«2000-شى جىلداردىڭ باسىندا قازاق ۇلتتىق اگرارلىق زەرتتەۋ ۋنيۆەرسيتەتىندە مەملەكەتتىڭ جانە وسى وقۋ ورداسىنىڭ مەنشىگى تالان-تاراجعا تۇسكەن. اتاپ ايتقاندا, ۋنيۆەرسيتەتتىڭ 3 جاتاقحاناسى, 5 لابوراتوريالىق ءىرى نىسانى جانە بىرقاتار شارۋاشىلىق ماقساتتاعى جەر ۋچاسكەسى جەكە ادامداردىڭ قولىنا ءوتىپ كەتتى. مۇنىڭ ارتىندا سىبايلاس جەمقورلىق ارەكەتى تۇرعانى انىق. بۇگىندە «Amanat» پارتياسىنىڭ اتسالىسۋىمەن باس پروكۋراتۋرانىڭ جانە سىبايلاس جەمقورلىققا قارسى ءىس-قيمىل اگەنتتىگىنىڭ قىزمەتكەرلەرى وسى ماسەلەمەن اينالىسىپ جاتىر. ارينە, وسى جىلدار ارالىعىندا مەنشىكتەر بىرنەشە رەت باسقا تۇلعالاردىڭ قولىنا ءوتىپ كەتتى. وسى ۋاقىتقا دەيىن بىردە-ءبىر مەملەكەتتىك ورگان ناقتى شەشىم قابىلداعان ەمەس. سوعان قاراماستان, ادىلدىك قالپىنا كەلۋى كەرەك دەپ ويلايمىن. زاڭسىز جەكەشەلەنگەن بارلىق ماتەريالدىق يگىلىكتەر مەملەكەتكە قايتارىلۋى قاجەت. بۇعان جول بەرگەن ازاماتتار قۇقىقتىق جاۋاپكەرشىلىككە تارتىلۋعا ءتيىس», دەپ اتاپ ءوتتى وسى جاعدايمەن ءجىتى تانىس ءماجىلىس دەپۋتاتى ەرلان سايروۆ.
الماتى قالاسىنىڭ پروكۋراتۋراسى ۋنيۆەرسيتەت مۇلكىن زاڭسىز يەلىكتەن شىعارۋ فاكتىلەرىن انىقتاعان بولاتىن. ناقتى ايتقاندا, اباي داڭعىلى 8 مەكەنجايىندا ورنالاسقان بىرقاتار نىساندار جەكەشەلەنىپ كەتكەن. كەيىننەن «يريدا ينۆەست» جشس اباي داڭعىلى, 8 مەكەن-جايىندا ورنالاسقان جەر ۋچاسكەسىنىڭ ءبىر بولىگىن «رامس-قازاقستان» جشس-نە كوپ پاتەرلى تۇرعىن ءۇي سالۋعا بەرگەن. قازىرگى ۋاقىتتا كوپ پاتەرلى تۇرعىن ءۇي سالۋ ءۇشىن باستالعان قۇرىلىس جۇمىستارى ۋاقىتشا توقتاتىلدى.
وسى ماسەلە بويىنشا باس پروكۋرورعا جانە پرەمەر-مينيسترگە مالىمدەمە جولدانعانىن اتاپ وتكەن دەپۋتات ەرلان سايروۆ بۇل نىسانداردىڭ ستۋدەنتتەردىڭ يگىلىگىنە قايتارىلۋى قاجەتتىگىن العا تارتتى.
سوڭعى ەكى جىلدا قازاق ۇلتتىق اگرارلىق زەرتتەۋ ۋنيۆەرسيتەتىنىڭ اكتيۆتەرىن مەملەكەت مەنشىگىنە قايتارۋ باعىتىندا قارقىندى جۇمىس جۇرگىزىلىپ جاتىر. مىسالى, جەكە قولعا وتكەن №6 ستۋدەنتتىك جاتاقحانا وقۋ ورداسىنىڭ تۇرعىن ءۇي قورىنا قايتارىلىپ, كۇردەلى جوندەۋدەن كەيىن قوسىمشا 280 ستۋدەنت ورىنمەن قامتاماسىز ەتىلدى.
