىنشا 7:0 ەسەبىمەن جەڭىسكە جەتكەن بولاتىن. ال العاش رەت 1995-1996 جىلعى ماۋسىمدا ۋەفا كۋبوگىنىڭ جارتىلاي فينالىندا جولدارى ءتۇيىستى. ول كەزدە دە نەمىستەر جالپى ناتيجەدە 4:3 ەسەبىمەن باسىم ءتۇستى.
- 2008-2009 جىلعى ماۋسىمدا ەكى كوماندا چەمپيوندار ليگاسىنىڭ شيرەك فينالىندا كەزدەستى. «بارسەلونانىڭ» سول كەزدەگى باس جاتتىقتىرۋشىسى حوسەپ گۆارديولا («باۆاريانىڭ» قازىرگى باس جاتتىقتىرۋشىسى) ەدى. سول جولى يسپانيادا وتكەن العاشقى ماتچتا «بارسەلونا» 4:0 ەسەبىمەن جەڭىسكە جەتتى. ال قارىمتا ويىندا قارسىلاستار تەڭ تارقاستى (1:1).
- چەمپيوندار ليگاسىنىڭ 1998-1999 جىلعى ماۋسىمىندا ەكى كوماندا ءبىر توپقا ءتۇستى. ول كەزدە «بارسەلونانىڭ» قازىرگى باس جاتتىقتىرۋشىسى لۋيس ەنريكە وسى كوماندانىڭ ويىنشىسى بولاتىن. ول كەزدە ەكى ويىن ناتيجەسى بويىنشا ميۋنحەندىكتەر 3:1 (1:0, 2:1) ەسەبىمەن جەڭىسكە جەتتى. سول ماۋسىمدا «باۆاريا» فينالعا دەيىن جەتىپ, شەشۋشى ويىندا «مانچەستەر يۋنايتەدكە» ەسە جىبەرگەنى ەسىمىزدە. ءدال سول فينالدىق باسەكە فۋتبول تاريحىنداعى ەڭ جارقىن ويىنداردىڭ ءبىرى رەتىندە حاتقا تۇسكەنى دە بەلگىلى.
- «باۆاريا» تاريحىندا چەمپيوندار ليگاسىن 5 مارتە جەڭىپ العان. سونداي-اق, بۇگىنگە دەيىن وسى سايىستىڭ فينالىندا 10 رەت ويناعان. ال ءتۋرنيردىڭ 4 دۇركىن جەڭىمپازدارى «بارسەلونا» 7 رەت فينالعا شىققان.
كوماندالار مىنا قۇرامدا الاڭعا شىعۋى مۇمكىن.