الماتى وبلىسى, تالعار اۋدانى, «بايبۇلاق» اۋىلىنداعى «اگروۋنيۆەرسيتەت» وقۋ-تاجىريبەلىك شارۋاشىلىعىنداعى 50 ورىندىق جاتاقحانا (جەر كولەمى 1,345 گا), اۋىل شارۋاشىلىق تاجىريبەلىك ماقساتىنداعى 0,11 گا جەر ۋچاسكەسى (جانارماي ستانتسياسى سالىنىپ كەتكەن), اۋىل شارۋاشىلىق زاتتارىن ساقتايتىن قويما (جەر كولەمى 0,0455 گا), تەحنيكالىق قۇرالدارعا ارنالعان گاراج (جەر كولەمى 0,08 گا) ۋنيۆەرسيتەت مەنگىشىگىنە قايتارىلدى. 1973 جىلى سالىنعان, سوڭعى 30 جىل بويى بىردە-ءبىر رەت جوندەۋ كورمەگەن وقۋ-تاجىريبەلىك شارۋاشىلىقتىڭ جاتاقحاناسى جاقىندا كۇردەلى جوندەۋدەن وتكىزىلىپ, ستۋدەنتتەردىڭ پايدالانۋىنا بەرىلدى.
«AMANAT» پارتياسى وتكىزگەن جيىندا ۋنيۆەرسيتەتتىڭ قاۋىپسىزدىگىنە قاتەر توندىرەتىن جاعدايلاردى ەسكەرە وتىرىپ, ستۋدەنتتەر مەن وقىتۋشىلار تاراپىنان وسى نىسانداردى سالۋدى مۇلدە توقتاتۋ جانە تۇبەگەيلى وقۋ ورداسىنىڭ يەلىگىنە قايتارۋ باعىتىنداعى تالاپتار نازارعا الىندى.
ءوز كەزەگىندە, كەڭەسكە قاتىسقان قر ونەركاسىپ جانە قۇرىلىس مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى توراعاسى ورىنباسارىنىڭ مىندەتىن اتقارۋشى سەرىك نابيەۆ, الماتى قالاسى اكىمىنىڭ ورىنباسارى بەيبىت شاحانوۆ, «Amanat» پارتياسى ورتالىق اپپاراتى پارتيالىق باقىلاۋ دەپارتامەنتىنىڭ ينسپەكتورى ۆەنەرا ەسىلباەۆا, پارتيانىڭ الماتى قالالىق فيليالىنىڭ توراعاسى ستانيسلاۆ كانكۋروۆ, «Amanat» پارتياسى اقف سىبايلاس جەمقورلىققا قارسى كەڭەسىنىڭ مۇشەسى نۇرلان سيسەكەنوۆ, الماتى قالاسى قۇرىلىسىن باقىلاۋ باسقارماسىنىڭ باسشىسى دانيار قىرىقباەۆ, الماتى ق. قالالىق جوسپارلاۋ جانە ۋربانيستيكا باسقارماسىنىڭ باسشىسى نۇرلان بورانباەۆ, الماتى قالاسى جەر قاتىناستارى باسقارماسىنىڭ باسشىسىنىڭ ورىنباسارى تيمۋر تۇرسبەكوۆ ءوز ۇسىنىستارىمەن ءبولىستى. ولار دەپۋتاتتىڭ باستاماسىن قولداي وتىرىپ, جەكە قولعا زاڭسىز ءوتىپ كەتكەن ۋنيۆەرسيتەت نىساندارىنا جان-جاقتى تەكسەرۋ جۇرگىزۋدى, زاڭسىز قۇرىلىستى توقتاتۋ شارالارىن جۋىق ارادا جۇرگىزۋدى قولعا الاتىندارىن جەتكىزدى.
قازىرگى تاڭدا بۇل وزەكتى ماسەلە «Amanat» پارتياسىنىڭ, باس پروكۋراتۋرا جانە سىبايلاس جەمقورلىققا قارسى ءىس-قيمىل اگەنتتىگىنىڭ باقىلاۋىندا تۇر.
الماتى
